បារាំងជំរុញឲ្យអ.ស.ប.បញ្ជូនកម្លាំងមួកខៀវទៅម៉ាលីឲ្យបានឆាប់
កាលពីថ្ងៃពុធ ម្សិលមិញ បារាំងបានជំរុញឲ្យអ.ស.ប.បញ្ជូនកងកម្លាំងរក្សាសន្តិភាព ទៅកាន់ប្រទេសម៉ាលីឲ្យបានឆាប់បំផុតតាមដែលអាចធ្វើទៅបាន ហើយកងកម្លាំងអាហ្វ្រិក ដែលកំពុងស្ថិតនៅក្នុងប្រទេសម៉ាលីនាពេលបច្ចុប្បន្ននេះ នឹងត្រូវដាក់បញ្ចូលទៅក្នុងក្របខ័ណ្ឌកងកម្លាំងមួកខៀវរបស់អ.ស.ប.។ ការប្រកាសទាមទារឲ្យអ.ស.ប.បញ្ជូនកងរក្សាសន្តិភាពទៅម៉ាលីនេះ ធ្វើឡើង នៅក្រោយពេលដែលប្រធានាធិបតីបារាំងបានប្រកាសថា ចំនួនកងទ័ពបារាំង នៅម៉ាលី នឹងត្រូវចាប់ផ្តើមដកថយបន្តិចម្តងៗ ចាប់ពីខែមីនានេះទៅ។
ចុះផ្សាយនៅថ្ងៃ៖
ស្តាប់ - ០១:៤៩
អស់រយៈពេលជិត ១ខែហើយ ដែលបារាំងបើកធ្វើប្រតិបត្តិការយោធាវាយប្រហារទៅលើក្រុមឧទ្ទាមអ៊ីស្លាមជ្រុលនិយម នៅប៉ែកខាងជើងប្រទេសម៉ាលី។ នៅពេលនេះ ទាហានបារាំង ដែលមានវត្តមាន នៅក្នុងប្រទេសម៉ាលី មានចំនួន សរុប ៤ពាន់នាក់ ប៉ុន្តែ បារាំងចង់ចាប់ផ្តើមដកទ័ពចេញពីម៉ាលីខ្លះៗមកវិញ ចាប់ពីអំឡុងខែមីនាខាងមុខនេះទៅ។
កាលពីម្សិលមិញនេះ នៅក្នុងកិច្ចប្រជុំបិទទ្វាររបស់ក្រុមប្រឹក្សាសន្តិសុខ នៅញូវយ៉ក ឯកអគ្គរដ្ឋទូតបារាំងប្រចាំអ.ស.ប. បានស្នើសុំឲ្យអ.ស.ប. បញ្ជូនកងកម្លាំងរក្សាសន្តិភាព ទៅកាន់ប្រទេសម៉ាលីឲ្យបានឆាប់បំផុត តាមដែលអាចធ្វើទៅបាន។
បារាំង ដែលជាអតីតមហាអំណាចអាណានិគម នៅម៉ាលី ចង់ផ្ទេរបេសកកម្មរក្សាសន្តិភាពទៅឲ្យអ.ស.ប.ឆាប់ៗ គឺដើម្បីចៀសវាង កុំឲ្យមានការចោទប្រកាន់ថា កងទ័ពបារាំងស្ថិតនៅក្នុងប្រទេសម៉ាលី ក្នុងរូបភាពជាអាណានិគមបែបថ្មី។ ម្យ៉ាងវិញទៀត បារាំងចង់ឲ្យអ.ស.ប. ចេញមុខសម្របសម្រួល ស្វែងរកដំណោះស្រាយនយោបាយ រវាងរដ្ឋាភិបាលម៉ាលី និងក្រុមឧទ្ទាម Touareg ដែលជាក្រុមឧទ្ទាមនៅប៉ែកខាងជើងម៉ាលី ប៉ុន្តែ មិនមែនជាក្រុមអ៊ីស្លាមជ្រុលនិយម។ វត្តមានរបស់កងកម្លាំងមួកខៀវរបស់អ.ស.ប. ក៏អាចនឹងជួយធានាផងដែរ កុំឲ្យកងទ័ពម៉ាលីធ្វើការសងសឹកចំពោះក្រុមជនជាតិ Touareg នៅខាងជើងម៉ាលី។
រដ្ឋមន្រ្តីក្រសួងការបរទេសបារាំងបានប្រាប់អ្នកសារព័ត៌មាន នៅទីក្រុងប៉ារីសថា កងកម្លាំងមួកខៀវរបស់អ.ស.ប.ប្រហែលជាអាចនឹងចាប់ផ្តើមដាក់ពង្រាយទៅម៉ាលីបាន នៅក្នុងខែមេសាខាងមុខ ហើយនៅពេលនោះ កងទ័ពអាហ្វ្រិក ដែលត្រូវបានដាក់ពង្រាយរួចហើយ នៅក្នុងប្រទេសម៉ាលី នឹងត្រូវដាក់បញ្ចូលទៅក្នុងក្របខ័ណ្ឌ នៃបេសកកម្មរក្សាសន្តិភាពរបស់អ.ស.ប.នេះ។
ក្នុងអំឡុងពេលនេះ កងទ័ពបារាំងនៅតែបន្តប្រឈមមុខនឹងកងឧទ្ទាមអ៊ីស្លាមជ្រុលនិយម ដែលបានដកខ្លួនថយពីទីក្រុង ក៏ប៉ុន្តែ បានប្រើតាក់ទិចទ័ពព្រៃ ដើម្បីលបវាយឆ្មក់ទៅលើកងទ័ពបារាំង ដែលដើរល្បាត នៅជុំវិញទីក្រុង នៅប៉ែកខាងជើងប្រទេសម៉ាលី។ ទាំងនេះធ្វើឲ្យមានការបារម្ភថា សង្រ្គាមប្រឆាំងនឹងភេរវជន នៅម៉ាលី អាចនឹងត្រូវអូសបន្លាយពេលយូររ៉ាំរ៉ៃ ដូចជាករណីអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ