អ៊ុយក្រែន និងអឺរ៉ុបបានឲ្យសច្ចាប័នលើកិច្ចព្រមព្រៀងនយោបាយ និងសេដ្ឋកិច្ច
ចុះផ្សាយនៅថ្ងៃ៖
ស្តាប់ - ០៦:១២
នៅថ្ងៃទី១៦ កញ្ញានេះ សភាអឺរ៉ុប និងសភាអ៊ុយក្រែនរៀបចំបោះឆ្នោតដំណាលគ្នាឲ្យសច្ចាប័នលើកិច្ចព្រមព្រៀងនយោបាយ និងសេដ្ឋកិច្ចរវាងសហភាពអឺរ៉ុប និងប្រទេសអ៊ុយក្រែន។ នៅក្នុងចំណោមកិច្ចព្រមព្រៀងទំាងពីរនោះ មានតែកិច្ចព្រមព្រៀងនយោបាយទេដែលនឹងត្រូវចូលជាធរមាននៅប៉ុន្មានសប្តាហ៍ខាងមុខ រីឯកិច្ចព្រមព្រៀងសេដ្ឋកិច្ចត្រូវបានទីក្រុងគៀវ ម៉ូស្គូ និងគណៈកម្មការអឺរ៉ុបសម្រេចដាក់ឲ្យចូលជាធរមាននៅដំណាច់ឆ្នំា ២០១៥។ លោកប្រធានាធិបតីអ៊ុយក្រែនប៉េត្រូ ប៉ូរ៉ូឆេនកូបានចាត់ទុកថ្ងៃនេះ ជាថ្ងៃប្រវត្តិសាស្រ្តមួយដ៏សំខាន់សម្រាប់ប្រទេស និងប្រជាជនអ៊ុយក្រែន។ តែអ្វីជាការកត់សម្គាល់ ព្រឹត្តិការណ៍ប្រវត្តិសាស្រ្តមួយនេះបានកើតមានឡើង ចំពេលដែលអ៊ុយក្រែនកំពុងបន្តអុកឡុកដោយពួកអ្នកទាមទារផ្តាច់ទឹកដីនិយមគំាទ្ររុស្ស៊ី។
កិច្ចព្រមព្រៀងនយោបាយ និងសេដ្ឋកិច្ចរវាងអ៊ុយក្រែន និងសហភាពអឺរ៉ុបត្រូវបានគេរៀបចំអស់រយៈជាយូរមកហើយ និងដែលតាមការគ្រោងទុក ត្រូវចុះហត្ថលេខាតំាងពីជំនួបកំពូលអឺរ៉ុបក្នុងទីក្រុងវីលនីញូស ប្រទេសលីទុយអានីពីថ្ងៃទី២៨ ដល់ថ្ងៃទី២៩ វិច្ឆិកាឆ្នំា ២០១៣។ តែកាលណោះ មួយសប្តាហ៍មុននឹងជំនួបកំពូលអឺរ៉ុបចាប់ផ្តើម ប្រធានាធិបតីអ៊ុយក្រែនជំនាន់នោះ គឺលោកវ៉ិចទ័រ អ៊ីយ៉ានូកូវិកបែរជាបានសម្រេចចិត្តមិនភ្ជាប់ខ្លួនជាមួយអ៊ឺរ៉ុប ដោយងាកទៅឱបរឹតជាមួយរុស្ស៊ីវិញ។ ជម្រើសរបស់លោកប្រមុខរដ្ឋអ៊ុយក្រែនអ៊ីយ៉ានូកូវិកកាលណោះមកពីលោកយល់ថា ការដាក់ទុនរកស៊ីជាមួយរុស្ស៊ីនឹងអាចផ្តល់ផលចំណេញច្រើនជាងអឺរ៉ុប។ តែគេក៏មិនត្រូវភ្លេចនិយាយទេថា គឺប្រហែលជារឿងប្រវត្តិសាស្រ្តដែលបានបង្ខំឲ្យលោកអ៊ីយ៉ានូកូវិកសម្រេចយ៉ាងដូច្នោះ ព្រោះចូរកុំភ្លេចថា អ៊ុយក្រែនជាអតីតសាធារណរដ្ឋក្នុងជំនាន់សហភាពសូវៀត និងដែលរុស្ស៊ីសម័យលោកពូទីនមិនចង់ឃើញអតីតកូនចៅរបស់ខ្លួនណាមួយរត់ទៅរកស្នេហាជាមួយអ្នកផ្សេងទេ ពិសេសអ្នកដែលរុស្ស៊ីពិបាកនិយាយស្តាប់គ្នា ដូចករណីសហភាពអឺរ៉ុបសព្វថ្ងៃ។
គួរជម្រាបជូនថា មានអតីតរដ្ឋក្នុងសម័យសហភាពសូវៀតជាច្រើនដែលបានក្លាយជារដ្ឋឯករាជ្យសព្វថ្ងៃ ដូចករណីអ៊ុយក្រែន តែត្រូវបានរស្ស៊ីក្នុងសម័យលោកពូទីនព្យាយាមអូសទាញឲ្យចូលជាមួយខ្លួនតាមរយៈការបង្កើតសហភាពពន្ធដារ។ គឺទង្វើរបស់លោកប្រមុខរដ្ឋរុស្ស៊ីពូទីននេះហើយដែលបានធ្វើឲ្យអ៊ុយក្រែនធ្លាក់ក្នុងវិបត្តិនយោបាយមួយយ៉ាងជ្រៅនៅពេលនេះ។
រុស្ស៊ីកំពុងបន្តដាក់គំនាបលើអឺរ៉ុប និងអ៊ុយក្រែន
សម្រាប់ប្រទេស និងប្រជាជនអ៊ុយក្រែនភាគច្រើនគឺច្បាស់ណាស់ កិច្ចព្រមព្រៀងដែលអឺរ៉ុប និងអ៊ុយក្រែនទើបឲ្យសច្ចាប័នថ្ងៃនេះ ពិតជាជោគជ័យមួយដែលខ្លួនបានរង់ចំាអស់ជាយូរមកហើយ ដោយគេយល់ថា ជោគវាសនាអនាគតរបស់ប្រទេសអ៊ុយក្រែនត្រូវតែឆ្លងកាត់តាមទំនាក់ទំនងជាមួយសហភាពអឺរ៉ុប គឺមិនមែនជាមួយប្រទេសរុស្ស៊ីដែលជាអតីតអាណាព្យាបាល។ រីឯលោកប្រធានាធិបតីអ៊ុយក្រែនប៉េត្រូ ប៉ូរ៉ូឆេនកូដែលជាអ្នកនិយមអឺរ៉ុបមិនញញើតនឹងបានចាត់ទុកជាព្រឹត្តិការណ៍ប្រវត្តិសាស្រ្តមួយសម្រាប់ប្រទេសអ៊ុយក្រែនទំាងមូល។ ចំណែកប្រទេសរុស្ស៊ីឯណោះ នេះពិតជាព្រឹតិ្តការណ៍មួយដែលលោកពូទីនមិនអាចសម្តែងការត្រេកត្រអាលទេ។ តែក៏គេមិនអាចថា ជារឿងបរាជ័យសម្រាប់ក្រុងម៉ូស្គូដែរ ព្រោះថា កិច្ចព្រមព្រៀងដែលសភាអឺរ៉ុប និងសភាអ៊ុយក្រែនឲ្យសច្ចាប័នព្រមគ្នាថ្ងៃនេះមានពីរផ្នែក គឺផ្នែកនយោបាយ និងផ្នែកសេដ្ឋកិច្ចដោយទាក់ទងជាពិសេសលើការដោះដូរពាណិជ្ជកម្មដោយសេរីរវាងសហភាពអឺរ៉ុប និងអ៊ុយក្រែន។
នៅក្នុងផ្នែកទំាងពីរនេះ គឺមានតែកិច្ចព្រមព្រៀងនយោបាយទេដែលនឹងត្រូវចូលជាធរមាននៅប៉ុន្មានសប្តាហ៍ខាងមុខក្រោយពីឲ្យសច្ចាប័នរួច។ ចំណែកកិច្ចព្រមព្រៀងសេដ្ឋកិច្ចដែលតាមគម្រោងត្រូវចូលជាធរមាននៅថ្ងៃទី១ វិច្ឆិកាខាងមុខត្រូវបានភាគីរុស្ស៊ី អ៊ុយក្រែន និងអឺរ៉ុបសម្រេចដាក់ឲ្យចូលជាធរមាននៅដំណាច់ឆ្នំា ២០១៥ ឯណោះ។ នេះក៏ដោយសារតែមានការដាក់គំនាបពីរុស្ស៊ីដែលចង់បន្តកិច្ចចរចាជាមួយអឺរ៉ុបជាបន្តទៀត។ តែក្នុងពេលរង់ចំា អ៊ុយក្រែនអាចបន្តទទួលការបញ្ចុះតម្លៃពន្ធដារលើផលិតផលរបស់ខ្លួនដែលនំាចូលទៅក្នុងទីផ្សារអឺរ៉ុប។ ឃើញថា ស្ស៊ីនៅតែមានប្រៀបជាងអឺរ៉ុប និងអ៊ុយក្រែនតែដដែល ព្រោះថា គឺកិច្ចព្រមព្រៀងពាណិជ្ជកម្មរវាងអ៊ុយក្រែន និងអឺរ៉ុបនេះឯងដែលទីក្រុងម៉ូស្គូជំទាស់ខ្លំាងជាងគេ។ អ៊ីចឹងហើយបានជាមានថ្នាក់ដឹកនំាអឺរ៉ុបខ្លះបញ្ចេញប្រតិកម្មរិះគន់ ទិតៀនអឺរ៉ុបថា អឺរ៉ុបបានទុកបណ្តោយឲ្យរុស្ស៊ីបង្វិលក្បាលស្រេចតែនឹងចិត្ត និងថា នៅក្រោយឆ្នំា ២០១៥ រុស្ស៊ីនឹងអាចសុំបន្តពន្យាពេលចរចាបន្ថែមទៀតក៏អាចថាបាន។
សភាអ៊ុយក្រែនពិនិត្យគម្រោងច្បាប់ស្តីពីការលើកលែងទោស និងការផ្តល់លក្ខន្តិកពិសេសឲ្យតំបន់ប៉ែកខាងកើត
គម្រោងច្បាប់ទំាងពីរនេះត្រូវបានស្នើឡើងដោយលោកប្រធានាធិបតីអ៊ុយក្រែនប៉េត្រូ ប៉ូរ៉ូឆេនកូ និងសម្រាប់អនុវត្តន៍តែនៅក្នុងតំបន់ប៉ែកខាងកើតដែលកំពុងទទួលរងការបះបោរទាមទារផ្តាច់ទឹកដីនិយម។ ច្បាប់លើកលែងទោស គឺសម្រាប់តែជនបះបោរណាដែលគ្មានបាតដៃប្រឡាក់ឈាម និងអ្នកដែលបានយល់ព្រមចុះចូលជាមួយរដ្ឋាភិបាលអ៊ុយក្រែន។ តែចំពោះអ្នកដែលបានសម្លាប់មនុស្ស រំលោភលើរាងកាយអ្នកដទៃ ឬប្រព្រឹត្តិទង្វើភេរវនិយមនឹងមិនអាចទទួលការលើកលែងទោសដោយច្បាប់នោះទេ។ មួយវិញទៀត ជនដែលបានបាញ់ទម្លាក់យន្តហោះម៉ាឡេស៊ីបណ្តាលឲ្យស្លាប់មនុស្ស ២៩៨នាក់ក៏គ្មានសិទ្ធិរួចទោសដែរ។
ទាក់ទងនឹងគម្រោងច្បាប់ផ្តល់លក្ខន្តិកពិសេសឲ្យតំបន់ប៉ែកខាងកើត លោកប្រមុខរដ្ឋអ៊ុយក្រែនចង់បង្កើតឲ្យមានរដ្ឋាភិបាលស្វ័យ័តបណ្តោះអាសន្នមួយ។ តែពួកអ្នកប្រឆំាងចង់បានឯករាជ្យផ្តាច់ចេញពីការគ្រប់គ្រងរបស់ទីក្រុងគៀវ។ គម្រោងបង្កើតច្បាប់ទំាងពីរខាងលើនេះត្រូវបានរៀបចំឡើង នៅក្រោយការចុះហត្ថលេខាលើកិច្ចព្រមព្រៀងឈប់បាញ់កាលពីថ្ងៃទី ៥ កញ្ញា និងក្នុងបំណងតែមួយគត់ គឺបិទបញ្ចប់វិបត្តិដែលបានបណ្តាលឲ្យមនុស្សស្លាប់ជិត ៣ ០០០នាក់ក្នុងរយៈពេលជាង ៥ខែកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ