ចិននិងរុស្ស៊ីសន្យាកាន់ដៃគ្នាប្រយុទ្ធប្រឆាំងនឹងហានិភ័យមកពីក្រៅ
“ចិន-រុស្ស៊ី ត្រូវពង្រឹងទំនាក់ទំនងទ្វេភាគី និងពួតដៃគ្នាប្រឈមនឹងហានិភ័យពីក្រៅ”។ នេះជាប្រសាសន៍របស់លោកប្រធានាធិបតីចិន ស៊ីជីនពីង នាឱកាសជួបពិភាក្សាជាមួយសមភាគីរុស្ស៊ី លោកពូទីន នៅល្ងាចមិញ។ តើគ្រោះមកក្រៅជាអ្វី ?! តើសំដៅលើក្រុមបស្ចឹមលោកឬ ? ការប្រកាសរឹតចំណងទំនាក់ទំនងចិន-រុស្ស៊ី ធ្លាក់មកជួនចំពេលដែលទណ្ឌកម្មរបស់សហភាពអឺរ៉ុបប្រឆាំងនឹងរុស្ស៊ីបានអនុម័តឱ្យចូលជាធរមានចាប់ពីព្រឹកថ្ងៃសុក្រទី ១២កញ្ញា ២០១៤ តទៅ។ ដោយហេតុតែវិបត្តិអ៊ុយក្រែន ម៉ូស្គូនិងប៉េកាំង បានខិតរកគ្នាគួរឱ្យកត់សម្គាល់នៅឆ្នាំនេះ ជាពិសេសលើផ្នែកសេដ្ឋកិច្ចនិងពាណិជ្ជកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
គិតចាប់ពីឆ្នាំ២០១៤មក នេះជាលើកទីបួនហើយដែលប្រធានាធិបតីចិននិងរុស្ស៊ី បានជួបពិភាក្សាគ្នាមួយទល់នឹងមួយ។ ជំនួបដែលបានពន្លឿនទំនាក់ទំនងពាណិជ្ជកម្មចិន-រុស្ស៊ី ឱ្យខិតជិតគ្នា និងជំរុញសម្រេចបាននូវកិច្ចសន្យាពាណិជ្ជកម្មធំៗ សំខាន់ៗ ដូចយ៉ាងកិច្ចសន្យាក្នុងវិស័យថាមពល។
“ប្រទេសទាំងពីរត្រូវតែគាំទ្រគ្នា និងបើកចិត្តជួយគ្នា ទៅវិញទៅមកឱ្យបានប្រសើរឡើង ដើម្បីពង្រឹងការអភិវឌ្ឍន៍ និងទប់ទល់គ្រោះហានិភ័យមកពីក្រៅ”។ នេះជាការអះអាង របស់ប្រធានាធិបតីចិន លោកស៊ីជិនពីង ទៅកាន់សមភាគី ក្នុងជំនួប ក្រៅក្របខ័ណ្ឌជំនួបកំពូលអង្គការសហប្រតិបត្តិការសៀងហៃ កាលពីថ្ងៃម្សិលមិញដែលមានប្រទេសជាអតីតសហភាពសូវៀតបួននៅអាស៊ីកណ្តាលកៀហ្ស៊ីស៊ីស្ថាន-កាហ្សាក់ស្ថាន តាហ្ស៊ីគីស្ថាន និងអ៊ូសបេគីស្ថាន ព្រមទាំងចិននិងរុស្ស៊ី ចូលរួម។
ចំណែកខាងរុស្ស៊ីវិញ បើតាមប្រភពសារព័ត៌មានចិនថ្មី លោកពូទីន បានរៀបរាប់អំពីអស្ថិរភាពតំបន់និងអន្តរជាតិ តែដោយបង្ហាញក្តីសង្ឃឹមនិងការរំពឹងលើ ចំណងមិត្តភាពមហាអំណាចទាំងពីរចិននិងរុស្ស៊ី ក្នុងការសម្រេចផែនការដ៏សំខាន់ក្នុងវិស័យថាមពលប្រេង ឧស្ម័ន និងនុយក្លេអ៊ែរ។
សូមបញ្ជាក់ថា តាំងពីវិបត្តិអ៊ុយក្រែន បានផ្ទុះឡើង រុស្ស៊ីបានចាប់តំបន់គ្រីមេមកធ្វើជារណប បស្ចឹមលោកនិងរុស្ស៊ី បានប្រឈមមុខដាក់គ្នាយ៉ាងខ្លាំង ស្ទើរដូចសម័យសង្គ្រាមត្រជាក់។ សហភាពអឺរ៉ុបបានដាក់ទណ្ឌកម្មជាបន្តបន្ទាប់ប្រឆាំងនឹងរុស្ស៊ី។ ក្រៅពីទណ្ឌកម្មលើផ្នែកកសិឧស្សាហកម្ម និងឧស្សាហកម្ម ទណ្ឌកម្មទីបីដែលទើបចូលជាធរមាននៅថ្ងៃនេះ ដៅចំលើសេដ្ឋកិច្ចរុស្ស៊ី ដោយបិទខ្ទប់ហិរញ្ញវត្ថុបំណុលរបស់ក្រុមហ៊ុនប្រេងរុស្ស៊ីធំចំនួនបី (Rosneft Transneft និងGazpromNeft សាខារបស់ក្រុមហ៊ុនប្រេងGazprom ព្រមទាំងលើវិស័យការពារជាតិ។
ក្នុងបរិបទបែបនេះ រុស្ស៊ី បានងាកទៅតម្រង់ទិសវិស័យថាមពលនៅប៉ែកអាស៊ី ពោលគឺចិននេះឯង។ កាលពីខែឧសភា ចិននិងរុស្ស៊ី បានទម្លាយកិច្ចព្រមព្រៀងក្នុងវិស័យថាមពលឧស្ម័ន ដែលអូសបន្លាយអស់ពេល១០ឆ្នាំមកហើយក្នុងតម្លៃប្រមាណ ៤០០ពាន់លានដុល្លារសម្រាប់រយៈឆ្នាំ៣០ឆ្នាំ។ កាលពីសប្តាហ៍មុន លោកពូទីន បានផ្តល់សន្ទុះថ្មីដល់ស៊ីបេរីខាងកើត ក្នុងផែនការស្ថាបនាបំពង់បង្ហូរឧស្ម័ន៤ពាន់គីឡូម៉ែត្រ ពីសាធារណរដ្ឋយ៉ាគូទី ទៅសមុទ្ទជប៉ុន និងរហូតដល់ព្រំប្រទល់ខាងកើតរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ