វិបត្តិអ៊ុយក្រែន ៖ រុស្ស៊ីបរិហារពុតត្បុតបស្ចឹមលោក
ចុះផ្សាយនៅថ្ងៃ៖
ស្តាប់ - ០៧:១០
ម្សិលមិញ ក្រោយពីបានបើកប្រតិបត្តិការប្រឆាំងនឹងភេរវជន លោកប្រធានាធិបតីស្តីទីអ៊ុយក្រែន បានចេញបញ្ជាដាក់ឱសានវាទ ឱ្យពួកបះបោរចង់ផ្តាច់ទឹកដីស្និទ្ធនឹងម៉ូស្គូ ទម្លាក់អាវុធ និងចាកចេញពីស្ថាប័នរដ្ឋ នៅភាគខាងកើតប្រទេស ដែលពួកគេចូលកាន់កាប់ តាំងពីប៉ុន្មានថ្ងៃមុន។ នៅក្នុងសុន្ទរកថាទៅកាន់ប្រជាជាតិ លោកប្រធានាធិបតីក៏បានប្រកាសធ្វើប្រតិបត្តិការប្រឆាំងនឹងភេរវជនទ្រង់ទ្រាយធំដោយអាចមានប្រើកម្លាំងយោធាផង។ រុស្ស៊ីបានបញ្ចេញប្រតិកម្មភ្លាម បរិហារបញ្ជារបស់ប្រធានាធិបតីស្តីទី ថាជា”បញ្ជាឧក្រិដ្ឋប្រើកម្លាំងយោធាបង្ក្រាបការតវ៉ា” និងបរិហារពុតត្បុតរបស់ក្រុមបស្ចឹមប្រទេស ដែលស្ងប់ស្ងាត់ខ្លាំងចំពោះហេតុការណ៍នៅភាគខាងកើតប្រទេសអ៊ុយក្រែន។
ក្រោមការទាមទាររបស់រុស្ស៊ី ក្រុមប្រឹក្សាសន្តិសុខអង្គការសហប្រជាជាតិ បានបើកសម័យប្រជុំបន្ទាន់នៅយប់មិញ។ ហើយជាថ្មីម្តងទៀត ការប្រជុំនោះប្រព្រឹត្តទៅក្នុងបរិយាកាសតានតឹង និយាយស្តាប់គ្នាមិនយល់ដូចតម្លង់៧សណ្តានយ៉ាងដូច្នោះ។
កិច្ចប្រជុំគ្មានលទ្ធផល
បន្ទប់ប្រជុំក្រុមប្រឹក្សា ក្លាយជាសមរភូមិសង្គ្រាមត្រជាក់ ៖ ម្ខាងជារុស្ស៊ី ដែលមានជំហររឹងដូចដែកថែប ប្រកបដោយចរិតគំរាមកំហែង បានបរិហារទង្វើក្រុងគៀវ ថាជាកាយវិការបង្កហេតុ និងព្រមានអំពីគ្រោះថ្នាក់នៃការរីករាលដាលជាអំពើហិង្សាមិនអាចគ្រប់គ្រងបាន ក្លាយជាសង្គ្រាមស៊ីវិល នៅពេលប៉ុន្មានម៉ោងខាងមុខ នៅភាគខាងកើតប្រទេសអ៊ុយក្រែន។ រុស្ស៊ីបានទាមទារឱ្យអូតង់បញ្ឈប់ជំនួយដល់អ៊ុយក្រែន ដើម្បីកុំឱ្យក្រុងគៀវអាចប្រើកម្លាំងយោធាបាន និងគំរាមមិនទៅចូលប្រជុំចតុភាគីនៅទីក្រុងហ្សឺណែវថ្ងៃទី១៧មេសាទៀត។
ម្ខាងទៀត គឺក្រុមបស្ចឹមលោក សហរដ្ឋអាមេរិកនិងអឺរ៉ុប ជឿជាក់ថាគឺរុស្ស៊ី ជាអ្នកពីក្រោយខ្នងអំពើហិង្សានៅភាគខាងកើតអ៊ុយក្រែន នារយៈពេលប៉ុន្មានថ្ងៃចុងក្រោយនេះ។ ឯកអគ្គរដ្ឋទូតអាមេរិកប្រចាំអង្គការសហប្រជាជាតិបាននិយាយថា “ម៉ូស្គូជាអ្នកតាក់តែងអស្ថិរភាពនេះឡើង"។ ចំណែកអង់គ្លេសបានបង្ហាញអង្គប្រជុំនូវរូបថតផ្កាយរណប ឃើញទាហានរុស្ស៊ី ជិតបួនម៉ឺននាក់កំពុងដាក់ក្នុងស្ថានភាពត្រៀមចេញធ្វើប្រតិបត្តិការ។ សេណារីយោចាស់នៅគ្រីមេ អាចនឹងកើតឡើងជាថ្មីនៅភាគខាងកើត ព្រោះ រុស្ស៊ីរៀបឱកាសសម្រាប់យកមកធ្វើជាសម្អាងការបញ្ជូនយោធាមកធ្វើអន្តរាគមន៍។
ក្តីព្រួយបារម្ភជាទូទៅ
សេតវិមាន និងក្រសួងការបរទេសអាមេរិក មិនបានចេញសេចក្តីថ្លែងការណ៍ផ្លូវការមែនស្តីពីស្ថានភាពនៅអ៊ុយក្រែនពេលនេះ។ ការព្រមានដាក់ទណ្ឌកម្មបន្ថែមលើរុស្ស៊ី គឺបានប្រកាសឡើងតាំងពីមុនអ៊ុយក្រែនចេញធ្វើប្រតិបត្តិការនៅភាគខាងកើតប្រទេសម្ល៉េះ។ អាមេរិកបានផ្ទុកផ្តាក់ភារកិច្ចឱ្យឯកអគ្គរដ្ឋទូតអាមេរិកប្រចាំអង្គការសហប្រជាជាតិជាអ្នកពន្យល់អំពីជំហរអាមេរិក តាមកញ្ចក់ទូរទស្សន៍អេប៊ីស៊ី ដែលបានត្រឹមអះអាង ការវាយប្រហាររបស់ក្រុមប្រដាប់អាវុធនៅភាគខាងកើតមានសញ្ញាបញ្ជាក់ពី ការរួមដៃរបស់ម៉ូស្គូ។
ឯខាងអឺរ៉ុបវិញ បារាំង អង់គ្លេស អាល្លឺម៉ង់ ក្រុមប្រឹក្សាអឺរ៉ុប និងសហភាពអឺរ៉ុប សុទ្ធតែបានសម្តែងការព្រួយបារម្ភ ចាត់ទុកស្ថានការណ៍អ៊ុយក្រែនថាស្ថិតក្នុងគ្រោះថ្នាក់បំផុត ស្នើសុំឱ្យគ្រប់ភាគីអត់ធ្មត់។ ជំនួបប្រជុំថ្នាក់រដ្ឋមន្ត្រីការបរទេសសហភាពអឺរ៉ុប នឹងត្រូវប្រព្រឹត្តទៅនៅរសៀលនេះ។
រុស្ស៊ីបរិហារពុតត្បុតរបស់បស្ចឹមលោក
ប៉ុន្តែរុស្ស៊ីច្រឡោតខ្លាំងណាស់ ! គេក៏បានដឹងជាមុនថារុស្ស៊ីនឹងខឹងខ្លាំង។ អ្នកនាំពាក្យម៉ូស្គូ បានហៅបញ្ជារបស់ប្រធានាធិបតីស្តីទីអ៊ុយក្រែន ថាជា “បញ្ជាឧក្រិដ្ឋ”ប្រើទាហានបង្ក្រាបចលនាប្រឆាំងគួរឱ្យខ្មាសអៀន។ អ្វីដែលរុស្ស៊ីកាន់តែក្តៅក្រហាយ និងចង់បានការពន្យល់បំភ្លឺពីបស្ចឹមលោក ពិសេសពីសហរដ្ឋអាមេរិកនោះ គឺមានព័ត៌មានថា បញ្ជាឱ្យធ្វើប្រតិបត្តិការនៅភាគខាងកើតអ៊ុយក្រែនត្រូវបានសម្រេចក្រោយដំណើរទស្សនកិច្ចរបស់នាយកទីភ្នាក់ងារស៊ើបអង្កេតអាមេរិក សេអ៊ីអា នៅក្រុងគៀវ។ តើនេះមិនមែនជាពុតត្បុតរបស់ក្រុមបស្ចឹមលោកទេឬ ?! សម្រាប់រុស្ស៊ី បស្ចឹមប្រទេសបានត្រឹមតែអំពាវនាវដដែល ឱ្យរុស្ស៊ីឈប់លូកដៃ និងដកទ័ពចេញពី ព្រំដែន ប៉ុន្តែមិននិយាយស្តីអ្វីសោះទាក់ទងនឹងទង្វើវាយប្រហាររបស់រដ្ឋាភិបាលក្រុងគៀវនៅភាគខាងកើតម្សិលមិញ ដើម្បីបង្ក្រាបចលនាបះបោរ។
អតីតប្រធានាធិបតីអ៊ុយក្រែន វិចទ័រ យ៉ាណូកូវិច ដែលនិរទេសខ្លួនទៅជ្រកក្រោននៅរុស្ស៊ីក្រោយធ្លាក់ពីអំណាច បានបញ្ចេញប្រតិកម្មដែរ ថា អ៊ុយក្រែនកំពុងផុងជើងម្ខាងក្នុងសង្គ្រាមស៊ីវិល ! រដ្ឋាភិបាលក្រុងគៀវបានប្រើកម្លាំងទាហានមកប្រឆាំងនឹងប្រជាជនស៊ីវិល ដែលលោកមិនដែលធ្វើទាល់តែសោះសូម្បីតែជាមួយក្រុមជ្រុលនិយម។ លោកគំរាមនាំរដ្ឋាភិបាលបណ្តោះអាសន្ននេះទៅតុលាការ។
យុទ្ធសាស្ត្រខោកផង អង្អែលផង
តើប្រធានាធិបតីស្តីទីអ៊ុយក្រែន និងអ្នកទទួលខុសត្រូវក្រុងគៀវ មានបំណងពិតចង់នឹងប្រើកម្លាំងយោធានៅភាគខាងកើតប្រទេស ដើម្បីការពារបណ្តាជនអ៊ុយក្រែននិយាយភាសារុស្ស៊ីមែនឬយ៉ាងណា បើរុស្ស៊ីគំរាមកំហែងខ្លាំងមែន។ ប៉ុន្តែតាមការពិតទៅនោះ ប្រធានាធិបតីអ៊ុយក្រែនពេលនេះ មិនអាចនៅសៀមឈរអោបដៃមើលតំបន់ភាគខាងកើត របូតដាច់ខ្លួចចេញពីអ៊ុយក្រែន ដូចករណីគ្រីមេ ហើយជំងឺឆ្លងនេះអាចរីករាលដាល់ពេញផ្ទៃប្រទេសបានទៀតឡើយ។ លោកត្រូវតែហ៊ានប្រថុយ ធ្វើសកម្មភាពអ្វីមួយ។ ជាមួយនឹងការប្រកាសប្រើកម្លាំងបង្ក្រាបពួកបះបោរ លោកទួកឈីណុះ ចង់ដាក់សម្ពាធលើក្រុមបស្ចឹមលោក ឱ្យចូលជួយ កាន់តែមានប្រសិទ្ធភាពរក្សាបូរណភាពដែនដីអ៊ុយក្រែន ពីការឈ្លានពានរបស់រុស្ស៊ី។ ទន្ទឹមនឹងការប្រើកម្លាំង អំបាញ់មិញនេះទៀត លោកប្រធានាធិបតីបានសាកល្បងបើកច្រកផ្លូវមួយទៀត ដែលទន់ភ្លន់ជាង ដោយបានប្រកាសអំពីលទ្ធភាពធ្វើប្រជាមតិជាតិ ស្តីអំពីលក្ខន្តិកៈប្រទេសអ៊ុយក្រែន ទន្ទឹមគ្នានឹងការបោះឆ្នោតប្រធានាធិបតី ថ្ងៃ ២៥ឧសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ