បារាំងវាយកាន់កាប់ក្រុងសំខាន់ចុងក្រោយរបស់ក្រុមឧទ្ទាមនៅខាងជើងម៉ាលី
កាលពីថ្ងៃពុធម្សិលមិញ កងទ័ពបារាំងបានចូលកាន់កាប់ទីក្រុង Kidal ដែលជាទីក្រុងសំខាន់ និងចុងក្រោយរបស់ក្រុមឧទ្ទាម នៅប៉ែកខាងជើងប្រទេសម៉ាលី។ គិតមកត្រឹមពេលនេះ រាល់ទីក្រុងធំៗរបស់ម៉ាលីទាំងអស់ ត្រូវបានកងទ័ពបារាំង និងកងទ័ពម៉ាលី វាយដណ្តើមកាន់កាប់។ ចំណែកក្រុមឧទ្ទាមអ៊ីស្លាមជ្រុលនិយមបាននាំគ្នារត់គេច ទៅលាក់ខ្លួន នៅតំបន់ភ្នំ និងវាលខ្សាច់។ ប្រតិបត្តិការយោធាជំហានទី១ ត្រូវបញ្ចប់ ហើយបារាំងបានអំពាវនាវឲ្យរដ្ឋាភិបាលម៉ាលីចាប់ផ្តើមចរចាជាមួយក្រុមឧទ្ទាម ដើម្បីស្វែងរកដំណោះស្រាយជម្លោះតាមផ្លូវនយោបាយ។
ចុះផ្សាយនៅថ្ងៃ៖
ស្តាប់ - ០២:១៣
កងទ័ពបារាំងបានចូលកាន់កាប់ទីក្រុង Kidal កាលពីថ្ងៃពុធម្សិលមិញ។ ក៏ប៉ុន្តែ ករណី Kidal នេះ ខុសពីនៅតាមទីក្រុងមុនៗ ដោយហេតុថា ក្រុងមួយនេះមិនស្ថិតក្រោមការកាន់កាប់របស់ក្រុមអ៊ីស្លាមជ្រុលនិយម ស្និទ្ធនឹងអាល់កៃដានោះទេ។ គឺក្រុមឧទ្ទាម MNLA ដែលមិនមែនជាក្រុមអ៊ីស្លាមជ្រុលនិយម ដែលបានវាយដណ្តើមយកក្រុង Kidal ពីក្រុមអ៊ីស្លាមជ្រុលនិយម កាលពីសប្តាហ៍មុន។
ក្រុម MNLA នេះ បានសន្យាថានឹងជួយទាហានបារាំង ដើម្បីប្រយុទ្ធប្រឆាំងនឹងក្រុមភេរវជនអ៊ីស្លាមជ្រុលនិយម ប៉ុន្តែ បានទាមទារកុំឲ្យកងទ័ពម៉ាលីធ្វើដំណើរចូលមកក្នុងក្រុង Kidal នេះ។ ហេតុដូច្នេះហើយបានជា កាលពីម្សិលមិញនេះ មានតែកងទ័ពបារាំងប៉ុណ្ណោះ ដែលចូលទៅក្នុងក្រុង Kidal ដោយមិនមានការប៉ះប្រយុទ្ធគ្នាណាមួយ ជាមួយនឹងក្រុមឧទ្ទាម MNLA នោះទេ។
គួររំឭកឡើងវិញថា ក្រុមឧទ្ទាម MNLA នេះ ប្រយុទ្ធទាមទារឯករាជ្យ នៅក្នុងតំបន់ខាងជើងប្រទេសម៉ាលី ក៏ប៉ុន្តែ មិនចង់យកច្បាប់អ៊ីស្លាមប្រកាន់តឹងយកមកអនុវត្ត ដូចជាពួកឧទ្ទាមជ្រុលនិយមអានសារឌីន (Ansar Dine) នោះទេ។
នៅថ្ងៃពុធម្សិលមិញនេះ បារាំងបានអំពាវនាវឲ្យអាជ្ញាធរម៉ាលី បើកការចរចាជាមួយនឹងក្រុមឧទ្ទាមណា ដែលមិនមែនជាក្រុមភេរវជន ហើយដែលគោរពបូរណភាពទឹកដីម៉ាលី ដើម្បីស្វះស្វែងរកដំណោះស្រាយបញ្ចប់ជម្លោះតាមផ្លូវនយោបាយ។
នៅក្នុងបទសម្ភាសន៍ជាមួយវិទ្យុបារាំងអន្តរជាតិ នៅថ្ងៃព្រហស្បតិ៍នេះ លោក Dioncounda Traoré ប្រធានាធិបតីស្តីទីរបស់ម៉ាលី បានប្រកាសថា ក្រុមឧទ្ទាម ដែលរដ្ឋាភិបាលអាចចរចាជាមួយបាន គឺមានតែក្រុម MNLA នេះមួយតែប៉ុណ្ណោះ។ ចំណែកក្រុមអ៊ីស្លាមជ្រុលនិយម អានសារឌីន ព្រមទាំងក្រុមឧទ្ទាមអ៊ីស្លាមជ្រុលនិយមផ្សេងទៀត គឺជាក្រុមភេរវជន ដែលរដ្ឋាភិបាលម៉ាលីមិនអាចចរចាជាមួយបានជាដាច់ខាត។
រដ្ឋាភិបាលបារាំង និងរដ្ឋាភិបាលម៉ាលី ក៏បានធ្វើការអំពាវនាវផងដែរ ដល់ទាហាន និងប្រជាជនម៉ាលី កុំឲ្យធ្វើការសងសឹកចំពោះសហគមន៍ Touareg នៅប៉ែកខាងជើងប្រទេសម៉ាលី។
និយាយពីប្រតិបត្តិការយោធាវិញ ជាមួយនឹងការវាយកាន់កាប់ទីក្រុង Kidal ម្សិលមិញនេះ បេសកកម្មដំណាក់កាលទីមួយ របស់កងទ័ពបារាំង និងម៉ាលី ត្រូវបានបញ្ចប់ ក៏ប៉ុន្តែ នៅសល់ដំណាក់កាលមួយទៀត គឺការតាមប្រមាញ់ក្រុមភេរវជន ដែលនៅពេលនេះ បាននាំគ្នារត់ទៅលាក់ខ្លួន នៅតាមតំបន់វាលខ្សាច់ និងតំបន់ភ្នំ នៅព្រំដែនខាងជើង ជាប់នឹងប្រទេសអាល់ហ្សេរី។ យោងតាមអ្នកជំនាញខាងយុទ្ធសាស្រ្តទ័ពបារាំង ប្រតិបត្តការយោធា នៅដំណាក់កាលទី២នេះ គឺជាប្រតិបត្តិការដ៏ស្មុគស្មាញ ហើយអាចត្រូវការពេលវេលាយូរ មិនខុសពីការតាមប្រមាញ់ប៊ិនឡាដិន នៅតំបន់ភ្នំ ក្បែរព្រំដែនអាហ្វហ្កានីស្ថាន និងប៉ាគីស្ថាន កាលពីក្នុងអំឡុងឆ្នាំ២០០១ប៉ុន្មានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ