វិបត្តិអ៊ុយក្រែន៖ បទឈប់បាញ់បានរលាយដូចផ្សែង
ចុះផ្សាយនៅថ្ងៃ៖
ស្តាប់ - ០៤:៣៨
បទឈប់បាញ់រវាងកងទ័ពរដ្ឋាភិបាលអ៊ុយក្រែន និងពួកឧទ្ទាមបះបោរនិយមរុស្ស៊ី បានចូលជាធរមាន មិនទាន់ទាំងបានមួយថ្ងៃស្រួលបួលផង នៅព្រឹកថ្ងៃអាទិត្យនេះ មានដំណឹងផ្តល់ឲ្យថា ភាគីទាំងពីរបានចាប់ផ្តើមបាញ់តបតគ្នាឡើងវិញ នៅតំបន់ក្រុង ដូនែតស្ក៍ និង ក្រុងមួយទៀត នៅភាគខាងត្បូងអ៊ុយក្រែន ជាប់មាត់សមុទ្រខ្មៅ ឈ្មោះ ក្រុងម៉ារីយោប៉ូល។
គ្រាប់កាំភ្លើងផ្ទុះសាជាថ្មីនៅ ដូនែតស្ក៍ និង ម៉ារីយោប៉ុល៖
បទឈប់បាញ់ដែលលោកប៉េត្រូ ប៉ូរ៉ូឆិនកូន បានចុះហត្ថលេខា កាលពីថ្ងៃសុក្រជាមួយពួកឧទ្ទាមផ្តាច់ទឹកដី បានចូលជាធរមាននៅល្ងាចថ្ងៃដដែល។ ប៉ុន្តែតាមការផ្តល់ពត៌មានចុងក្រោយ បទឈប់បាញ់នេះ បានត្រូវភាគីទាំងពីរគោរពមិនបានមូយថ្ងៃផង ព្រោះគ្រាប់បែក គ្រាប់កាំភ្លើងបានចាប់ផ្តើមផ្ទុះសាជាថ្មី។ នៅក្បែរព្រលានយន្តហោះ ក្រុងដូនែតស្ក៍ គេបានឃើញផ្សែងខ្មៅខ្មួលខ្មាញ់ នៅព្រឹកថ្ងៃអាទិត្យនេះ។ ប្រជាជនក្បែរនោះ ក៏បានឮសូរសំឡេងគ្រាប់កាំភ្លើងធំ ជាច្រើនគ្រាប់ ផ្ទុះនៅក្បែរនោះដែរ។ ព្រលានយន្តហោះក្រុងដូនែតស្ក៍ គឺស្ថិតក្រោមការកាន់កាប់របស់ទាហានរដ្ឋាភិបាលអ៊ុយក្រែន ឯចំណែកទីក្រុងដូនែតស្ក៍ ជាទីតាំងរបស់ពួកឧទ្ទាម។ អញ្ចឹងមានន័យថា គឺច្បាស់ជាពួកឧទ្ទាមហើយ ដែលបានបាញ់កាំភ្លើងធំ សំដៅទីតាំងទ័ពរដ្ឋាភិបាលអ៊ុយក្រែន។
ដូចគ្នាដែរ នៅក្រុងម៉ារីយោប៉ូល ដែលស្ថិតនៅជាប់មាត់សមុទ្រខ្មៅ ដែលទីក្រុងយុទ្ធសាស្រ្តសំខាន់មួយទៀតរបស់ពួកឧទ្ទាម ក៏មានការប្រឈមមុខគ្នាជាថ្មីដែរ រវាងភាគីទាំងពីរ កាលពីយប់ថ្ងៃសៅរ៍។ ប្រជាជនដែលរស់នៅក្បែរនោះ បានចេញពីកន្លែងពួននៅព្រឹកថ្ងៃអាទិត្យ បានសង្កេតឃើញ ស្នាមបន្សល់ទុកពីការបាញ់តទល់គ្នា រវាងពួកឧទ្ទាម និង កងទ័ពអ៊ុយក្រែន។ រហូតដល់ព្រឹកថ្ងៃអាទិត្យ កន្លែងខ្លះ ដែលបានផ្ទុះឆេះ នៅមិនទាន់រលត់ផង។ អ្នកស្រុកបានអះអាងថា ពួកឧទ្ទាមបានបាញ់រះ សំដៅទៅលើកងទ័ពអ៊ុយក្រែន ដែលឈរជើងនៅច្រកត្រួតពិនិត្យការចេញចូលក្បែរកំពង់ផែ។ អជ្ញាធរក្រុងម៉ារីយោប៉ូល បានផ្តល់ដំណឹងថា មានស្រី្តម្នាក់បានស្លាប់ និងមនុស្សបីនាក់ផ្សេងទៀត រងរបួសធ្ងន់ដោយសាគ្រាប់កាំភ្លើង។
កិច្ចព្រមព្រៀងឈប់បាញ់ដែលគ្មានន័យហើយអ៊ុយក្រែន បាក់ស្រុតក្រោមអំណាចរបស់ពូទីន៖
តាមពិតទៅ តាំងពីដំបូងម្លេះ គ្មាននរណាទុកចិត្តទេ ថាបទឈប់បាញ់ ទំលាក់អាវុធនឹង នឹងត្រូបានគោរព។ ទាំងសហភាពអឺរ៉ុប សហរដ្ឋអាមេរិក និងអង្គការអូតង់ ម្នាក់ៗសុទ្ធសឹងតែបាន ត្រៀមជើងព្រួល ជាស្រេចក្នុងករណី ដែលនៅតែមាន ការប្រយុទ្ធគ្នា។ មហិច្ឆិតារបស់រុស្ស៊ី និងពួកឧទ្ទាមផ្តាច់ទឹកដី មិនមែនចប់ត្រឹមហ្នឹងទេ។ ពួកឧទ្ទាមបាននិយាយហើយថា ពួកគេចុះហត្ថលេខាលើបទឈប់បាញ់ តែមិនមែនមានន័យថា ពួកគេឈប់ទាមទារផ្តាច់ទឹកដីទេ។ ឈ្មោះថាបទឈប់បាញ់មែនពិត តែការពិត វាដូចការចុះហត្ថលេខាសុំចុះចាញ់របស់អ៊ុយក្រែនអញ្ចឹង។ អ៊ុយក្រែនគ្មានជម្រើសអី ក្រៅតែពីទទួលយកបទឈប់បាញ់ទេ ព្រោះថាទាហានខ្លួន បាក់កំម្លាំង ខ្វះសព្វខ្វះគ្រប់ គ្មានជំរើសអ្វីក្រៅតែពីដកថយនោះទេ។
មួយវិញទៀត វាសបង្ហាញឲ្យឃើញកាន់តែច្បាស់ អំពីអំណាច របស់លោកពូទីន ទៅលើពួកបះបោរ។ គ្រាន់តែពូទីនថាឲ្យធ្វើដាក់អាវុធ ពួកនេះដាក់អាវុធភ្លាម។ លោកពូទីនដែលតែងតែនិយាយថា វិបត្តិនៅអ៊ុយក្រែនជារឿងផ្ទៃក្នុងអ៊ុយក្រែន គ្មានអ្វីទាក់ទងនឹងរុស្ស៊ីទេ តែដល់ទៅទីបំផុត អ្នកណាដែលមកចាត់ចែង ដាក់លក្ខខណ្ឌផ្សេងៗ ឲ្យមានបទឈប់បាញ់ គឺពូទីន។ កាលពីខែកក្កដា បើសិនជាគ្មានជំនួយពីទាហាន និងអាវុធរបស់រុស្ស៊ី ម្លេះទាហានរដ្ឋាភិបាលអ៊ុយក្រែនកាន់កាប់ដែនដីមួយភាគធំមកវិញហើយ។ រុស្ស៊ីបញ្ជូនទាំងរថក្រោះ ទាំងទាហានចូលទៅជួយពួកឧទ្ទាមយ៉ាងគគ្រឹកគគ្រេង។ បើតាមការវិភាគ រុស្ស៊ីជ្រុលលូកដៃប៉ុណ្ណេះហើយ លោកពូទីនមិនអាចបណ្តោយឲ្យអ៊ុយក្រែនរបូតពីដៃបានទេ។ រុស្ស៊ីនឹងជួយពួកឧទ្ទាមដល់ទីបំផុត រហូតទាល់តែអ៊ុយក្រែនអស់ជម្រើស ព្រមកាត់ទឹកដីភាគខាងកើតចោលឲ្យពួកឧទ្ទាម។
សាមគ្គីគ្នាដើម្បី ទប់ទល់ជាមួយកល្បិចរុស្ស៊ី៖
អង្គការអូតង់ បានសម្រេចផ្តល់ប្រាក់១៥លានអឺរ៉ូ ជួយទាហានអ៊ុយក្រែន មិនត្រឹមតែប៉ុណ្ណោះ កងទ័ពសម្ពន័្ធមិត្តរបស់អង្គការអូតង់បានចាប់ផ្តើមធ្វើសមយុទ្ធ នៅតាមប្រទេសក្បែរអ៊ុយក្រែន ដូចជាប៉ូឡូញ និងអាល្លឺម៉ង់។ សមយុទ្ធយោធានេះ សំដៅដោយចំៗ ទៅដល់រុស្ស៊ី ថាបើហ៊ានបំពានប្រទេសសមាជិកអូតង់ អូតង់នឹងតបត។ សហភាពអឺរ៉ុបវិញ បានសន្យាថានឹងដាក់ទណ្ឌកម្មសេដ្ឋកិច្ចថ្មីបន្ថែម លើរុស្ស៊ី ចាប់ពីថ្ងៃចន្ទស្អែកនេះ។ តែអ្វីៗវាស្ថិតលើការសម្រេចចិត្តរបស់ប្រទេសសមាជិករបស់អឺរ៉ុប។
លោកបារ៉ាក់អូបាម៉ា បាននិយាយហើយនិយាយទៀត ថាប្រយត្ន័ធា្លក់ចូលអន្ទាក់របស់រុស្ស៊ីរបស់លោកពូទីន ដែលកំពុងតែស្រេកឃ្លានពង្រីកឥទ្ធិពល។ ចង់រឺមិនចង់ ក្នុងកាលៈទេសៈនេះ គ្រប់គ្នាត្រូវបង្ហាញពីគោលជំហរសាមគ្គីភាព ដើម្បីទប់ទល់ជាមួយរុស្ស៊ី ព្រោះថាថ្ងៃនេះ រុស្ស៊ីឈ្លានពានអ៊ុយក្រែន ថ្ងៃស្អែកថាមិនត្រូវរុស្ស៊ីនឹងត្របាក់ប្រទេសអ៊ឺរុបណាមួយផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ