តើអ៊ីស្រាអែលចង់និងអាចវាយប្រហារដោយខ្លួនឯងទៅលើអៀរ៉ង់ដែរឬទេ?
ប៉ុន្មានថ្ងៃចុងក្រោយនេះ អាមេរិកនិងអឺរ៉ុបបាននិងកំពុងបន្តខ្នះខ្នែងទប់ចិត្តអ៊ីស្រាអែលកុំឲ្យធ្វើប្រតិបត្តិការយោធាវាយប្រហារទៅលើប្រទេសអៀរ៉ង់។ ទន្ទឹមនេះ អៀរ៉ងកំពុងបន្តធ្វើសមយុទ្ធ ត្រៀមការពារទីតាំងនុយក្លេអ៊ែរសំខាន់ៗរបស់ខ្លួន។ រីឯមេបញ្ជាការកងទ័ពអ៊ីស្រាអែលវិញ គឺឧត្តមសេនីយ៍Benny Gantz បានថ្លែងរបៀបជាការព្រមានបា្រប់ទីក្រុងតេហេរ៉ង់ដោយប្រយោលថា«អ៊ីស្រាអែលត្រូវតែចេះការពារខ្លួនឯង ហើយការថែរក្សាសន្តិសុខនៃប្រទេស គឺជាភារកិច្ចរបស់យើងដែលជាកងទ័ព»។ តើអ៊ីស្រាអែលតែឯងមានសមត្ថភាពយោធាគ្រប់គ្រាន់ដែរឬទេ ដើម្បីវាយប្រហារទៅលើអៀរ៉ង់?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣៤
អ៊ីស្រាអែលដែលឡោមព័ទ្ធដោយសត្រូវតាំងពីឆ្នាំ១៩៤៨មកម្ល៉េះ មិនដែលរារែកឡើយក្នុងការធ្វើសង្គ្រាម និងធ្វើប្រតិបត្តិការយោធាវាយប្រហារទៅលើទីតាំងយុទ្ធសាស្រ្តនានារបស់បណ្តាប្រទេសសត្រូវ។ រដ្ឋថ្មីថ្មោងមួយនេះដែលទើបមានចំណាស់៦៤ឆ្នាំប៉ុណ្ណោះ បានធ្វើសង្គ្រាមធំៗជាមួយបណ្តាប្រទេសអារ៉ាប់ក្នុងតំបន់ ចំនួនបួនដងរួចមកហើយ គឺនៅឆ្នាំ១៩៤៨ ១៩៥៦ ១៩៦៧ និង១៩៧៣។ មិនតែប៉ុណ្ណោះ អ៊ីស្រាអែលក៏ធ្លាប់បានវាយប្រហារដែរទៅលើមជ្ឈមណ្ឌលនុយក្លេអ៊ែររបស់អៀរ៉ាក់នៅឆ្នាំ១៩៨១ និងរបស់ស៊ីរីនៅឆ្នាំ២០០៧។
ម្ល៉ោះហើយ ក្នុងពេលមួយដែលប្រទេសអៀរ៉ង់កំពុងលួចផលិតអាវុធនុយក្លេអ៊ែរ និងក្នុងពេលមួយដែលទីក្រុងតេហេរ៉ង់ចេះតែគំរាមម្តងហើយម្តងទៀតថា នឹងលុបបំបាត់អ៊ីស្រាអែលចេញពីផែនទីពិភពលោក ប្រតិបត្តិការយោធារបស់អ៊ីស្រាអែលទៅលើទីតាំងនុយក្លេអ៊ែររបស់ប្រទេសអៀរ៉ង់ កំពុងក្លាយជាលទ្ធភាពមួយដែលពិបាកចៀសវាង។ ដូចនេះ សំណួរដែលចោទឡើងគឺមិនមែន«តើអ៊ីស្រាអែលអាចនឹងវាយប្រហារទៅលើអៀរ៉ង់ដែរឬទេ?» តែគឺ «តើអ៊ីស្រាអែលមានសមត្ថភាពយោធាគ្រប់គ្រាន់ដែរឬទេ ដើម្បីវាយប្រហារទៅលើអៀរ៉ង់ដោយខ្លួនឯង?»
បើមានមែន ប្រតិបត្តិការយោធារបស់អ៊ីស្រាអែលនឹងសំដៅទៅលើទីតាំងនុយក្លេអ៊ែរសំខាន់ៗទាំងបួនរបស់អៀរ៉ង់ នោះគឺទីតាំងនុយក្លេអ៊ែរនៅNatanz នៅFordo នៅArak និងនៅIspahan។ គឺសុទ្ធសឹងជាចំណុចយុទ្ធសាស្ត្រដែលមានចម្ងាយប្រមាណ១ ៥០០គ.ម យ៉ាងតិចពីប្រទេសអ៊ីស្រាអែល។ នេះជាបញ្ហាទីមួយដែលនឹងចោទឡើង ពីព្រោះយន្តហោះប្រដេញរបស់អ៊ីស្រាអែល គឺយន្តហោះធុន F-151 និងធុនF-161 ដែលអាចហោះទៅមកបានយ៉ាងឆ្ងាយ៣០០០គ.ម នឹងត្រូវការចាក់សាំងនៅលើអាកាស។ មិនតែប៉ុណ្ណោះ បើយោងទៅតាមពួកអ្នកជំនាញយោធាអាមេរិកាំង អ៊ីស្រាអែលនឹងត្រូវការប្រើប្រាស់យន្តហោះប្រដេញមិនតិចជាង១០០គ្រឿងទេ ដើម្បីសង្ឃឹមថានឹងអាចទទួលជោគជ័យបាននៅក្នុងប្រតិបត្តិការយោធានេះ ហើយជោគជ័យនេះទៀតសោតគឺវាមិនប្រាកដប្រជាទៅទៀត។ ក៏ប៉ុន្តែ ក្រុមនាយទាហានអ៊ីស្រាអែលដែលហាក់ដូចជាចង់ដាក់សម្ពាធចិត្តសាស្ត្រទៅលើអៀរ៉ង់កាន់តែខ្លាំង បាននិយាយអះអាងថាការវាយប្រហារទៅលើអៀរ៉ង់ គឺជាប្រតិបត្តិការមួយដែលមានលក្ខណៈពិបាក តែដែលគេអាចធ្វើទៅកើត។
ក្រៅពីបញ្ហាចម្ងាយ ក៏មានចោទឡើងដែរបញ្ហាផ្លូវអាកាសដែលកងទ័ពអ៊ីស្រាអែលត្រូវដោះស្រាយនិងជ្រើសរើស។ អាចមានសេណរីយ៉ូបី។ ទីមួយ គឺផ្លូវអាកាសតាមច្រកប៉ែកខាងជើងនៃប្រទេស ច្រកដែលនឹងតម្រូវឲ្យយន្តហោះចម្បាំងអ៊ីស្រាអែលហោះកាត់តាមប្រទេសតួកគី។ ទីពីរ គឺផ្លូវអាកាសតាមច្រកប៉ែកខាងត្បូងនៃប្រទេស ដោយត្រូវហោះកាត់តាមប្រទេសអារ៉ាប៊ីសាវឌីត។ និងទីបី គឺជាផ្លូវអាកាស ដែលនឹងតម្រូវឲ្យមានការហោះហើរឆ្លងកាត់តាមប្រទេសហ៊្សកដានីនិងប្រទេសអៀរ៉ាក់។ សេណារីយ៉ូចុងក្រោយមួយនេះ អាចជាជម្រើសរបស់អ៊ីស្រាអែលពីព្រោះវាជាផ្លូវជិតជាងគេ ហើយបើមានការអនុញ្ញាតពីប្រទេស ហ៊្សកដានី វាគឺជាការស្រេច ដ្បិតប្រទេសអៀរ៉ាក់បច្ចុប្បន្នគ្មានប្រព័ន្ធការពារអាកាសទេ មានន័យថា យន្តហោះចម្បាំងរបស់អ៊ីស្រាអែលអាចនឹងហោះកាត់ដែនអាកាសរបស់ប្រទេសនេះ ដោយគ្មានការភ័យខ្លាច។
ក្រៅពីបញ្ហាចម្ងាយ នៅមានបញ្ហាជុំវិញប្រសិទ្ធភាពនៃសព្វាវុធទៀត។ តើគ្រឿងសព្វាវុធរបស់អ៊ីស្រាអែលអាចទម្លុះផ្ទាំងស៊ីបមួយដែលឋិតនៅក្រោមដីបានដែរឬទេ ពីព្រោះម៉ាស៊ីនប្រតិករនុយក្លេអ៊ែររបស់អៀរ៉ង់ សុទ្ធតែត្រូវបានកប់ជ្រៅក្រោមដី និងត្រូវបានស្រោបការពារដោយបេតុងទៅទៀត?
ត្រង់ចំណុចនេះ និងបើយោងទៅតាមពួកអ្នកជំនាញខ្លះ អ៊ីស្រាអែលមានគ្រាប់បែកធុនGBU-28 ដែលជាគ្រាប់បែកអាចទម្លុះបេតុងបាន និងដែលមានទម្ងន់រហូតដល់ទៅ២ ២៥០គីឡូ ប៉ុន្តែគេមិនដឹងថា គ្រាប់បែកប្រភេទនេះ អាចទម្លុះជ្រៅទៅក្នុងដីបានប៉ុន្មានម៉ែត្រទេ។
និយាយរួម អ៊ីស្រាអែលដែលមិនអាចបណ្តោយឲ្យទីក្រុងតេហេរ៉ង់ចំណេញពេលវេលាក្នុងការផលិតគ្រាប់បែកបរមាណូ ពិតជាចង់វាយប្រហារទៅលើទីតាំងនុយក្លេអ៊ែរសំខាន់ៗរបស់អៀរ៉ង់។ ប៉ុន្តែ វាជាប្រតិបត្តិការយោធាមួយសែនពិបាក បើសិនជាអ៊ីស្រាអែលត្រូវធ្វើការវាយប្រហារដោយខ្លួនឯង។ ប្រតិបត្តិការយោធានឹងមានលក្ខណៈងាយស្រួលនិងប្រកបទៅដោយប្រសិទ្ធភាពខ្ពស់ បើសិនជាអាមេរិកនិងអ៊ីស្រាអែលពួតដៃគ្នាវាយប្រហារទៅលើអៀរ៉ង់ ដោយសារថាអាមេរិកអាចនឹងប្រើប្រាស់មូលដ្ឋានយោធារបស់ខ្លួននៅបារ៉ែន និងនៅកៀហ្សីស៊ីស្ថាន។ មិនតែប៉ុណ្ណោះ អាមេរិកក៏អាចបាញ់ពីនាវាចម្បាំងរបស់ខ្លួនប្រចាំនៅក្នុងតំបន់មីស៊្សីលម្យ៉ាងដែលជាភាសាអង់គ្លេសគេហៅថាCruise ទៅលើទីតាំងនុយក្លេអ៊ែររបស់អៀរ៉ង់។ ក៏ប៉ុន្តែ ក្នុងខណៈនេះ ទីក្រុងវ៉ាស៊ីនតោនដូចជាមិនទាន់ចង់ប្រថុយប្រថានធ្វើអន្តរាគមន៍យោធាទៅលើប្រទេសសត្រូវមួយនេះរបស់ខ្លួននៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ