របាយការណ៍ថ្មីរបស់ AIEA ដែលបញ្ជាក់ពីកម្មវិធីនុយក្លេអ៊ែរយោធារបស់អ៊ីរ៉ង់
នៅថ្ងៃសុក្រ ទី២៤ កុម្ភៈម្សិលមិញ ទីភ្នាក់ងារថាមពលបរមាណូអន្តជាតិ ហៅកាត់ជាភាសាបារំាងថា AIEA បានចេញផ្សាយរបាយការណ៍ថ្មីមួយកម្រាស់ ១១ទំព័រស្តីពីកម្មវិធីនុយក្លេអ៊ែរអ៊ីរ៉ង់។ ជាថ្មីម្តងទៀត AIEA បានបញ្ជាក់ពីអសមត្ថភាពរបស់ខ្លួនក្នុងការបញ្ជាក់ឲ្យបានច្បាស់លាស់ ពីធាតុពិតនៃកម្មវិធីនុយក្លេអ៊ែររបស់ប្រទេសអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០១:៥៥
ក៏ដូចជារបាយការណ៍លើកមុនដែរ AIEA មិនញញើតនឹងប្រឈមមុខទល់នឹងរបបទីក្រុងតេហេរ៉ង់ទេ។ នៅក្នុងរបាយការណ៍ថ្មីកម្រាស់ ១១ទំព័ររបស់ខ្លួន AIEA បានសរសេរច្បាស់ៗពីអសមត្ថភាពរបស់ខ្លួនក្នុងការបញ្ជាក់ថា កម្មវិធីនុយក្លេអ៊ែររបស់អ៊ីរ៉ង់ ជាកម្មវិធីនុយក្លេអ៊ែរស៊ីវិល។ ទន្ទឹមគ្នានេះ និងក៏ដូចជានៅរបាយការណ៍របស់ខ្លួនកាលពីដើមខែវិច្ឆិកា ឆ្នំា ២០១១ ដែរ AIEA បានសម្តែងការព្រួយបារម្ភរបស់ខ្លួនទាក់ទងនឹងកម្មវិធីនុយក្លេអ៊ែររបស់អ៊ីរ៉ង់ក្នុងគោលដៅយោធា។ របាយកាណ៍ថ្មីរបស់ AIEA បានធ្លាក់មក ចំពេលដែលសហគមន៍អន្តរជាតិកំពុងមានមន្ទិលសង្ស័យកាន់តែខ្លំាងឡើងៗ ពីសមត្ថភាពរបស់អ៊ីរ៉ង់ក្នុងការផលិតគ្រាប់បែកបរមាណូ។
គួរជម្រាបជូនថា ក្នុងរយៈពេលជិតមួយខែចុងក្រោយនេះ ក្រុមអ្នកឯកទេសរបស់AIEA បានទៅបំពេញបេសកកម្មចំនួនពីរលើកនៅក្នុងប្រទេសអ៊ីរ៉ង់ ដើម្បីព្យាយាមស្វែងរកការពិតទាក់ទងនឹងការមន្ទិលសង្ស័យមួយចំនួនជុំវិញកម្មវិធីនុយក្លេអ៊ែររបស់ប្រទេសអ៊ីរ៉ង់។ ក៏ប៉ុន្តែ លទ្ធផលនៃបេសកកម្មទំាងពីរលើកត្រូវបាននាយក AIEA ប្រកាសពីបរាជ័យ និងការខកចិត្ត។ បើយោងតាមប្រភពមួយដែលអាចទុកចិត្តបានឲ្យដឹងថា ក្រុមអ្នកឯកទេសរបស់AIEA ដែលបានទៅអ៊ីរ៉ង់ទំាងពីរលើកចុងក្រោយនេះ មិនអាចជួបសន្ទនាផ្ទាល់ជាមួយអ្នកទទួលខុសត្រូវជាន់ខ្ពស់អ៊ីរ៉ង់ទេ។
ម្យ៉ាងទៀត រដ្ឋអំណាចអ៊ីរ៉ង់ក៏បានបដិសេធសំណើរបស់ក្រុមអ្នកឯកទេស AIEA ដែលចូលទៅពិនិត្យមូលដ្ឋានយោធា Parchin ដែលស្ថិតនៅខេត្តមួយក្បែរទីក្រុងតេហេរ៉ង់។ ប៉ុន្តែលោក Ali Asghar Soltanieh អ្នកតំណាងអ៊ីរ៉ង់នៅ AIEA បានបញ្ជេញប្រតិកម្មថា ដើម្បីអាចចូលទៅពិនិត្យកន្លែងណាមួយ គេត្រូវតែមានការព្រមព្រៀងគ្នាជាមុនសិន។
យ៉ាងណាក៏ដោយ AIEA ក៏បានប្រកាសឲ្យដឹងផងដែរ ពីបំណងរបស់អ៊ីរ៉ង់ដែលចង់បន្តកិច្ចសហប្រតិបត្តិការជាមួយ AIEA ដើម្បីបង្ហាញពីធាតុពិតនៃកម្មវិធីនុយក្លេអ៊ែរអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ