នាយករដ្ឋមន្តី្រអ៊ុយក្រែនអញ្ជើញទៅភាគខាងកើតប្រទេស ដើម្បីសាកល្បងបញ្ចុះកម្តៅបះបោរ
ក្រុមអ្នកបះបោរចង់ផ្តាច់ទឹកដី នៅភាគខាងកើតអ៊ុយក្រែន កំពុងបន្តកាន់កាប់ស្ថាប័នរដ្ឋ របស់ក្រុងពីរ ដែលនិយាយភាសារុស្ស៊ី។ ក្រុមប្រដាប់អាវុធមិនស្គាល់មុខ បាននាំគ្នាសម្រុកចូលអុកឡុកប៉ុស្តិ៍ប៉ូលិសទៀត។ សម្ពាធមិនបានធូរថយឡើយ ! សហគមន៍អន្តរជាតិបន្តដាក់គំនាប។ វ៉ាស៊ីនតោនទើបបានប្រកាសឱ្យក្រុមប្រទេសមហាអំណាចឧស្សហកម្មទាំង២០គិតគូរជួយអ៊ុយក្រែន។ចំនែកដំណោះស្រាយការទូតក៏កំពុងសស្រាក់សស្រាំ។ នាយករដ្ឋមន្ត្រីអ៊ុយក្រែន បានចុះទៅផ្ទាល់ដល់ភាគខាងកើតប្រទេស នៅល្ងាចថ្ងៃសុក្រម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ខុសពីរដ្ឋមន្ត្រីក្រសួងមហាផ្ទៃ លោកនាយករដ្ឋមន្ត្រីអ៊ុយក្រែន នៅពេលបំពេញទស្សនកិច្ចនៅភាគខាងកើតអ៊ុយក្រែន បានប្រើភាសាបែបផ្សះផ្សា សន្យាស្វែងរកលំនឹងរវាងអំណាចកណ្តាលនិងអំណាចតំបន់ និងសើរើច្បាប់រដ្ឋធម្មនុញ្ញឱ្យបានមុនថ្ងៃទី ២៥ឧសភា ព្រមទាំងសន្យារក្សាសិទ្ធិសេរីភាពនៃការប្រើភាសាដែលមិនមែនជាភាសាអ៊ុយក្រែន។ លោកប្រមុខរដ្ឋាភិបាល មិនបានជួបក្រុមបះបោរដោយផ្ទាល់ និង បានបដិសេធ មិនចូលគន្លងបង្កើតរដ្ឋសហព័ន្ធដូចការទាមទាររបស់ក្រុមស្និទ្ធនឹងមូស្គូទេ។
តាមការពិតប្រមុខរដ្ឋាភិបាលអ៊ុយក្រែនដឹងច្បាស់ថា មិនអាចរង់ចាំសម្បាទាអ្វីពីក្រុមបះបោរឡើយ តែត្រូវការទាក់ទាញបណ្តាជនអ៊ុយក្រែនភាគខាងកើតដែលមិនមែនជាអ្នកជ្រុលនិយម។ កម្មវត្ថុរបស់អំណាចកណ្តាលអ៊ុយក្រែន គឺធ្វើយ៉ាងណាឱ្យចលនាបះបោរថប់ដណ្តើមអស់កម្លាំងដោយខ្លួនឯង តាមរយៈការទប់ស្កាត់កុំឱ្យក្រុមនេះបានទទួលការគាំទ្រច្រើនពីសំណាក់បណ្តាជនអ៊ុយក្រែននៅភាគខាងកើតនិយាយភាសារុស្ស៊ី។
ប៉ុន្តែស្ថានភាពជាក់ស្តែង នៅថ្ងៃសៅរ៍នេះ ក្នុងខណៈដែលក្រុមបះបោរនៅតែបន្តកាន់កាប់មន្ទីរស្ថាប័នរដ្ឋបាល តាំងពីមួយសប្តាហ៍មកហើយ មិនព្រមដកខ្លួនចេញ ក្រុមប្រដាប់អាវុធមួយក្រុមផ្សេងទៀតពាក់មុខបាំងជិត បានវាយលុកចូលកាន់កាប់ស្នងការស្ថានប៉ូលិសមួយ នៅមិនឆ្ងាយប៉ុន្មានពីទីក្រុង Donetsk។ ការប៉ះទង្គិចមានលក្ខណៈតានតឹងខ្លាំង ព្រោះបើតាមរដ្ឋមន្ត្រីក្រសួងមហាផ្ទៃ ការប្រឈមមុខជាមួយក្រុមបាតុករ ខុសពីការប្រឈមមុខនឹងភេរវជន។
លើផ្លូវការទូតវិញ សហរដ្ឋអាមេរិក និងសហភាពអឺរ៉ុបបានឆ្លើយបញ្ជាក់ថាពិតជានឹងមានជំនួបចតុភាគីស្តីពីអ៊ុយក្រែន នៅថ្ងៃទី ១៧មេសាខាងមុខ នៅទីក្រុងហ្សឺណែវ តែមិនសង្ឃឹមឃើញលទ្ធផលទេ។ ក្នុងពេលរង់ចាំនេះ សហរដ្ឋអាមេរិកបានប្រកាសទណ្ឌកម្មថ្មីបន្ថែមដាក់លើក្រុមអ្នកទទួលខុសត្រូវគ្រីមេ៧រូប និងក្រុមហ៊ុនឧស្ម័នដែលគ្រប់គ្រងដោយរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ