ទណ្ឌកម្មសេដ្ឋកិច្ចហាក់មិនបានធ្វើឲ្យរុស្ស៊ីញញើតនឹងការលេបត្របាក់យកអ៊ុយក្រែន
ចុះផ្សាយនៅថ្ងៃ៖
ស្តាប់ - ០៥:១៧
សហភាពអឺរ៉ុប និងសហរដ្ឋអាមេរិកបានបន្តដាក់ទណ្ឌកម្មសេដ្ឋកិច្ចជាបន្តបន្តាប់លើរុស្ស៊ី ដើម្បីជំរុញឲ្យរុស្ស៊ី បញ្ឈប់នូវសកម្មភាពឈ្លានពានលើទឹកដីអ៊ុយក្រែន។ ទោះបីជាយ៉ាងណា ទណ្ឌកម្មទាំងនោះ ត្រូវបានគេមើលឃើញថា មិនសូវជាមានប្រសិទ្ធិភាព ធ្វើឲ្យរុស្ស៊ីភ័យរអារនោះទេ ព្រោះថាបើសហភាពអឺរ៉ុបអាចធ្វើបាបសេដ្ឋកិច្ចរុស្ស៊ី រុស្ស៊ីក៏អាចធ្វើបាបសេដ្ឋកិច្ចរបស់ប្រទេសសមាជិកសហភាពអឺរ៉ុប វិញបានដូចគ្នា។ ប្រឈមមុខនឹងភាពក្អេងក្អាងរបស់រុស្ស៊ី នាយករដ្ឋមន្ត្រីអ៊ុយក្រែនបានថ្លែងដោយចំៗថា រុស្ស៊ីមានមហិច្ឆិតាលេបត្របាក់អ៊ុយក្រែនទាំងមូលតែម្តង។
បទឈប់បាញ់មានតែនាម គ្រាប់កាំភ្លើងនៅតែផ្ទុះ៖
ស្ថានភាពទូទៅនៅភាគខាងកើតអ៊ុយក្រែន គ្មានអ្វីប្រសើរទេ តែវាកាន់តែធ្ងន់ធ្ងរទៅៗ។ កងទ័ពទាំងពីរ នៅតែធ្វើការវាយប្រហារគ្នា ទៅវិញទៅមកដដែល។ កាលពីថ្ងៃព្រហស្បតិ៍ ពួកឧទ្ទាមបានរាយការណ៍ថា ពួកគេបានគ្រប់គ្រងដែនដីនៅតាមព្រំដែនភាគអាគ្នេយ៍អ៊ុយក្រែន រហូតដល់សមុទ្រអាហ្សូវ។ ការត្រូតត្រាតាមបណ្តោយព្រំដែនរបស់ពួកឧទ្ទាម មានន័យថា បើរុស្ស៊ីចង់បញ្ជូនទ័ព រឺអាវុធចូលបន្ថែម វារឹតតែងាយស្រួល។ ជាក់ស្តែង តាមពត៌មានផ្លូវការរបស់ទីភ្នាក់ងារពត៌មានរុស្ស៊ី បានឲ្យដឹងថា រុស្ស៊ីបានបញ្ជូនក្បួនរថយន្តចំនួនប្រមាណជា៣០០គ្រឿង បន្ថែមទៀត កាលពីថ្ងៃសុក្រ ដើម្បីចូលទៅក្នុងដីអ៊ុយក្រែន។ នៅព្រឹកថ្ងៃសៅរ៍នេះដែរ កងទ័ពរដ្ឋាភិបាលអ៊ុយក្រែនបានផ្តល់ដំណឹងថា មានការបាញ់តបតគ្នាដោយកាំភ្លើងធំ រវាងកងទ័ពរដ្ឋាភិបាល និងពួកឧទ្ទាមនិយមរុស្ស៊ី ដើម្បីកាន់កាប់ព្រលានយន្តហោះក្រុងដូនែតស្គ៍។ ជារួម កងទព័រដ្ឋាភិបាលបានរុញច្រានពួកឧទ្ទាមឲ្យដកថយទៅវិញ។
ទណ្ឌកម្មសេដ្ឋកិច្ចជាអាវុធមុខពីរ៖
ដើម្បីឆ្លើយតបទៅនឹង អំពើឈ្លានពានរបស់រុស្ស៊ី សហភាពអឺរ៉ុបបានសម្រេចដាក់បន្ថែម នូវទណ្ឌកម្មមួយចំនូនទៀត ទៅលើរុស្ស៊ី។ ទណ្ឌកម្មទាំងនោះ គឺសំដៅរឹតត្បិតការរកស៊ីរបស់ក្រុមហ៊ុនរស្ស៊ីមួយចំនូន នៅក្នុងទីផ្សារហិរញ្ញវត្ថុអឺរ៉ុប ដូចជាក្រុមហ៊ុនប្រេង និងក្រុមហ៊ុនឧស្ម័នធម្មជាតិ។ វិស័យប្រេង និងឧស្ម័នធម្មជាតិ ដែលយើងហៅថាហ្គាសហ្នឹង វាជាវិស័យចម្បងក្នុងសេដ្ឋកិច្ចរបស់រុស្ស៊ី។ ក្នុងពេលនេះ យើងមិនទាន់មានឃើញនូវលទ្ធផលជាក់ស្តែងជាផ្លែផ្កា របស់ទណ្ឌកម្មទាំងនេះទេ។ តែបើតាមយោបល់របស់អ្នកវិភាគសេដ្ឋកិច្ច អត្រាតម្លែលុយរូប របស់រុស្ស៊ីបានធ្លាក់ចុះជាគំហុក ក្នុងរយៈពេល ២-៣ ថ្ងៃចុងក្រោយនេះ។ មានន័យថា ទណ្ឌកម្មរបស់អឺរ៉ុបចាប់ផ្តើមហុចផ្លែផ្កាខ្លះហើយ។ មួយវិញទៀត ទណ្ឌកម្មដែលអឺរ៉ុបបានដាក់កាលពីលើកមុន ទាក់ទងទៅនឹងការនាំចូលទំនិញកសិកម្មរបស់អឺរ៉ុបទៅក្នុងរុស្ស៊ី ក៏បានចេញជាលទ្ធផលដែរ ដោយបានធ្វើឲ្យតម្លៃបន្លែ ផ្លែឈើ និងជាពិសេស ទំនិញដែលផលិតចេញពីទឹកដោះគោ បានកើនឡើងជាលំដាប់។ ប្រជាជនរុស្ស៊ីចាប់ផ្តើមត្អូញត្អែរហើយបានរិះគន់រដ្ឋាភិបាលរបស់លោកពូទីន។ លោកបារ៉ាក់ អូបាម៉ា បានសន្យាថា អាមេរិក ក៏នឹងដាក់ទណ្ឌកម្មទៅលើក្រុមហ៊ុនរកស៊ីប្រេង និងហ្គាសរបស់រុស្ស៊ីដែរ។
ប៉ុន្តែទោះបីជាយ៉ាងណា ភាគីរុស្ស៊ីហាក់មិនភ័យខ្លាចនឹងទណ្ឌកម្មទាំងនេះទេ។ ផ្ទុយទៅវិញ រុស្ស៊ីថា ការដាក់ទណ្ឌកម្មទាំងនេះ វានឹងរឹតតែធ្វើឲ្យគម្រោងការស្វែងរកសន្តិភាពនៅអ៊ុយក្រែន ធ្លាក់ទឹក។ រដ្ឋមន្ត្រីក្រសួងការបរទេសរុស្ស៊ីបាននិយាយថា រុស្ស៊ីនិងវាយបកទៅអឺរ៉ុបវិញ ដោយការដាក់ទណ្ឌកម្មមួយចំនួន ដូចជាការបិទដែនអាកាលរុស្ស៊ី មិនឲ្យយន្តហោះរបស់អឺរ៉ុបហោះកាត់ និងបិទការនាំចូល រថយន្តជជុះរបស់អឺរ៉ុប ជាដើម។ តែទោះយ៉ាងណា ដូចយើងដឹងស្រាប់ហើយ ថាទណ្ឌកម្មសេដ្ឋកិច្ចវាជាអាវុធមុខពីរ ដែលធ្វើបាបទាំងប្រទេសអ្នកនាំចូល ទាំងប្រទេសអ្នកនាំចេញ។ ដោយសារតែខ្លាចមានផលប៉ះពាល់ដល់សេដ្ឋកិច្ចខ្លួន ប្រទេសសមាជិកអឺរ៉ុប បានរារែកក្នុងការដាក់ទណ្ឌកម្មលើរុស្ស៊ី។
ឱបជើងអឺរ៉ុបឲ្យបានជាប់ដើម្បីការពារខ្លួន៖
សូមរំលឹកផងដែរថា ដើមហេតុវិបត្តិនៅអ៊ុយក្រែន គឺដោយសារកិច្ចព្រមព្រៀងដៃគូពិសេសមួយដែលអ៊ុយក្រែន មានគម្រោងចុះជាមួយអឺរ៉ុប។ កាលជំនាន់ដែលលោកយ៉ាណូកូវិជ្ឆនៅជាប្រធានាធិបតីអ៊ុយក្រែន រុស្ស៊ីបានផ្តល់ប្រាក់យ៉ាងសន្ធឹកសន្ធាប់ ដើម្បីទិញទឹកចិត្តរដ្ឋាភិបាលអ៊ុយក្រែន កុំឲ្យធ្វើកិច្ចព្រមព្រៀងនេះ ជាមួយអឺរ៉ុប។ ទីបំផុតបាតុកម្មប្រឆាំងរុស្ស៊ី និងរដ្ឋាភិបាលអ៊ុយក្រែនដែលរណបរុស្ស៊ីបានផ្ទុះឡើង។ រុស្ស៊ីមួរម៉ៅក្តៅប្រហាយបានពន្យុះឲ្យពួកឧទ្ទាមទាមទារបំបែកទឹកដី។ ប្រឈមមុខនឹងភាពជាក់ស្តែងពីមហិច្ឆិតារបស់រុស្ស៊ីក្នុងការក្តោបក្តាប់អ៊ុយក្រែន ឲ្យនៅក្នុងរង្វង់គ្រូសារអតីតសហភាពសូវៀត អ៊ុយក្រែនត្រូវតែស្វែងរកវិធីការពារខ្លួន ដោយងៀកទៅរកសហភាពអឺរ៉ុប ឲ្យបានកាន់តែជិត។
លោកប៉េត្រូ ប៉ូរ៉ូឆិនកូ ប្រធានាធិបតីអ៊ុយក្រែន បាននិយាយថា លោក ព្រមទាំងសភាអ៊ុយក្រែន នឹងអនុម័តកិច្ចព្រមព្រៀងពិសេសជាមួយសហភាពអឺរ៉ុប ហើយកិច្ចព្រមព្រៀងនេះ នឹងចូលជាធរមាននៅខែវិច្ឆិកា។ លោកប្រធានាធិបតីក៏បានបន្ថែមថា លោកកំពុងតែខឹតខំ ធ្វើការដើម្បីរៀបចំឲ្យអ៊ុយក្រែនទទួលបានលក្ខន្តិកៈពិសេសមួយ ការពារពីអង្គការអូតង់ មុននឹងអ៊ុយក្រែនក្លាយជាសមាជិកពេញសិទ្ធិ។
ដូចដែលលោក នាយករដ្ឋមន្ត្រីអ៊ុយក្រែនបានមានប្រសាសន៍អញ្ចឹង មហិច្ឆិតារុស្ស៊ី មិនមែន មានតែត្រឹមតំបន់គ្រីម៉េ រឺភាគខាងកើតអ៊ុយក្រែនទេ ពោលគឺរុស្ស៊ីចង់លេបត្របាក់ប្រទេសអ៊ុយក្រែនទាំងមូល និងតំបន់ដទៃទៀតដែលធ្លាប់ស្ថិតក្រោមអំណាចកុម្មុយនិស្តរបស់សហភាពសូវៀត។ មហិច្ឆិតារបស់ លោកពូទីន គឺកសាងអណាចក្រមួយ ដែលភាសារុស្ស៊ីហៅថា NOVOROSSIA ប្រែមកថា អាណាចក្ររុស្ស៊ីថ្មី ដែលមានឥទ្ធិពលប្រជែងជាមួយសហភាពអឺរ៉ុបនិងសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ