រដ្ឋាភិបាលអ៊ុយក្រែនបើកយុទ្ធនាការប្រឆាំងនឹង "ភេរវជន"
ចុះផ្សាយនៅថ្ងៃ៖
ស្តាប់ - ០៧:៣១
ស្ថានភាពនៅអ៊ុយក្រែន បានឈានចូលដល់វគ្គថ្មី ប្រកបដោយគ្រោះថ្នាក់ ! នៅទីបំផុត រដ្ឋាភិបាលក្រុងគៀវ បានសម្រេចប្រើកម្លាំងបាយ ដើម្បីកុំឱ្យសេណារីយោនៅគ្រីមេ កើតឡើងម្តងទៀត នៅភាគខាងកើតប្រទេស។ រដ្ឋាភិបាលបានប្រកាសបើកយុទ្ធនាការប្រឆាំងនឹងភេរវជន នៅSlaviansk ក្រុងដែលត្រួតត្រាតាំងពីថ្ងៃសៅរ៍ម្សិលមិញ ដោយក្រុមប្រដាប់អាវុធស្និទ្ធនឹងរុស្ស៊ី។ ប៉ុន្តែសេចក្តីសម្រេចចិត្តនេះអាចប្រថុយនឹងគ្រោះធ្លាក់ក្នុងអំពើហិង្សាបង្ហូរឈាម និងអន្តរាគមន៍យោធាពីសំណាក់រុស្ស៊ីជិតខាង។ លោកអគ្គលេខាធិការអង្គការសហប្រជាជាតិបានអំពាវនាវឱ្យមានការអត់ធ្មត់ និងជួបចរចាគ្នា។
ប្រតិបត្តិការប្រឆាំងនឹងភេរវជនបានចាប់ផ្តើមមែន ! មានស្លាប់ប៉ូលិសម្នាក់ និងរបួស៥នាក់ផ្សេងទៀត ! នេះបើតាមប្រភពព័ត៌មានបណ្តោះអាសន្នដំបូង។
ឧទ្ធម្ភាគចក្ររបស់យោធាអ៊ុយក្រែនបានទៅដល់ Slaviansk នៃតំបន់ Donetsk មិនឆ្ងាយប៉ុន្មានពីព្រំប្រទល់រុស្ស៊ី និងបានហោះឆ្វែលយ៉ាងទាប ពេញផ្ទៃក្រុង។ កងកម្លាំងមកពីគ្រប់កងពលសន្តិសុខបានកោះមកប្រមូលផ្តុំគ្នាត្រៀមប្រយុទ្ធ ! ជនស៊ីវិលត្រូវបានណែនាំឱ្យសំងំក្នុងផ្ទះ កុំចេញក្រៅក្រុង និងអើតតាមបង្អួច ! នេះជាអនុសាសន៍របស់ក្រសួងមហាផ្ទៃ។
►សូមអាន ៖ អ៊ុយក្រែនអាចធ្លាក់ក្នុងសង្គ្រាមស៊ីវិល ប្រឈមនឹងសកម្មជនផ្តាច់ទឹកដីនិយមនៅភាគខាងកើត
ប្រឈមមុខនឹងការស្ទុះឡើងខ្លាំងនៃកម្លាំងចង់ផ្តាច់ទឹកដី នៅភាគខាងកើតប្រទេស នៅយប់មិញ ប្រធានាធិបតីស្តីទីអ៊ុយក្រែន បានកោះប្រជុំក្រុមប្រឹក្សាសន្តិសុខជាតិជាបន្ទាន់ ប៉ុន្តែទាំងប្រធានាធិបតី ទាំងរដ្ឋមន្ត្រីក្រសួងមហាផ្ទៃ គ្មាននរណាម្នាក់ចង់បញ្ចេញយោបល់ ទម្លាយព័ត៌មានអ្វីឱ្យដឹងជាសាធារណៈទេ។ ភ្នាក់ងាររបស់ក្រសួងមហាផ្ទៃបានត្រឹមសេចក្តីប្រកាសព័ត៌មានខ្លីមួយថា អ្នកចូលរួមប្រជុំបានសិក្សា បញ្ហានិងវិធានការ ដែលអាចនាំភាគខាងកើតអ៊ុយក្រែនឱ្យបានស្គាល់ភាពធម្មតាឡើងវិញ។ ខ័ណ្ឌចប់ ! ប៉ុន្តែ គឺតាមរយៈទំព័រប្រព័ន្ធសង្គមហ្វេសប៊ូក និងនៅព្រឹកមិញ ដែលរដ្ឋមន្ត្រីក្រសួងមហាផ្ទៃ បានប្រកាសបើកប្រតិបត្តិការ ប្រឆាំងនឹងភេរវជន ប្រឆាំងនឹងក្រុមប្រដាប់អាវុធបិទមុខ ស្និទ្ធនឹងម៉ូស្គូ។
ទាហានរុស្ស៊ី
ក្រុមប្រដាប់អាវុធ ដែលបានវាយលុកចូលទៅកាន់កាប់ស្ថាប័នរដ្ឋ និងទីស្នាក់ការប៉ូលិសពីរកន្លែង នៅ Slaviansk កាលពីថ្ងៃសៅរ៍នេះ ជាក្រុមដែលមានបំពាក់អាវុធយុទ្ធភណ្ឌយ៉ាងត្រឹមត្រូវ មានមេមានកើយនិងផែនការយ៉ាងច្បាស់លាស់ ប៉ុន្តែនៅលើឯកសណ្ឋាន គ្មានពាក់អាំងស៊ីង ឬសញ្ញាអ្វីទេ ធ្វើដូចជាក្រុមយុទ្ធជនប្រចាំតំបន់ដូច្នោះ។ ពោលគឺដូចគ្នាបេះបិទទៅនឹងសេណារីយោនៅគ្រីមេ។ គ្រាន់តែថាពេលនេះ ក្រុងគៀវ បានប្តូរយុទ្ធសាស្ត្រ ដោយងាកមកប្រើកម្លាំងបាយ ជាជាងផ្លូវចរចា។ ឯចំណែកកងទ័ពរុស្ស៊ី ក៏មានបញ្ឈរជើងជាស្រេចនៅតាមព្រំដែន ប្រមាណជា៤ម៉ឺននាក់។
មិនតែប៉ុណ្ណោះ បើតាមរដ្ឋមន្ត្រីក្រសួងមហាផ្ទៃអ៊ុយក្រែន ក្រុមអ្នកបះបោរចង់ផ្តាច់ទឹកដី មួយភាគ មានបំពាក់អាវុធ ផលិតនៅរុស្ស៊ី គឺកាំភ្លើងអាកា ១០០។ អាវុធប្រភេទនេះ មានតែប្រើតែនៅក្នុងជួរកងពលទាហានរុស្ស៊ីប៉ុណ្ណោះ។ ដូច្នេះបើគេយកទ្រឹស្តីមកអនុវត្ត និងគិតទៅ ឃើញថា ក្រុមអ្នកញុះញង់រុស្ស៊ី ទំនងជាបានចូលមកក្នុងទឹកដីអ៊ុយក្រែន ដើម្បីសាកល្បងបង្កអស្ថិរភាព ក្នុងប្រទេសនេះឱ្យបានខ្លាំងបំផុត និងមុនពេលបោះឆ្នោតប្រធានាធិបតីមុនអាណត្តិថ្ងៃទី ២៥ឧសភា។
សហរដ្ឋអាមេរិក និងបារាំងព្រមានដាក់ទណ្ឌកម្មបន្ថែម
ទាំងបារាំង ទាំងអាមេរិក សុទ្ធតែបានបង្ហាញការព្រួយបារម្ភចំពោះស្ថានភាពនៅភាគខាងកើតអ៊ុយក្រែន និងបានប្រកាសត្រៀមដាក់ទណ្ឌកម្មថ្មីលើរុស្ស៊ី ប្រសិនបើម៉ូស្គូ មិនព្រមនៅស្ងៀម ចេះតែបង្កហេតុញុះញង់ ឬចូលធ្វើអន្តរាគមន៍នៅក្នុងប្រទេសជិតខាងនេះ។ សូម្បីតែចិន ដែលធ្លាប់សំងំស្ងៀម តាំងពីដើមមក ក៏បានបញ្ចេញប្រតិកម្មព្រួយបារម្ភចំពោះស្ថានការណ៍នៅអ៊ុយក្រែន ដោយសន្យាផ្តល់ប្រាក់ជំនួយដល់រដ្ឋាភិបាលក្រុងគៀវនេះ ក្នុងក្របខ័ណ្ឌអង្គការមូលនិធិរូបិយវត្ថុអន្តរជាតិ។
ជាមួយនឹងការទាមទារឱ្យរុស្ស៊ីដកទ័ពចេញពីតាមបណ្តោយព្រំដែន ដើម្បីបន្ធូរបន្ថយសម្ពាធ លោកប្រមុខការទូតអាមេរិក ចន ឃែរី បាន បានទូរស័ព្ទទៅសមភាគីរុស្ស៊ី សែកហ្គៃ ឡាវ្រូស្ត ដើម្បីរំលឹកពីផលវិបាកដែលរុស្ស៊ី អាចនឹងត្រូវទទួលរងបន្ថែមទៀត។ ជាក់ស្តែង កាលពីថ្ងៃសុក្រកន្លងទៅនេះ អាមេរិកបានដាក់ទណ្ឌកម្មអ្នកទទួលខុសត្រូវគ្រីមេ៦រូប និងក្រុមហ៊ុនឧស្ម័នរុស្ស៊ីមួយហើយ។ នៅថ្ងៃទី ២២មេសា ខាងមុខ លោកអនុប្រធានាធិបតីអាមេរិក ជោ បៃឌិន ត្រូវអញ្ជើញទៅអ៊ុយក្រែនទៀត ដើម្បីលើកទឹកចិត្តនិងគាំទ្ររដ្ឋាភិបាលក្រុងគៀវ ព្រមទាំងដើម្បីស្វែងរកវិធានការការពារសុវត្ថិភាពថាមពលឧស្ម័នឱ្យអ៊ុយក្រែន កុំឱ្យរុស្ស៊ីសំឡុតបានទៀត។
រុស្ស៊ីរក្សាគំនាបដើម្បីរដ្ឋសហព័ន្ធអ៊ុយក្រែន
ក៏ប៉ុន្តែសម្រាប់រុស្ស៊ី ការគំរាមកំហែងរបស់បស្ចឹមប្រទេស មិនសមហេតុផលទេ លោកប្រមុខការទូតរុស្ស៊ី បានទាមទារឱ្យអាមេរិក រកភស្តុតាងមកបញ្ជាក់ ថាអំពីសកម្មភាពរបស់ភ្នាក់ងាររុស្ស៊ីក្នុងភាគខាងកើតអ៊ុយក្រែន។ រុស្ស៊ីបានវាយបកមកវិញ ដោយព្រមានថាអន្តរាគមន៍យោធារបស់រដ្ឋាភិបាលអ៊ុយក្រែនលើក្រុមអ្នកគាំទ្ររុស្ស៊ីមិនអាចទទួលយកបានឡើយ ហើយជាផលវិបាក គឺរុស្ស៊ីអាចនឹងព្យូរវត្តមាន មិនចូលរួមក្នុងជំនួបចតុភាគីស្តីពីអ៊ុយក្រែន គ្រោងធ្វើនៅថ្ងៃទី ១៧មេសាខាងមុខ។ សម្រាប់ម៉ូស្គូ ការបះបោររបស់ប្រជាជនអ្នកនិយាយភាសារុស្ស៊ី ប្រឆាំងនឹងរដ្ឋាភិបាលក្រុងគៀវ ជាសកម្មភាពស្របច្បាប់ ដូច្នេះរដ្ឋាភិបាលអ៊ុយក្រែនមិនត្រូវប្រើកម្លាំងបង្ក្រាបឡើយ។
►សូមអាន ៖ វិបត្តិអ៊ុយក្រែន-គ្រីមេ អាមេរិករុស្ស៊ីដំឡើងទណ្ឌកម្មដាក់គ្នា
ជាផ្លូវការ ម៉ូស្គូមិនត្រូវការប្រើល្បិចឈ្លានពាន យកតំបន់ឧស្សាហកម្មបាក់បែក ដូចនៅគ្រីមេទេ ជាថ្នូរនឹងជម្លោះជាមួយក្រុមបស្ចឹមលោកទេ ព្រោះគ្មានផ្តល់ប្រយោជន៍ដល់រុស្ស៊ី ទាំងផ្នែកសេដ្ឋកិច្ច និងនយោបាយ។ ប៉ុន្តែរុស្ស៊ី ចង់ឃើញមានការបង្កើតរដ្ឋសហព័ន្ធនៅអ៊ុយក្រែន ដើម្បីនាំប្រទេសចេញវិបត្តិ ដោយធានាបានទាំងសន្តិសុខដល់តំបន់គាំទ្រនិងនិយាយភាសារុស្ស៊ី។ បើតាមអ្នកឯកទេស ម៉ូស្គូនឹងបន្តដាក់គំនាបរហូតទាល់តែក្រុងគៀវ ព្រមធ្វើកំណែទម្រង់រដ្ឋធម្មនុញ្ញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ