វិបត្តិអ៊ុយក្រែនកំពុងរុញច្រានពិភពលោកចូលក្នុងសង្រ្គាមត្រជាក់ជាថ្មី ?
ចុះផ្សាយនៅថ្ងៃ៖
ស្តាប់ - ០៦:៤១
វិបត្តិអ៊ុយក្រែនបាននិងកំពុងធ្វើឲ្យក្រុមប្រទេសលោកខាងលិចឈឺក្បាលយ៉ាងខ្លំាង។ សង្រ្គាមពាក្យសម្តីក៏កំពុងបន្តមានយ៉ាងផុសផុលរវាងបស្ចិមលោក និងប្រទេសរុស្ស៊ី។ ជាថ្មីម្តងទៀតនៅយប់ថ្ងៃចន្ទ ទី១៤ មេសា លោកប្រធានាធិបតីអាមេរិកបារ៉ាក់ អូបាម៉ា និងលោកប្រធានាធិបតីរស្ស៊ីពូទីនបានទាក់ទងគ្នាតាមទូរស័ព្ទដើម្បីនិយាយពីព្រឹត្តិការណ៍ដែលកំពុងកើតមាននៅតំបន់មួយចំនួនស្ថិតប៉ែកខាងកើតប្រទេសអ៊ុយក្រែន។ នៅក្នុងកិច្ចសន្ទនាតាមទូរស័ព្ទនោះ លោកអូបាម៉ាបានស្នើលោកពូទីនឲ្យជួយធ្វើអន្តរាគមន៍ប្រាប់ក្រុមប្រដាប់អាវុធគំាទ្ររុស្ស៊ីឲ្យទម្លាក់អាវុធចុះ។ តែលោកពូទីនបានឆ្លើយប្រាប់លោកអូបាម៉ាថា រុស្ស៊ីនឹងមិនលូកដៃចូលជ្រៀតជ្រែកកិច្ចការផ្ទៃក្នុងរបស់ប្រទេសអ៊ុយក្រែនទេ។
ការហៅទូរស័ព្ទទៅមកជាថ្មីនៅយប់ថ្ងៃចន្ទ ទី១៤ មេសារវាងលោកប្រធានាធិបតីអាមេរិកអូបាម៉ា និងលោកប្រធានាធិបតីពូទីនត្រូវបានធ្វើឡើង ចំពេលដែលស្ថានការណ៍នៅតំបន់ប៉ែកខាងកើតនៃប្រទេសអ៊ុយក្រែនកំពុងឡើងតានតឹងដល់កំពូល។ ក្រុមអ្នកគំាទ្ររុស្ស៊ីរស់ក្នុងទឹកដីអ៊ុយក្រែនប្រដាប់ដោយអាវុធកំពុងបន្តទាមទារផ្តាច់តំបន់ទំាងនោះពីការគ្រប់គ្រងរបស់រដ្ឋាភិបាលអ៊ុយក្រែន រួចទៅរួមរស់ជាមួយរដ្ឋាភិបាលរុស្ស៊ីដូចករណីតំបន់គ្រីមេនាពេលថ្មីៗកន្លងទៅ។ សម្រាប់ក្រុមប្រទេសលោកខាងលិចដែលមានអាមេរិកជាមេខ្លោង រូបភាពទំាងអស់នេះមិនមែនកើតមានតែឯកឯង និងក៏មិនបានកើតមានដោយចៃដន្យ គ្មានអ្នកជួយជម្រុញពីក្រោយដែរ មានន័យថា គឺលោកប្រធានាធិបតីរុស្ស៊ីពូទីនជាអ្នកនៅពីក្រោយដោយមិនអាចប្រកែកបាន។
នៅក្នុងកិច្ចសន្ទនារវាងលោកអូបាម៉ា និងលោកពូទីន លោកអូបាម៉ាបានស្នើលោកពូទីនឲ្យជួយអន្តរាគមន៍ប្រាប់ក្រុមអ្នកគំាទ្ររុស្ស៊ីឲ្យដាក់អាវុធចុះ។ តែលោកពូទីនបានឆ្លើយតបភ្លាមៗថា លោកមិនលូកដៃចូលជ្រៀតជ្រែកកិច្ចការផ្ទៃក្នុងរបស់អ៊ុយក្រែនទេ។ ទន្ទឹមគ្នានេះ លោកពូទីនថែមទំាងបានស្នើលោកអូបាម៉ាប្រើប្រាស់ឲ្យប្រើអស់លទ្ធភាពការទូតដែលអាមេរិកមានដើម្បីចៀសវាងការប្រើប្រាស់កម្លំាងបាយ និងការបង្ហូរឈាម។ សម្រាប់លោកពូទីន ការចោទទំាងអំបាលម៉ានពីបស្ចិមលោកដែលថា រុស្ស៊ីជាអ្នកបង្កអស្ថិរភាពនៅអ៊ុយក្រែនសព្វថ្ងៃ គឺជាការចោទប្រកាន់ដែលគ្មានភស្តុតាងច្បាស់លាស់។ ដូច្នេះ អាមេរិក និងរុស្ស៊ីនៅតែបន្តទម្លាក់កំហុសដាក់គ្នាទៅវិញ ទៅមក និងបន្តរក្សាជំហររបស់គេតែរៀងៗខ្លួន។
អ៊ុយក្រែនបារម្ភពីការផ្ទុះសង្រ្គាមផ្ទៃក្នុង
ស្ថានការណ៍នៅតំបន់ប៉ែកខាងកើតអ៊ុយក្រែនកំពុងបន្តធ្លាក់ដុនដាបកាន់តែខ្លំាង។ ក្រុមប្រដាប់អាវុធគំាទ្ររុស្ស៊ីមិនព្រមចាកចេញពីអគាររដ្ឋបាលដែលពួកគេបានចូលកាន់កាប់តំាងពីថ្ងៃសៅរ៍កន្លងទៅ។ រីឯរដ្ឋាភិបាលទីក្រុងគៀវដែលបានសន្យាបើកការវាយប្រហារដណ្តើមយកអគារទំាងនោះមកវិញ ក៏នៅមិនទាន់បានធ្វើអ្វីដែរ។ នេះក៏ដោយសារថា ទី១ អាចមកពីរដ្ឋាភិបាលទីក្រុងគៀវញញើតខ្លាចតែការធ្វើអន្តរាគមន៍តាមផ្លូវយោធារបស់ខ្លួនជាចំណុចចាប់ផ្តើមនៃការផ្ទុះសង្រ្គាមផ្ទៃក្នុងរវាងប្រជាជនអ៊ុយក្រែនដែលមានសន្តានចិត្តចំពោះអឺរ៉ុប និងប្រជាជនអ៊ុយក្រែនដែលមានសន្តានចិត្តចំពោះរុស្ស៊ី។ នៅក្នុងចំណោមប្រជាជនអ៊ុយក្រែនទំាង ៤៦លាននាក់ មាន ១៥លាននាក់ដែលមានដើមកំណើតរុស្ស៊ី។
នៅក្នុងករណីណាដែលសង្រ្គាមផ្ទៃក្នុងអ៊ុយក្រែនបានផ្ទុះឡើងមែន នោះរុស្ស៊ីមានលេសពេញទីដើម្បីចូលខ្លួនអន្តរាគមន៍ដើម្បីការពារសន្តិសុខ និងផលប្រយោជន៍របស់ប្រជាជនខ្លួនដែលកំពុងរស់នៅក្នុងទឹកដីអ៊ុយក្រែន។ នៅពេលនោះ ទឹកដីអ៊ុយក្រែននឹងចៀសមិនរួចពីការពុះចែកជាពីរបំណែក នៅម្ខាង គឺអ៊ុយក្រែន-រុស្ស៊ីស្ថិតប៉ែកខាងកើត និងខាងត្បូង នៅម្ខាងទៀត គឺអ៊ុយក្រែន-អឺរ៉ុបស្ថិតប៉ែកកណ្តាល និងខាងលិច។ ទី២ អាចថាសហគមន៍អន្តរជាតិបានអំពាវនាវរដ្ឋាភិបាលទីក្រុងគៀវឲ្យរក្សាភាពអត់ធ្មត់ កុំអាលប្រើកម្លំាងបាយ ដោយទុកឲ្យពួកគេបន្តស្វែងរកដំណោះស្រាយតាមផ្លូវការទូតជាមួយប្រទេសរុស្ស៊ី។
រហូតមកដល់ពេលនេះ រុស្ស៊ីបន្តច្រានចោលលើការចោទប្រកាន់របស់សហគមន៍អន្តរជាតិ។ តែគេមិនត្រូវភ្លេចទេថា ករណីតំបន់គ្រីមេ ជាភស្តុតាងជាក់ស្តែងមួយមិនអាចប្រកែកបាន។ ចំណែកក្រុមប្រដាប់អាវុធដែលកំពុងកាន់កាប់អគាររដ្ឋបាលជាច្រើននៅតំបន់ប៉ែកខាងកើតអ៊ុយក្រែន ក៏មានបង្កប់ដោយគេញសម្ងាត់រុស្ស៊ី និងទាហានរុស្ស៊ីចេញមុខដែរ។ ទន្ទឹមគ្នានេះ រុស្ស៊ីក៏បានដាក់ពង្រាយកម្លំាងទ័ពរបស់ខ្លួនប្រមាណជា ៤០ ០០០នាក់នៅតាមបណ្តាយព្រំដែនជាមួយអ៊ុយក្រែន។ សំណួរដែលកំពុងចោទសួរនៅពេលនេះគឺថា តើសង្រ្គាមត្រជាក់នឹងអាចផ្ទុះជាថ្មីដែរ ឬយ៉ាងណា?។ ក្រុមអ្នកវិភាគទូទៅបានយល់ឃើញថា ប្រហែលជាមិនអាចកើតមានជាថ្មីទេនៅក្នុងសតវត្សទី២១យើងនេះ ព្រោះថា អាមេរិក និងរុស្ស៊ីមិនមែនល្ងង់វ៉ៃគ្នាដោយសារតែប្រទេសអ៊ុយក្រែនមួយទេ។
អ៊ុយក្រែនស្គាល់អស្ថិរភាពនយោបាយតំាងពីក្រោយទទួលបានឯករាជ្យ
តំាងពីប្រទេសអ៊ុយក្រែនទទួលឯករាជ្យបាន ២៥ឆ្នំាមក អតីតសាធារណរដ្ឋសហភាពសូវៀតមួយនេះស្គាល់តែការបែកបាក់ ប្រេះឆាផ្ទៃក្នុងមកដល់សព្វថ្ងៃ។ នៅម្ខាង គឺក្រុមដែលមានសម្មានចិត្តចំពោះអឺរ៉ុប និងនៅម្ខាងទៀត គឺក្រុមដែលនៅមិនទាន់អាលោះអាល័យពីរុស្ស៊ីដែលជាអតីតគូស្នេហ៍។ ២៥ឆ្នំាក្រោយទទួលបានឯករាជ្យមក សម្មានចិត្តរវាងប្រជាជនអ៊ុយក្រែនដែលស្រឡាញ់អឺរ៉ុប និងប្រជាជនអ៊ុយក្រែនដែលស្រឡាញ់រុស្ស៊ីនៅតែមានឥទ្ធិពលខ្លំាង ព្រមទំាងបាន និងកំពុងពុះចែកអ៊ុយក្រែនជាពីរចំណែកទៀតផងនាពេលនេះ។
កន្លងមក ការផ្លាស់ប្តូររបបដឹកនំានៅអ៊ុយក្រែនក្រោយការជាប់ឆ្នោតភ្លាម ច្រើនធ្វើឡើងក្រោមរូបភាពបដិវត្តន៍ប្រជាជន។ ប្រភពវិបត្តិសព្វថ្ងៃក៏បានកើតចេញពីការធ្វើបដិវត្តន៍ផ្តួលរំលំថ្នាក់ដឹកនំាដែលមានទំនោររករុស្ស៊ី។ ដូច្នេះ ដើមចមនៃអស្ថិរភាពនយោបាយនៅអ៊ុយក្រែនពីពេលមុន និងពេលឥឡូវ គឺកើតចេញពីការបាក់បែកផ្ទៃក្នុងតែម្តង។ ការបែកបាក់ផ្ទៃក្នុងដែលបានផ្តល់ផលចំណេញឲ្យអ្នកផ្សេង ដូចករណីបាត់តំបន់គ្រីមេទៅខាងរុស្ស៊ីនាពេលថ្មីៗនេះ។ ដូច្នេះ មានតែការឯកភាពផ្ទៃក្នុងទេ ដែលអ៊ុយក្រែនអាចស្គាល់សុខសន្តិភាព និងទប់ស្កាត់ការបាត់បង់ទឹកដីបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ