មហាសេដ្ឋីប្រេងអេមីរ៉ាតអារ៉ាប់រួមសាងសង់ព្រលានយន្តហោះធំជាងគេក្នុងលោក
អេមីរ៉ាតអារ៉ាប់រួមនឹងមានអាកាសយានដ្ឋានដ៏ធំជាងគេក្នុងលោក ដែលមានសមត្ថភាពអាចទទួលអ្នកដំណើរប្រមាណ ២៦០លាននាក់ក្នុងមួយឆ្នាំ។ នៅក្នុងសារ ចុះផ្សាយលើបណ្តាញ X កាលពីថ្ងៃអាទិត្យទី ២៨មេសា នាយករដ្ឋមន្រ្តីរបស់អេមីរ៉ាតអារ៉ាប់រួម លោកមូហាម៉េដ បិន រ៉ាស៊ីដ អាល់ ម៉ាកធូម បានសរសេរថា លោកទើបអនុម័តផែនការសាងសង់ព្រលានយន្តហោះថ្មីដែលត្រូវការចំណាយទឹកប្រាក់ជាង ៣៤ពាន់លានដុល្លារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៦
មហាសេដ្ឋីប្រេង អេមីរ៉ាតអារ៉ាប់រួមបានបោះមួយជំហានធំដើម្បីពង្រឹងតួនាទីរបស់ខ្លួនក្នុងនាមជាប្រទេសនាំមុខគេនៅក្នុងពិភពលោក ក្នុងវិស័យអាកាសចរណ៍ស៊ីវិល។ តាមរយៈសារក្នុងបណ្តាញសង្គម X កាលពីថ្ងៃអាទិត្យទី ២៨មេសា ប្រមុខដឹកនាំអេមីរ៉ាតអារ៉ាប់រួម លោកមូហាម៉េដ បិន រ៉ាស៊ីដ អាល់ ម៉ាកធូម បានប្រកាសថា ប្រទេសរបស់លោកចាប់ផ្តើមការដ្ឋានសាងសង់អាកាសយានដ្ឋានថ្មី ដែលនឹងធំជាងគេ នៅក្នុងពិភពលោក និងមានសមត្ថភាពទទួលអ្នកដំណើរ២៦០លាននាក់ក្នុងមួយឆ្នាំ។
ព្រលានយន្តហោះយក្សរបស់អេមីរ៉ាត់អារ៉ាប់រួម នឹងលេចធ្លោនៅទីវាលខ្សាច់ ចម្ងាយជាង៤៥គីឡូម៉ែត្រពីព្រលានយន្តហោះឌូបៃសព្វថ្ងៃ។ ជាការពង្រីកព្រលានយន្តហោះចាស់ ឈ្មោះ Al-Maktoum ដែលសព្វថ្ងៃ គេប្រើជាកន្លែងសម្រាប់ចតយន្តហោះរបស់ក្រុមហ៊ុនហោះហើរអេមីរ៉ាត កន្លែងចុះចតរបស់យន្តហោះប្រណិតរបស់អ្នកមាន ឬកន្លែងតាំងពិព័រណ៌យន្តហោះរបស់អេមីរ៉ាតអារ៉ាប់រួម។
យោងតាមនាយករដ្ឋមន្រ្តីអេមីរ៉ាតអារ៉ាប់រួម ជាមួយទឹកប្រាក់សាងសង់ជាង ៣៤ពាន់លានដុល្លារ Al-Maktoumនឹងក្លាយជាអាកាសយានដ្ឋានដ៏ធំជាងគេក្នុងពិភពលោក ធំជាង អាកាសយានដ្ឋានក្រុងឌូបៃដល់ទៅ ៥ដង ដោយមានទីលានផ្លូវសម្រាប់ហោះចេញចូល ចំនួន ៦ខ្សែ
ខណៈពេលដែលអាកាសយានដ្ឋានជាទូទៅ ដូចជាអាកាសយានដ្ឋានឌូបៃជាដើម មានតែ២ខ្សែផ្លូវប៉ុណ្ណោះ។ អាកាសយានដ្ឋាន Al-Maktoum នឹងមានច្រកទ្វារចូលទៅកាន់យន្តហោះប្រមាណ ៤០០ ដែលជាចំនួនដ៏ច្រើនមិនធ្លាប់មាននៅតាមព្រលានយន្តហោះ។
អនាគតព្រលានយន្តហោះនឹងអាចលេចចេញជារូបរាង នៅ១០ឆ្នាំខាងមុខដើម្បីទទួលអ្នកដំណើរជាង១៥០លាននាក់ ហើយនិងអាចទទួល២៦០លាននាក់ក្នុងមួយឆ្នាំ នៅពេលព្រលានយន្តហោះចាប់ដំណើរការពេញលេញ។ រដ្ឋាភិបាលអេមីរ៉ាតអារ៉ាប់រួម ចង់បានអាកាសយានដ្ឋានថ្មី ទៅជួយរំលែកបន្ទុក ឬជំនួសតែម្តង អាកាសយានដ្ឋានឌូបៃ ដែលសព្វថ្ងៃនេះមមាញឹកខ្លាំង និង អាចទទួលអ្នកដំណើរប្រមាណ ១២០លាននាក់ ប៉ុន្តែ មិនអាចពង្រីកខ្លួនឲ្យមានសមត្ថភាពទទួលមនុស្សច្រើនជាងនេះ ដោយសារទីក្រុងព័ទ្ធជុំជិត។ ប្រធានក្រុមហ៊ុនហោះហើរ អេមីរ៉ាត ដែលជាក្រុមហ៊ុនរដ្ឋ គឺលោក អាម៉េដ បិន សាអេដ អាល់ ម៉ាកធូម បាននិយាយថានៅក្រោយការចប់ការសាងសង់ នៅប៉ុន្មានឆ្នាំខាងមុខ គេនឹងផ្ទេររាល់ដំណើរការហោះហើរពីអាកាសយានដ្ឋានឌូបៃទៅកាន់អាកាសយានដ្ឋានថ្មី ។
ផ្ទុយពីព្រលានយន្តហោះឌូបៃ ព្រលានយន្តហោះថ្មីស្ថិតនៅកណ្តាលវាលខ្សាច់។ ដូច្នេះ បើតាមប្រមុខរដ្ឋាភិបាលអេមីរ៉ាតអារ៉ាប់រួម គម្រោងសាងសង់ព្រលានយន្តហោះដ៏ធំជាងគេនៅក្នុងពិភពលោក នឹងដំណើរការទៅស្របគ្នាជាមួយផែនការបង្កើតក្រុងថ្មីរបស់អេមីរ៉ាត អារ៉ាប់រួម ដើម្បីដោះស្រាយវិបត្តិលំនៅឋាន។
មុនឹងអាចចាប់ផ្តើមការដ្ឋានសាងសង់ព្រលានយន្តហោះថ្មី អេមីរ៉ាត់អារ៉ាប់រួមធ្លាប់ជួបឧបសគ្គ និងលើកពេលជាច្រើនដង ដោយសារវិបត្តិហិរញ្ញវត្ថុសកលឆ្នាំ ២០០៩។ នៅប៉ុន្មានសប្តាហ៍មុននេះ ឌូបៃទើបរងគ្រោះត្រូវព្យុះភ្លៀងបោកបក់ រហូតធ្វើឲ្យជន់លិចព្រលានយន្តហោះ ចំណែកយន្តហោះជាប់គាំងក្នុងទឹក មិនអាចហោះហើរបាន។
យ៉ាងណាក៏ដោយ ជាប្រទេសមហាសេដ្ឋីប្រេងដែលចង់ដើរតួនាទីសំខាន់នៅក្នុងឆាកអន្តរជាតិ អេមីរ៉ាតអារ៉ាប់រួមនៅតែបន្តវិនិយោគទឹកប្រាក់រាប់ពាន់លានដុល្លារដើម្បីក្លាយជាប្រទេសគោលដៅទេសចរណ៍ និងកន្លែងឆ្លងកាត់សំខាន់របស់យន្តហោះនៅក្នុងពិភពលោក។
នៅឆ្នាំ ២០២២ ព្រលានយន្តហោះឌូបៃរបស់ប្រទេសដ៏តូចមួយនេះបានទទួលអ្នកដំណើរប្រមាណ ៦៦ពាន់លាននាក់ក្នុងមួយឆ្នាំ។ ចំនួននេះបានធ្លាក់ចុះបើប្រៀបធៀបនឹងឆ្នាំ ២០១៩ មុនសម័យកូវីដ នៅពេលអាកាសយានដ្ឋានឌូបៃទទួលអ្នកដំណើរ ជាង ៨៦លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ