ស្វែងយល់ពីវិបត្តិនៅម៉ាលីដែលជំរុញឲ្យមានអន្តរាគមន៍យោធារបស់បារាំង
កងទ័ពបារាំងបានចូលធ្វើអន្តរាគមន៍ នៅក្នុងប្រទេសម៉ាលី តាំងពីថ្ងៃសុក្រ ដើម្បីជួយដល់កងទ័ពរដ្ឋាភិបាលម៉ាលី ទប់ទល់នឹងក្រុមភេរវជនអ៊ីស្លាម ដែលចង់ប្រែក្លាយប្រទេសម៉ាលី ទៅជារដ្ឋអ៊ីស្លាម ដូចកាលពីពួកតាលីបង់ធ្លាប់ធ្វើ នៅអាហ្វហ្កានីស្ថាន។ ទាហានមកពីបណ្តាប្រទេសនៅអាហ្វ្រិក ប្រមាណជា ២ពាន់នាក់ នឹងត្រូវដាក់ពង្រាយនៅម៉ាលី នៅក្នុងរយៈពេលប៉ុន្មានថ្ងៃខាងមុខទៀតនេះ។ ការដាក់ពង្រាយកងកម្លាំងអន្តរជាតិនេះ គឺធ្វើឡើង នៅក្នុងក្របខ័ណ្ឌសេចក្តីសម្រេចរបស់ក្រុមប្រឹក្សាសន្តិសុខអ.ស.ប.។
ចុះផ្សាយនៅថ្ងៃ៖
ស្តាប់ - ០២:៤០
វិបត្តិនៅក្នុងប្រទេសម៉ាលី នៅក្នុងពេលបច្ចុប្បន្ននេះ គឺជាជម្លោះប្រដាប់អាវុធ រវាងម្ខាងកងទ័ពរដ្ឋាភិបាលម៉ាលី និងម្ខាងទៀត ឧទ្ទាមទាមទារផ្តាច់ដែនដីភាគខាងត្បូងម៉ាលី ដែលហៅកាត់តាមភាសាបារាំងថា MNLA (Mouvement national pour la libération de l’Azawad) រួមដៃគ្នាជាមួយនឹងក្រុមភេរវជនដែលមានឈ្មោះថា អានសារឌីន (Ansar Dine) ដែលជាក្រុមស្និទ្ធិនឹងអាល់កៃដាប្រចាំអាហ្វ្រិកខាងត្បូង ហើយដែលមានគោលដៅបង្កើតជារដ្ឋអ៊ីស្លាមនៅម៉ាលី ដូចដែលពួកតាលីបង់ធ្លាប់ធ្វើនៅក្នុងប្រទេសអាហ្វហ្កានីស្ថាន កាលពីមុនភេរវកម្ម ១១ កញ្ញា ឆ្នាំ២០០១។
ការវាយប្រយុទ្ធគ្នាបានចាប់ផ្ទុះឡើង នៅប៉ែកខាងជើងប្រទេសម៉ាលី កាលពីខែមករា ឆ្នាំ២០១២កន្លងទៅ។ នៅខែមីនា ក្នុងពេលកំពុងប្រឈមមុខនឹងក្រុមឧទ្ទាម និងក្រុមភេរវជនអ៊ីស្លាម រដ្ឋាភិបាលម៉ាលីស្រាប់តែត្រូវប្រឈមមុខនឹងវិបត្តិមួយទៀត ដែលជាវិបត្តិផ្ទៃក្នុង ដោយកងទ័ពម៉ាលីបានធ្វើរដ្ឋប្រហារទម្លាក់ប្រធានាធិបតី ហើយច្បាមយកអំណាចមកកាន់កាប់។
ឆ្លៀតក្នុងពេលកងកម្លាំងរដ្ឋាភិបាលកំពុងស្ថិតក្នុងភាពចលាចល ដោយការប្រជែងដណ្តើមអំណាចគ្នានេះ ក្រុមឧទ្ទាម និងក្រុមភេរវជនអ៊ីស្លាមអានសារឌីន ក៏បានវាយដណ្តើមកាន់កាប់បានប៉ែកខាងជើងប្រទេស ហើយម៉ាលីក៏ត្រូវបែកជាពីរ។
នៅប៉ែកខាងជើងម៉ាលី នៅក្នុងតំបន់ដែលពួកគេគ្រប់គ្រង ក្រុមភេរវជនអ៊ីស្លាម អានសារឌីន ក៏បានប្រកាសអនុវត្តច្បាប់ Sharia ដែលជាច្បាប់តឹងរ៉ឹងបំផុតរបស់អ៊ីស្លាម ហើយបានវាយកម្ទេចទីតាំងប្រវត្តិសាស្រ្តមួយចំនួន នៅក្នុងទីក្រុងតុំប៊ុកទូ (Tombouctou) ដែលស្ថិតនៅក្នុងបញ្ជីបេតិកភ័ណ្ឌពិភពលោក។ ទង្វើទាំងអស់នេះ ធ្វើឲ្យគេនឹកឃើញទៅដល់ ទង្វើរបស់ពួកតាលីបង់ ដែលបានវាយកម្ទេចរូបសំណាក់ពុទ្ធរូប នៅក្នុងប្រទេសអាហ្វហ្កានីស្ថាន កាលពីដើមឆ្នាំ២០០១។
ដោយបារម្ភខ្លាច ក្រុមភេរវជនអានសារឌីន ប្រែក្លាយប្រទេសម៉ាលី ទៅជារដ្ឋភេរវកម្ម ដូចដែលពួកតាលីបង់បានធ្វើនៅអាហ្វហ្កានីស្ថាន ក្រុមប្រឹក្សាសន្តិសុខអ.ស.ប. បានចេញសេចក្តីសម្រេចជាឯកច្ឆន្ទ កាលពីខែធ្នូ អនុញ្ញាតឲ្យដាក់ពង្រាយកងកម្លាំងអន្តរជាតិ នៅម៉ាលី។ កងកម្លាំងអន្តរជាតិនៅម៉ាលីនេះ ភាគច្រើនត្រូវមកពីបណ្តាប្រទេសនៅអាហ្វ្រិក ហើយនឹងត្រូវនាំមុខដោយកងទ័ពនីហ្សេរីយ៉ា។ ចំណែកប្រទេសលោកខាងលិច រួមមានបារាំង អាមេរិក និងអង់គ្លេស ជាដើម សន្យាជួយខាងផ្នែកភស្តុភា និងខាងផ្តល់ព័ត៌មានចារកិច្ច។
ក៏ប៉ុន្តែ នៅក្នុងពេលដែលកងកម្លាំងអាហ្វ្រិកមិនទាន់ត្រៀមរៀបចំខ្លួនរួចរាល់ ដើម្បីដាក់ពង្រាយនៅម៉ាលីផង ស្រាប់តែ នៅថ្ងៃទី១០ មករា ក្រុមភេរវជនអ៊ីស្លាម អាន់សារឌីន ក៏បានចាប់ផ្តើមបើកការវាយលុកពីទិសខាងជើង សំដៅមករដ្ឋធានីបាម៉ាកូ (Bamako)។ ទាហានរដ្ឋាភិបាលម៉ាលីត្រូវទទួលបរាជ័យ ហើយទីក្រុងកូណា (Kona) ដែលស្ថិតនៅចម្ងាយតែប្រមាណជា ៦០០គីឡូម៉ែត្រពីរដ្ឋធានីរបស់ម៉ាលី ក៏ត្រូវធ្លាក់ក្នុងដៃរបស់ពួកអាន់សារឌីន។
ឆ្លើយតបទៅនឹងការស្នើសុំរបស់ប្រធានាធិបតីស្តីទីរបស់ម៉ាលី បារាំង ដែលជាអតីតមហាអំណាចអាណានិគមនៅអាហ្វ្រិក ហើយដែលបច្ចុប្បន្នមានមូលដ្ឋានទ័ពនៅក្បែរៗប្រទេសម៉ាលីស្រាប់ ក៏បានចាប់ផ្តើមបើកប្រតិបត្តិការទ័ពអាកាស វាយប្រហារលើក្រុមអាន់សារឌីន ដើម្បីជាជំនួយដល់កងទ័ពម៉ាលី ក្នុងការទប់ស្កាត់កុំឲ្យក្រុមភេរវជន បន្តដំណើរចុះមករដ្ឋធានីបាម៉ាកូ។ ប្រតិបត្តិការយោធា ដែលត្រូវនាំមុខដោយបណ្តាប្រទេសអាហ្វ្រិក ក៏ប្រែក្លាយទៅជាប្រតិបត្តិការនាំមុខដោយប្រទេសបារាំងទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ