បារាំងប្រារព្ធពិធីបុណ្យជាតិ១៤កក្កដា ដោយផ្តល់កិត្តិយសដល់ទាហានអាហ្វ្រិក
ចុះផ្សាយនៅថ្ងៃ៖
ថ្ងៃនេះ គឺជាថ្ងៃបុណ្យជាតិបារាំង ១៤កក្កដា។ ជាថ្ងៃ ដែលបារាំងតែងតែប្រារព្ធធ្វើពិធីអបអរសាទរ ដោយមានក្បួនព្យុហយាត្រាយោធា នៅតាមដងវិថីដ៏ល្បីល្បាញ ឈ្មោះ Champs-Elysées ក្នុងក្រុងប៉ារីស។ នៅក្នុងពិធីព្យុហយាត្រាឆ្នាំនេះ បារាំងបានអញ្ជើញកងទ័ពអាហ្វ្រិកមកចូលរួមជាភ្ញៀវកិត្តិយស។
ថ្ងៃ១៤ កក្កដា ត្រូវបានប្រជាជនបារាំងចាត់ទុកជានិមិត្តរូប នៃការចាប់ផ្តើមបដិវត្តន៍ផ្តួលរំលំរបបរាជានិយម ព្រោះ ថ្ងៃទី១៤ កក្កដា ឆ្នាំ១៧៨៩ គឺជាថ្ងៃដែលប្រជាជនបារាំង នៅក្រុងប៉ារីស បានងើបឡើងបះបោរប្រឆាំងនឹងរបបរាជានិយម។
នៅព្រឹកថ្ងៃ១៤ កក្កដា ១៧៨៩នោះ ប្រជាជនបារាំង បាននាំគ្នាចូលទៅដណ្តើមយកកាំភ្លើងពីឃ្លាំងទុកអាវុធមួយ នៅប៉ារីស។ បានកាំភ្លើងហើយ ពួកគេក៏នាំគ្នាទៅគុក Bastille ដែលតំណាងអំណាចផ្តាច់ការរបស់ស្តេច។ ក្រុមបះបោរនេះវាយដណ្តើមបានគុក Bastille ហើយដោះលែងអ្នកទោស នៅក្នុងនោះទាំងអស់។
ថ្ងៃ១៤ កក្កដា ឆ្នាំ ១៧៨៩នោះហើយ ដែលជាចំណុចចាប់ផ្តើមនៃបដិវត្តន៍បារាំង ផ្តួលរំលំរបបរាជានិយមផ្តាច់ការ ហើយបង្កើតជារបបសាធារណរដ្ឋវិញ។ ក៏ប៉ុន្តែ រហូតដល់ឆ្នាំ១៨៨០ (ជិត១០០ឆ្នាំក្រោយមក) ទើបរដ្ឋាភិបាលសាធារណរដ្ឋបារាំងបានចេញច្បាប់មួយ កំណត់យកថ្ងៃ១៤ កក្កដា ជាថ្ងៃបុណ្យជាតិ។
ចាប់តាំងពីពេលនោះមក នៅថ្ងៃ១៤ កក្កដា រៀងរាល់ឆ្នាំ បារាំងតែងតែរៀបចំធ្វើព្យុហយាត្រាយោធា ការប្រគុំតន្រ្តី និងការបាញ់កាំជ្រួច ដើម្បីអបអរសាទរពិធីបុណ្យជាតិនេះ។
នៅក្នុងពិធីព្យុហយាត្រា នៅថ្ងៃអាទិត្យនេះ បារាំងបានអញ្ជើញទាហានអាហ្វ្រិកឲ្យដើរបើកឆាក ដើម្បីជាការបញ្ជាក់អំពីមិត្តភាព រវាងបារាំង និងបណ្តាប្រទេសអាហ្វ្រិក ជាពិសេស ដើម្បីផ្តល់កិត្តិយសដល់ទាហានអាហ្វ្រិក ដែលបានចូលរួមជាមួយទាហានបារាំង ក្នុងការវាយរំដោះតំបន់ប៉ែកខាងជើងប្រទេសម៉ាលី ពីដៃភេរវជន។
គួររំឭកឡើងវិញថា កាលពីខែមករា កន្លងទៅនេះ កងទ័ពបារាំងគឺជាអ្នកនាំមុខគេ ក្នុងប្រតិបត្តិការវាយប្រហារទៅលើក្រុមភេរវជន ដែលកាន់កាប់ប៉ែកខាងជើងប្រទេសម៉ាលី ហើយដែលព្យាយាមវាយសម្រុកឆ្ពោះមករដ្ឋធានីបាម៉ាកូ។ ដោយសារតែអន្តរាគមន៍យោធារបស់កងទ័ពបារាំង ទើបគេអាចទប់ស្កាត់ក្រុមភេរវជនមិនឲ្យវាយដណ្តើមយកបាម៉ាកូបាន ហើយថែមទាំងបានរំដោះទឹកដីប៉ែកខាងជើងរបស់ម៉ាលី ពីដៃភេរវជនមកវិញ។ អន្តរាគមន៍យោធានៅម៉ាលីនេះ ដឹកនាំដោយកងទ័ពបារាំង ក៏ប៉ុន្តែ មានប្រទេសអាហ្វ្រិកចំនួន ១២ប្រទេស ក៏បានបញ្ជូនទាហានម្នាក់បន្តិចៗមកជួយបារាំងដែរ។
ហេតុដូច្នេះហើយបានជាបារាំងអញ្ជើញកងទ័ពម៉ាលី រួមជាមួយនឹងកងទ័ពមកពីប្រទេសអាហ្វ្រិក ទាំង ១២ប្រទេសនេះ មកចូលរួមក្នុងពិធីព្យុហយាត្រាថ្ងៃនេះ។ ក្រៅពីទាហាននៅក្នុងក្បួនព្យុហយាត្រា បារាំងក៏បានអញ្ជើញមេដឹកនាំប្រទេសអាហ្វ្រិកទាំងអស់នេះ បូករួមជាមួយនឹងលោកអគ្គលេខាធិការអ.ស.ប បាន គីមូន ផងដែរ ឲ្យធ្វើជាភ្ញៀវ នៅលើវេទិកាកិត្តិយសជាមួយលោកហ្វ្រង់ស័រ ហូឡង់។
តាមពិត ការអញ្ជើញកងទ័ពអាហ្វ្រិកឲ្យមកចូលរួមក្នុងពិធីព្យុហយាត្រានេះ ក្រៅពីចង់ផ្តល់កិត្តិយសដល់ប្រទេសដែលចូលរួមក្នុងប្រតិបត្តិការរំដោះម៉ាលី និងបង្ហាញពីការផ្តល់តម្លៃទៅលើមិត្តភាពបារាំង-អាហ្វ្រិក នៅមានគោលដៅសំខាន់មួយទៀត គឺចង់បង្ហាញដល់ប្រជាជនបារាំង អំពីតួនាទីរបស់កងទ័ពបារាំង នៅលើឆាកអន្តរជាតិ ពីព្រោះថា អន្តរាគមន៍យោធានៅក្រៅប្រទេស ដែលមានកងទ័ពបារាំងជាអ្នកនាំមុខ ដូចជាករណីនៅម៉ាលីនេះ គឺជារឿងដ៏កម្របំផុត ហើយវាជាប្រតិបត្តិការយោធា ដែលសហគមន៍អន្តរជាតិនាំគ្នាលើកសរសើរស្ទើរតែគ្រប់គ្នា។ ដូច្នេះវាជាមោទនភាពមួយសម្រាប់កងទ័ពបារាំង និងសម្រាប់ប្រជាជនបារាំងទូទៅ។
សម្រាប់លោកហ្វ្រង់ស័រ ហូឡង់ ជោគជ័យនៃប្រតិបត្តិការយោធានៅម៉ាលីនេះ កាន់តែមានសារៈសំខាន់ទៅទៀត ក្នុងនាមលោកជាប្រធានាធិបតី និងជាអគ្គមេបញ្ជាការកងទ័ពបារាំង ពីព្រោះថា ចាប់តាំងពីចូលកាន់តំណែងជាប្រធានាធិបតីបារាំងមក លោកហ្វ្រង់ស័រ ហូឡង់ ដូចជាមិនបានបញ្ចេញស្នាដៃអ្វីធំដុំ ជាជោគជ័យដែលអាចយកមកបង្អួតប្រជាជនបារាំងបានទេ។ បញ្ហាសេដ្ឋកិច្ចក៏ដោះស្រាយមិនបាន។ សេដ្ឋកិច្ចមានកំណើនតិចតួច ឬក៏គ្មានកំណើនសោះ។ ចំណែកឯអត្រាអ្នកអត់ការងារធ្វើវិញខ្ពស់កប់ពពក។ មានតែអន្តរាគមន៍យោធានៅម៉ាលីនេះឯងដែលជាជោគជ័យដ៏កម្រ ដែលលោកហូឡង់ អាចយកមកបង្អួតប្រជាជនបារាំងបាន ជាពិសេស ក្នុងពេលបច្ចុប្បន្ននេះ ដែលប្រជាប្រិយភាពរបស់លោកកំពុងតែធ្លាក់ចុះដុនដាបខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ