ពិធីឡើងកាន់តំណែងប្រធានាធិបតីថ្មីនៅរុស្ស៊ី
ថ្ងៃចន្ទ ទី៧ ឧសភានេះ នៅវិមានក្រេមឡាំងក្រុងម៉ូស្គូ មានប្រព្រឹត្តទៅ ពិធីទទួលសច្ចាប្រណិធានចូលកាន់តំណែងជាប្រធានាធិបតីថ្មីនៃសហព័ន្ធរុស្ស៊ី ដោយលោក វ៉្លាឌីមៀរ ពូទីន អាយុ៥៩ឆ្នាំ ជំនួសប្រធានាធិបតីផុតអាណត្តិ លោក ឌ្មីទ្រី មេដវេដេវ អាយុ៤៦ឆ្នាំ។
ចុះផ្សាយនៅថ្ងៃ៖
ស្តាប់ - ០២:២៧
គួររម្លឹកថា លោកពូទីន ក្នុងឋានៈជានាយករដ្ឋមន្ត្រី បានឈ្នះឆ្នោតជាប់ជាប្រធានាធិបតី ដោយសំឡេងគាំទ្រដល់ទៅជាង៦៣% គឺក្នុងការបោះឆ្នោត កាលពីថ្ងៃទី៤ មីនាកន្លងទៅ។ លោកពូទីន ធ្លាប់បានកាន់តំណែងកំពូលនេះនៅរុស្ស៊ីអស់២អាណត្តិទៅហើយ ពីឆ្នាំ២០០០ ដល់២០០៨ ដែលកាលណោះ ១ អាណត្តិៗមានរយៈពេល៤ឆ្នាំ។ ហើយសម្រាប់អាណត្តិថ្មីរបស់គាត់ ចាប់ពីអំណើះតទៅ ស្របនឹងវិសោធនកម្មដែលមានអនុម័ត ភ្ជាប់ទៅលើរដ្ឋធម្មនុញ្ញ គឺនឹងពន្យារទៅ រហូតដល់៦ឆ្នាំ។
ដោយបើកពិធីដ៏មហោឡារិកថ្ងៃនេះ លោកមេដវេដេវ ជាប្រធានាធិបតីចាកចេញពីតំណែងខ្លួនបានថ្លែងសុន្ទរកថា សំដែងសេចក្តីសោមនស្សរីករាយ ដោយអំណាចកំពូលនៅរុស្ស៊ី បានឆ្លងទៅក្នុងដៃលោកពូទីន ជា ”អ្នកនយោបាយសម្បូណ៌បទពិសោធន៍ និងជាបុរសខ្លាំង”ឲ្យបានប្រកប ដោយជោគជ័យ ក្នុងតួនាទីជាប្រមុខរដ្ឋ ពោរពេញទៅដោយនាទីទទួលខុសត្រូវខាងសមិទ្ធិនយោបាយក្នុង និងក្រៅប្រទេស។
បន្ទាប់មក លោកប្រធានតុលាការធម្មនុញ្ញ វ៉ាឡេរី ហ្ស័កគីន បានប្រកាសថា ស្របនឹងរដ្ឋធម្មនុញ្ញប្រធានាធិបតីថ្មី មុននឹងចូលកាន់តំណែងខ្លួន ត្រូវទទួលពាក្យសម្បថ។ ដោយដាក់បាតដៃស្តាំរបស់គាត់លើក្រាំងរដ្ឋធម្មនុញ្ញ លោកពូទីនបានថ្លែងថា ៖“ពេលបំពេញអំណាចខ្លួន ជាប្រធានាធិបតីនៃសហព័ន្ធរុស្ស៊ី ខ្ញុំសូមស្បថថា នឹងគោរព ហើយការពារសិទ្ធិ និងសេរីភាពពលរដ្ឋ គោរព និងការពាររដ្ឋធម្មនុញ្ញសហព័ន្ធរុស្ស៊ី ការពារអធិបតេយ្យ និងឯករាជ្យ សន្តិសុខ និងបូរណភាពរដ្ឋ ហើយបម្រើប្រជាជនដោយស្មោះត្រង់។
ជាការកត់សម្គាល់ ឃ្លាសម្បថនេះ មានពាក្យ ៣ម៉ាត់ខ្លីជាងពាក្យសម្បថដែលត្រូវបានថ្លែងក្នុងពិធីទទួលសច្ចាប្រណិធានជាលើកទី១ នៅក្នុងលោក កាលក្នុងឆ្នាំ១៧៨៩ ដោយប្រធាធាធិបតីទី១ នៃស.រ.អា. លោក George Washington។
លុះក្រោយពីលោកពូទីនបានថ្លែងពាក្យសម្បថចប់ទៅ ប្រធានតុលាការធម្មនុញ្ញបានប្រកាសយ៉ាងឱឡារិកថា ចាប់ពីអំណើះតទៅ លោក វ៉្លាឌីមៀរ ពូទីន ជាប្រធានាធិបតីពេញសិទ្ធិនៃសហព័ន្ធរុស្ស៊ី។ ក្នុងសុន្ទរកថាខ្លួនជាប្រធានាធិបតីថ្មីទៅហើយ លោកពូទីនបានសន្យាបរិច្ចាគរាល់កម្លាំងកាយចិត្ត ក្នុងនាមនៃសុខុមាលភាពប្រជាពលរដ្ឋ ដើម្បីធានានូវសន្តិសុខ បូរណភាពដែនដីប្រទេស និងឯករាជ្យជាតិ ព្រមទាំងដើម្បីលើកកម្ពស់ប្រទេសរុស្ស៊ីលើឆាកអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ