អ៊ុយក្រែនអាចធ្លាក់ក្នុងសង្គ្រាមស៊ីវិល ប្រឈមនឹងសកម្មជនផ្តាច់ទឹកដីនិយមនៅភាគខាងកើត?
ចុះផ្សាយនៅថ្ងៃ៖
ស្តាប់ - ០៦:២៧
នៅអ៊ុយក្រែន ថ្ងៃអង្គារនេះ ក្រសួងមហាផ្ទៃបានចាប់ប្រតិបត្តិការប្រឆាំងក្រុមបាតុករគាំទ្ររុស្ស៊ីនៅក្រុងខាកគីវ Kharkiv ភាគខាងកើតប្រទេស។ ក្រុមបាតុករបានចូលកាន់កាប់អគាររដ្ឋបាលជាច្រើនកន្លែងនៅទីនោះ ទាមទារអោយមានការបោះឆ្នោតប្រជាមតិ ភ្ជាប់ក្រុងខាកគីវចូលក្នុងទឹកដីរុស្ស៊ី ដូចជាតំបន់គ្រីមេដែរ។ កងកម្លាំងអ៊ុយក្រែនបានចាប់ខ្លួនមនុស្ស៧០នាក់ ជាប់ចោទពីបទបង្កចលាចលជាសាធារណៈ និងធ្វើសកម្មភាពផ្តាច់ទឹកដី ដោយខុសច្បាប់។ រុស្ស៊ីបានអំពាវនាវអ៊ុយក្រែនអោយបញ្ឈប់នូវសកម្មភាពរៀបជើងព្រួលយោធា នៅភាគអាគ្នេយ៍ ដោយព្រមានថា សកម្មភាពនេះអាចធ្វើអោយផ្ទុះសង្គ្រាមស៊ីវិលបាន។
រុស្ស៊ីព្រមានក្រុងគៀវថា ការរៀបជើងព្រួលយោធាអ៊ុយក្រែននៅភាគខាងកើតអ៊ុយក្រែន អាចបង្កជាសង្គ្រាមស៊ីវិល
រដ្ឋាភិបាលអ៊ុយក្រែនកំពុងភ័យខ្លាចតំបន់ផ្សេងៗទៀតនៅតាមភាគខាងកើតប្រទេស ធ្លាក់ក្នុងដៃរុស្ស៊ីដូចជាគ្រីមេដែរ ព្រោះថា តាំងពីថ្ងៃអាទិត្យមក សកម្មជនគាំទ្ររុស្ស៊ីនៅក្រុងភាគខាងកើតចំនួន៣ គឺក្រុងខាកគីវ ដូណេត និងលូហ្កង់ បានវាយលុកអគាររដ្ឋបាលជាច្រើន និងទាមទារធ្វើប្រជាមតិភ្ជាប់ខ្លួនចូលរុស្ស៊ី។ ប្រសិនបើរដ្ឋាភិបាលអ៊ុយក្រែនហ៊ានធ្វើខ្លាំងដៃ និងប្រើកម្លាំងបាយដាច់ខាតប្រឆាំងនឹងបាតុករគាំទ្ររុស្ស៊ី នោះភាពចលាចលអាចនឹងផ្ទុះឡើង នៅតាមតំបន់ភាគខាងកើត ដែលជាតំបន់គាំទ្ររុស្ស៊ី ជាតំបន់សំបូរប្រជាជននិយាយភាសារុស្ស៊ី ហើយប្រហែលជាអាចឈានទៅដល់សង្គ្រាមស៊ីវិលផងក៏ថាបាន។
គួររំលឹកថា ក្រុងខាកគីវ ដែលកងកម្លាំងអ៊ុយក្រែនធ្វើប្រតិបត្តិការប្រឆាំងក្រុមបាតុករគាំទ្ររុស្ស៊ី ថ្ងៃអង្គារនេះ មានប្រជាជន១លាន៤សែននាក់រស់នៅ។ ក្រុងនេះធ្លាប់ជារដ្ឋធានីរបស់អ៊ុយក្រែន ចន្លោះឆ្នាំ១៩១៧ ដល់ឆ្នាំ១៩៣៤ កាលពីអ៊ុយក្រែនស្ថិតក្នុងអតីតសូវៀត។ នៅពេលនេះ ស្ថានភាពនៅក្រុងខាកគីវ ក៏ដូចជានៅក្រុងភាគខាងកើតផ្សេងទៀតដែរ គឺតានតឹងខ្លាំងណាស់ ព្រោះថា ប្រធានាធិបតីរដ្ឋាភិបាលអន្តរកាលអ៊ុយក្រែនបានប្រកាសប្រដូចក្រុមផ្តាច់ទឹកដីនិយមនៅភាគខាងកើតនេះ ទៅនឹងក្រុមភេរវជនរឺក៏ឧក្រិដ្ឋជនដូច្នោះដែរ។ ការចាត់ទុកបែបនេះ មិនអាចអោយសកម្មជនគាំទ្ររុស្ស៊ីទទួលយកបានទេ ព្រោះថា គោលបំណងចំបងរបស់សកម្មជនទាំងនេះ គឺចង់ភ្ជាប់តំបន់ដែលពួកគេរស់នៅ ចូលទៅក្នុងទឹកដីរុស្ស៊ីតែប៉ុណ្ណោះ។ ពួកគេគ្មានបំណងសម្លាប់មនុស្ស រឺក៏បង្កហេតុការណ៍អ្វីធ្ងន់ធ្ងរនោះទេ។
ទន្ទឹមនេះដែរ អ្វីដែលគួរអោយបារម្ភកាន់តែខ្លាំងនោះ គឺថាប្រធានាធិបតីរុស្ស៊ី ពូទីន ធ្លាប់បានសន្យាហើយថា នឹងប្រើគ្រប់មធ្យោបាយទាំងអស់ដើម្បីការពារសុវត្ថិភាពសន្តិសុខប្រជាជនដែលនិយាយភាសារុស្ស៊ីនៅក្នុងបណ្តាប្រទេសជាអតីតសាធារណរដ្ឋរបស់សូវៀត។ ហើយនៅពេលនេះ នៅតាមព្រំដែនរវាងអ៊ុយក្រែននិងរុស្ស៊ី រុស្ស៊ីបានដាក់កងទ័ពខ្លួន ប្រមាណ៤ម៉ឺននាក់នៅទីនោះ។ ក្រុងខាកគីវ ក្រុងដូណេត និងក្រុងលូហ្កង់ ដែលបាតុករគាំទ្ររុស្ស៊ីបានចូលលុកលុយអគាររដ្ឋាភិបាលនោះ ស្ថិតនៅមិនឆ្ងាយពីព្រំដែនរុស្ស៊ីប៉ុន្មានទេ។
ពិសេសថ្ងៃអង្គារនេះ ចំពេលដែលកងកម្លាំងអ៊ុយក្រែនកំពុងបើកប្រតិបត្តិការប្រឆាំងសកម្មជនផ្តាច់ទឹកដីផងនោះ ប្រសិនមានហេតុការណ៍អ្វីកើតឡើង នោះកងទ័ពរុស្ស៊ីអាចនឹងចូលមកជួយប្រជាជនក្នុងតំបន់ភាគខាងកើតអ៊ុយក្រែននេះជាមិនខាន។ អ្វីដែលរដ្ឋាភិបាលអ៊ុយក្រែនបារម្ភនោះ គឺមិនមែនត្រឹមតែជាសង្គ្រាមស៊ីវិលប៉ុណ្ណោះទេ តែជាការឈ្លានពានរបស់រុស្ស៊ីនៅភាគខាងកើតអ៊ុយក្រែនតែម្តង។ អ៊ុយក្រែនមិនចង់អោយក្រុងភាគខាងកើតទាំងនេះ ផ្តាច់ចេញពីទឹកដីខ្លួនដូចជាគ្រីមេនោះទេ។
ក្រសួងមហាផ្ទៃអ៊ុយក្រែនប្រតិបត្តិការព្រមានសកម្មជនគាំទ្ររុស្ស៊ី នៅភាគខាងកើត
ថ្ងៃអង្គារនេះ ក្រសួងមហាផ្ទៃអ៊ុយក្រែនបើកប្រតិបត្តិការប្រឆាំងសកម្មជនគាំទ្ររុស្ស៊ី នៅក្រុងខាកគីវ គឺមិនដល់២ថ្ងៃផង ក្រោយពេលសកម្មជនគាំទ្ររុស្ស៊ីនៅក្រុងខាកគីវ បានចូលលុកលុយអគាររដ្ឋបាលច្រើនកន្លែង។ អាជ្ញាធរអ៊ុយក្រែនត្រូវតែលេងធ្ងន់ដៃបែបនេះ ពីដំបូងទី ដើម្បីព្រមានដល់សកម្មជនគាំទ្ររុស្ស៊ី ព្រមានសកម្មជនផ្តាច់ទឹកដីនិយម មិនថាតែនៅក្រុងខាកគីវប៉ុណ្ណោះទេ តែក៏ព្រមានជនផ្តាច់ទឹកដីនិយមផ្សេងទៀត នៅភាគខាងកើតប្រទេសដែរថា អាជ្ញាធរមានជំហរដាច់ខាតមិនបណ្តោយអោយទឹកដីភាគខាងកើត ធ្លាក់ក្នុងដៃរុស្ស៊ីដូចជាគ្រីមេនោះទេ។ គួររំលឹកថា រដ្ឋាភិបាលអ៊ុយក្រែនធ្លាប់មានបទពិសោធន៍ជូរចត់នៅគ្រីមេរួចហើយ។ នៅគ្រីមេកន្លងមក កងទ័ពអ៊ុយក្រែនមិនសូវជាតបតនឹងសកម្មជនគាំទ្ររុស្ស៊ីប៉ុន្មានទេ កងទ័ពបានបណ្តោយអោយពួកគេចូលវាយលុកអគារ រឺក៏ទីតាំងយោធាផ្សេងៗបានស្រួល តាំងតែពីដំបូងទី។ ម្ល៉ោះហើយ អាជ្ញាធរអ៊ុយក្រែនឃើញថា សកម្មភាពទាំងនេះបានសម្រួលអោយកងកម្លាំងរុស្ស៊ីចូលគ្រីមេយ៉ាងស្រួល កាលពីពេលកន្លងទៅ។
នៅពេលនេះ រដ្ឋាភិបាលមិនអាចប្រហែលដៃដូចពេលមុនទៀតទេ ទោះជាត្រូវប្រឈមនឹងសង្គ្រាមស៊ីវិល រឺក៏អាចថាទោះជាត្រូវប្រឈមនឹងការប្រយុទ្ធជាមួយកងទ័ពរុស្ស៊ី ដែលអាចចូលមកជួយការពារសកម្មជនគាំទ្ររុស្ស៊ីទាំងនោះក្តី។ បើហ៊ានប្រហែស បណ្តោយរហូតដល់ថ្នាក់តំបន់ភាគខាងកើតអ៊ុយក្រៃនទាំងនេះ ប្រកាសឯករាជ្យ និងធ្វើប្រជាមតិដូចនៅគ្រីមេ នោះអ៊ុយក្រែននឹងបាត់បង់ទឹកដីភាគខាងកើតជាក់ជាមិនខាន។ អាជ្ញាធរអ៊ុយក្រែនថែមទាំងចោទរុស្ស៊ីទៀតថា ការដែលសកម្មជនផ្តាច់ទឹកដីនិយមគាំទ្ររុស្ស៊ីទាំងនេះ ចូលលុកលុយអគាររដ្ឋបាល កាលពីថ្ងៃអាទិត្យមកនោះ គឺជាឆាកល្ខោនដែលរៀបចំឡើងដោយរុស្ស៊ី។ អ៊ុយក្រែនចោទរុស្ស៊ី ថា បង្កចលាចលក្នុងស្រុក ជម្រុញអោយប្រជាជនភាគខាងកើតបះបោរ ដើម្បីរាំងស្ទះមិនអោយមានការបោះឆ្នោតប្រធានាធិបតីអ៊ុយក្រែន ដែលត្រូវរៀបចំធ្វើនៅថ្ងៃ២៥ឧសភាខាងមុខនេះ។
ប្រឈមនឹងការគំរាមដាក់ទណ្ឌកម្មពីសំណាក់អាមេរិក និងសហភាពអឺរ៉ុប រុស្ស៊ីនៅតែបង្ហាញជំហរដាច់ខាតបែបឯកោ ក្នុងឆាកអន្តរជាតិ
រុស្ស៊ីដឹងច្បាស់ថា ទាំងអឺរ៉ុប និងអាមេរិក មិនហ៊ានលេងទណ្ឌកម្មធ្ងន់ធ្ងរនោះទេ ព្រោះរុស្ស៊ីមានអំណាចសម្រេចចិត្តខាងផ្គត់ផ្គង់ឧស្ម័ន នៅអឺរ៉ុប។ កន្លងមក គេលឺតែពាក្យគំរាមទណ្ឌកម្មផ្សេងៗ តែទណ្ឌកម្មបែបយ៉ាងបង្កកទ្រព្យសម្បត្តិថ្នាក់ដឹកនាំរុស្ស៊ី រឺក៏ហាមឃាត់ការធ្វើដំណើរការទូតនោះ វាមិនធ្ងន់ធ្ងរអ្វីទេ ក្នុងក្រសែភ្នែកក្រុងម៉ូស្គូទេ។ ថ្មីៗនេះ ក្រុងម៉ូស្គូថែមទាំងលេងចាស់ដៃទៅអ៊ុយក្រែនវិញ ដោយបានតម្លើងថ្លៃឧស្ម័នដែលលក់អោយអ៊ុយក្រែន។ រុស្ស៊ីដឹងថា អ៊ុយក្រែនជាប្រទេសមានកសិកម្មខ្លាំងក្លា តែម្សិលមិញ រុស្ស៊ីបានលេងអ៊ុយក្រែនមួយក្បាច់ទៀត ដោយបានប្រកាសផ្អាកការនាំចូលផលិតផលទឹកដោះគោអ៊ុយក្រែនមួយចំនួន មិនអោយចូលទឹកដីរុស្ស៊ីទៀតផង។
នៅថ្ងៃអង្គារនេះដែរ រុស្ស៊ីបានប្រាប់ថា ត្រៀមចរចាជាមួយអ៊ុយក្រែន តែត្រូវតែមានតំណាងអ្នកទទួលខុសត្រូវមកពីភាគខាងលិចអ៊ុយក្រែនចូលរួមការចរចានេះ។ សម្រាប់រុស្ស៊ី រឿងចលាចលក្នុងស្រុកអ៊ុយក្រែន ជារឿងរបស់ថ្នាក់ដឹកនាំអ៊ុយក្រែន។ រុស្ស៊ីតបទៅអ៊ុយក្រែនថា មិនត្រូវយកគ្រប់បញ្ហាអ៊ុយក្រែនមកទំលាក់កំហុសលើរុស្ស៊ីនោះទេ។ រុស្ស៊ីថែមទាំងស្នើជាដំណោះស្រាយវិបត្តិ ដោយសុំអោយអ៊ុយក្រែនរៀបចំកំណែទម្រង់រដ្ឋធម្មនុញ្ញស៊ីជម្រៅ តាមបែបសហព័ន្ធ ហើយអាជ្ញាធរអ៊ុយក្រែនត្រូវគិតផ្តល់អត្ថប្រយោជន៍ដល់គ្រប់តំបន់ទាំងអស់ក្នុងប្រទេស។
រុស្ស៊ីដឹងច្បាស់ណាស់ថា តំបន់ភាគខាងកើតអ៊ុយក្រែនមានទំនោររករុស្ស៊ី ហើយការដែលប្រជាជនចង់បោះឆ្នោតប្រជាមតិ គឺស្របតាមលទ្ធិប្រជាធិបតេយ្យពិតប្រាកដ។ ដូច្នេះ តំបន់ភាគខាងកើតអ៊ុយក្រែនងាយនឹងធ្លាក់ក្នុងដៃរុស្ស៊ីណាស់។ អាជ្ញាធរអ៊ុយក្រែន រឺក៏សហគមន៍អន្តរជាតិ ចង់មិនចង់ ក៏ត្រូវតែស្តាប់យោបល់រុស្ស៊ីច្រើនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ