នុយក្លេអ៊ែរ៖ អ៊ីរ៉ង់ប្រកាសប្រាប់ពីការជឿនលឿននៃកម្មវិធីបរមាណូហើយត្រៀមជាស្រេចនឹងចរចា
ប្រទេសអ៊ីរ៉ង់បានប្រកាសប្រាប់ឲ្យដឹងកាលពីថ្ងៃពុធម្សិលមិញពីការជឿនលឿនថ្មីៗទៀតជាច្រើននៃកម្មវិធីនុយក្លេអ៊ែររបស់ខ្លួន ជាពិសេសពាក់ព័ន្ធនឹងការរៀបចំឧបករណ៍ centrifugeuses ឲ្យប្រកបដោយប្រសិទ្ធិភាព ហើយនិងការផលិតឥន្ធនៈចម្រើនធាតុ២០%។ ទន្ទឹមគ្នានេះ ទីក្រុងតេហេរ៉ង់បានថ្លែងថា គេត្រៀមលក្ខណៈជាស្រេចនឹងចាប់មានកិច្ចចរចាឡើងវិញជាមួយប្រទេសមហាអំណាច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ការចម្រើនធាតុជាតិ uranium គឺជាអធិករណ៍ដ៏សំខាន់និងជាយូរឆ្នាំមកហើយរវាងប្រទេសអ៊ីរ៉ង់និងសហគមន៍អន្តរជាតិ ដែលបារម្ភខ្លាចក្រែងកម្មវិធីនុយក្លេអ៊ែររបស់តេហេរ៉ង់មានកម្មវត្ថុយោធា ទោះបីជាប្រទេសអ៊ីរ៉ង់បានឆ្លើយបដិសេធដដែលៗយ៉ាងណាក្តី។
ទូរទស្សន៍អ៊ីរ៉ង់បានផ្សព្វផ្សាយកាលពីថ្ងៃពុធម្សិលមិញដោយផ្ទាល់បង្ហាញឲ្យឃើញនូវ ការយកបន្ទះឥន្ធនៈនុយក្លេងអ៊ែរចម្រើនធាតុ២០%ដាក់បញ្ចូលទៅក្នុងម៉ាស៊ីនប្រតិករស្រាវជ្រាវនៅទីក្រុងតេហេរ៉ង់ ដែលផលិត isotopes សម្រាប់អ្នកមានជម្ងឺមហារីក។
ពិធីនេះបានប្រព្រឹត្តទៅដោយមានវត្តមានរបស់លោកប្រធានាធិបតីអ៊ីរ៉ង់ Mahmoud Ahmadinejad និងក្រុមគ្រួសារនៃអ្នកវិទ្យាសាស្ត្រនុយក្លេអ៊ែរអីរ៉ង់ជាច្រើននាក់ដែលបានត្រូវគេធ្វើឃាត ហើយដែលទីក្រុងតេហេរ៉ង់យល់ថាជាស្នាដៃរបស់ក្រុមអ្នកយកការណ៍សម្ងាត់អាមេរិកាំងនិងអ៊ីស្រាអែល។
ស្របគ្នានេះ លោកប្រធានាធិបតីអ៊ីរ៉ង់ Mahmoud Ahmadinejad បានថ្លែងឲ្យដឹងថា កម្មវិធីនុយក្លេអ៊ែរអ៊ីរ៉ង់បានរៀបចំឲ្យមានសកម្មភាពនូវ ឧបករណ៍ centrifugeuses ថ្មីទៀតប្រមាណ៣ ០០០ នៅមជ្ឈមណ្ឌលចម្រើនធាតុនៅតំបន់ Natanz (ឋិតនៅប៉ែកកណ្តាលនៃប្រទេស)។ ទាំងនេះធ្វើឲ្យ ឧបករណ៍ centrifugeuses របស់អ៊ីរ៉ង់កើនឡើងដល់ទៅ៩ ០០០។
គួរកត់សម្គាល់ថា ការចេះចម្រើនធាតុឥន្ធនៈនុយក្លេអ៊ែរ២០%ដោយប្រទេសអ៊ីរ៉ង់នេះ បានធ្វើឲ្យប្រទេសលោកខាងលិចមានការភ្ញាក់ផ្អើល ដោយហេតុថា អ្នកដឹកនាំនៃប្រទេសលោកខាងលិចតែងយល់ថា ទីក្រុងតេហេរ៉ង់នៅពុំទាន់មានសមត្ថភាពគ្រប់គ្រាន់ឡើយក្នុងការក្តោបក្តាប់បច្ចេកវិទ្យាជាន់ខ្ពស់ក្នុងវិស័យនុយក្លេអ៊ែរ។
សូមបញ្ជាក់ថា ជាតិ uranium ចម្រើនធាតុតិចជាង២០%ត្រូវគេយកទៅប្រើនៅក្នុងវិស័យស៊ីវិល។ ហើយបើចម្រើនធាតុលើសពី៩០% នោះគេអាចយកទៅប្រើសម្រាប់ផលិតគ្រាប់បែកបរមាណូ។
ហើយការប្រកាសរបស់លោកប្រធានាធិបតីអ៊ីរ៉ង់ Mahmoud Ahmadinejad នេះធ្លាក់ចំពេលដែលទីក្រុងតេហេរ៉ង់និងប្រទេសមហាអំណាច៥+១ត្រូវចាប់ធ្វើកិច្ចចរចាឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ