ការបោះឆ្នោតក្រុមប្រឹក្សាឃុំសង្កាត់ ៖ វិញ្ញាសាដ៏គ្រោះថ្នាក់របស់រដ្ឋាភិបាលបារាំង
ចុះផ្សាយនៅថ្ងៃ៖
ស្តាប់ - ០៦:៥១
នៅថ្ងៃនេះ ជាការបោះឆ្នោតក្រុមប្រឹក្សាឃុំសង្កាត់ ចំនួន ៦៤៥៥ឃុំសង្កាត់ជុំទីពីរ នៅប្រទេសបារាំង។ គណបក្ស កាន់អំណាច សង្គមនិយម មានការព្រួយបារម្ភយ៉ាងខ្លាំង ព្រោះអាចនឹងទទួលបរាជ័យ បាត់បង់អំណាចតាមតំបន់ ព្រមទាំងអាចឈានដល់ការរុះរើរដ្ឋាភិបាលផង។ គណបក្សស្តាំនិយមវិញ រីករាយស្រស់ថ្លារង់ចាំលទ្ធផល ហើយគណបក្សរណសិរ្សជាតិ ស្តាំនិយមជ្រុល កាន់តែមានមោទនភាព ចង់ធ្វើឱ្យប្រសើរឡើងខ្លាំងលើសជុំទីមួយ កាលពីសប្តាហ៍មុន។ ការិយាល័យបានបើកទ្វារនៅម៉ោង៨ព្រឹក រហូតដល់ម៉ោង៨ល្ងាច សម្រាប់រដ្ឋធានីនិងក្រុងធំៗ។ ចំនួនអ្នកអវត្តមានមិនទៅបោះឆ្នោត អាចប្តូរផ្លាស់ទិន្នន័យ ហេតុដូច្នេះហើយបានជាបេក្ខជនឈរឈ្មោះគ្រប់រូប ប្រឹងបញ្ចុះបញ្ចូលប្រមូលប្រជាជនឱ្យទៅបោះឆ្នោត ដើម្បីប្រមូលសំឡេងបានច្រើន។
ក្នុងសម័យបោះឆ្នោតជុំទីមួយ សប្តាហ៍មុន បានប្រព្រឹត្តទៅជាមួយនឹងចំនួនអ្នកអវត្តមានមិនទៅបោះឆ្នោត ច្រើនបំផុតមិនធ្លាប់មានទេ។ ហើយជាលទ្ធផល គណបក្សសង្គមនិយម កាន់អំណាច បានទទួលបរាជ័យយ៉ាងជូរចត់។ នៅតាមឃុំសង្កាត់ខ្លះ គណបក្សនេះ ធ្លាក់ដល់លំដាប់ទីបីផង។ តើនិន្នាការនេះនឹងបន្តមាននៅជុំទីពីរទៀតឬទេ ? តើអាចមានការប្តូរផ្លាស់ទេ ប្រសិនបើមានអ្នកទៅចូលរួមបោះឆ្នោតច្រើនជាងជុំទីមួយ ?
អត្រាអ្នកចូលរួមបោះឆ្នោតក្រុមប្រឹក្សាឃុំសង្កាត់ ជុំទីមួយ នៅឆ្នាំ២០១៤ មានត្រឹមតែ៦៣,៥៥%ប៉ុណ្ណោះ ពោលគឺជាចំនួនដ៏តិចតួចបំផុតមិនធ្លាប់មានគិតចាប់តាំងពីឆ្នាំ១៩៥៩មក។ សម្រាប់ថ្ងៃនេះ បើតាមការប៉ាន់ប្រមាណដំបូង នៅវេលាម៉ោង ១២ថ្ងៃត្រង់មានតែបណ្តាជនបារាំង តែ ១៩,៨% បានទៅបោះឆ្នោត (ប្រៀបទៅនឹងឆ្នាំ២០០៨ ២៣,៦%)។
ចុះតើហេតុអ្វីបានបណ្តាជនបារាំងកាន់តែច្រើនទៅៗមិនទៅបោះឆ្នោតដូច្នេះ ?
មានមូលហេតុច្រើនណាស់ ដែលអាចពន្យល់អំពីអវត្តមាននេះ បើតាមការស្ទង់មតិ គឺបណ្តាមកពីប្រជាជនលែងសូវចាប់អារម្មណ៍នឹងនយោបាយ គ្មានទំនុកចិត្ត លើអ្នកនយោបាយ ការមិនពេញចិត្តលើរដ្ឋាភិបាល ឬលើប្រធានាធិបតី។
ម្ចាស់ឆ្នោតអ្នកឆ្វេងនិយម ឬអ្នកគាំទ្រគណបក្សកាន់អំណាចបច្ចុប្បន្នដែលមិនសូវខ្វល់ខ្វាយទៅបោះឆ្នោត អត្រាអវត្តមានមានកំរិតខ្ពស់ជាងមធ្យមភាគជាតិ។ ប៉ុន្តែនេះមិនមែនជាអភូតចម្លែកអ្វីទេ ព្រោះជាទូទៅក្រុមបក្សប្រឆាំងតែងស្វាហាប់ទៅបោះឆ្នោតណាស់។ តាំងពីឆ្នាំ១៩៧៨មក គេមិនដែលឃើញគណបក្សកាន់អំណាចឈ្នះ ក្នុងសម័យបោះឆ្នោតពាក់កណ្តាលអាណត្តិ ឬឃុំសង្កាត់ទេ។ សកម្មជនបក្ស តែងព្រមានរដ្ឋាភិបាល តាមរយៈការបោះឆ្នោតអនុបវាទ ឬបោះឆ្នោតឱ្យក្រុមផ្សេង។
អ្នកស្ទង់មតិ មិនអាច វាស់វែង ការប្តូរផ្លាស់ឥវិយាបថបោះឆ្នោតបានទេ។ ហើយម្យ៉ាងទៀត នៅចន្លោះពេលមួយសប្តាហ៍ គឺពីជុំទីមួយទៅ ជុំទីពីរនេះ មានសកម្មភាពនយោបាយខ្លាំងណាស់។ សេចក្តី សម្រេចចិត្តរបស់បុគ្គលម្នាក់ គឺពិតជាពិបាកវាស់ស្ទង់ ប៉ុន្តែនៅក្នុងប្រវត្តិនៃការបោះឆ្នោត ចំនួនអ្នកចូលរួមបោះឆ្នោត មិនសូវប្រែប្រួលខុសគ្នា ពីជុំទីមួយ ទៅជុំមួយទៀតទេ។ ហើយក៏ជាការកម្រដែរ ដែលការបោះឆ្នោតជុំទីពីរប្តូរក្រឡាប់ចាក់លទ្ធផលខុសពីជុំទីមួយនោះ។
នេះជាគ្រោះថ្នាក់ ដែលគណបក្សកាន់អំណាចសង្គមនិយម កំពុងប្រឈម និងត្រូវកំរិតឱ្យបាន។ គណបក្ស កាន់អំណាច អាចនឹងត្រូវបាត់បង់ឃុំសង្កាត់ជាច្រើន ទៅឱ្យខាងគណបក្សប្រឆាំងស្តាំនិយម UMP ឬគណបក្សស្តាំជ្រុលនិយមរណសិរ្សជាតិ FN។ ជាមួយនឹងបរាជ័យ បាត់បង់អំណាចតាមមូលដ្ឋាន ការរុះរើរដ្ឋាភិបាល ត្រូវបានគេមើលឃើញកាន់តែច្បាស់ឡើងៗ។
តើហេតុអ្វីបានជាបក្សក្រុមជ្រុលនិយមបារាំងឡើងខ្លាំង ?
ដូចយើងធ្លាប់បានជូនជាព័ត៌មានស្រាប់ ថាគណបក្សស្តាំជ្រុលនិយម របស់លោកស្រី ម៉ារីន ឡឺប៉ែន បានឈ្នះឆ្នោត ក្លាយជាមេឃុំ ម្នាក់ តាំងពីជុំទីមួយ និងនាំមុខនៅក្នុងឃុំជាងដប់ទៀត នៅជុំទីពីរ ព្រមទាំងមានឈ្មោះក្នុងបញ្ជីបោះឆ្នោត ជាងពីររយឃុំសង្កាត់ផ្សេងទៀត។ គណបក្សនេះកំពុងពង្រឹងវត្តមាន និងជំហរ ឱ្យក្លាយជាបក្សនយោបាយមួយ ដែលមានឥទ្ធិពលនិងអំណាច តាំងពី ថ្នាក់មូលដ្ឋាន ទៅថ្នាក់តំបន់រហូតដល់ថ្នាក់ជាតិនិងថ្នាក់អឺរ៉ុប។ លោកស្រីម៉ារីន ឡឺប៉ែន ប្រធានគណបក្សសង្ឃឹមថានឹងអាចបញ្ចូលសមាជិកជាងមួយពាន់នាក់ ក្នុងក្រុមប្រឹក្សាឃុំសង្កាត់ ដើម្បីអាចចាក់ឬសចាក់គល់នយោបាយ។
គណបក្សកាន់អំណាច និងគណបក្សប្រឆាំង បានទម្លាក់កំហុសដាក់គ្នាទៅវិញទៅមក ថាជាបុព្វហេតុនាំក្រុមអ្នកជ្រុលនិយមឡើងខ្លាំង។ រវាងអសន្តិសុខ អស្ថិរភាពសង្គម អន្តោប្រវេសន៍ រដ្ឋាភិបាលស្ទុយៗគ្មានប្រសិទ្ធិភាព បក្សប្រឆាំងហែកហួរគ្នា និងមានរឿងអាស្រូវច្រើន រវាងការបោះឆ្នោតព្រមាន អនុបវាទ ឬអវត្តមាន អស់ទំនុកចិត្ត ផលចំណេញគឺពិតជាធ្លាក់ទៅក្នុងដៃអ្នកជ្រុលនិយមហើយ។ ម្យ៉ាងទៀត ក្នុងភូមិឃុំដែលបក្សជ្រុលនិយមឈ្នះ គេសង្កេតឃើញអត្រាអ្នកបោះឆ្នោតមានកំរិតខ្ពស់ណាស់។
តាំងពីលោកស្រី ម៉ារីន ឡឺប៉ែន ក្លាយជាប្រមុខដឹកនាំបក្សមក លោកស្រី បានពង្រាយវត្តមានបក្សនៅពេញផ្ទៃប្រទេស និងប្រមូលសកម្មជនក្មេងៗ ដាក់បញ្ចូលក្នុងបញ្ជីបោះឆ្នោតជាមួយសកម្មជនចាស់មានបទពិសោធន៍ ព្រមទាំងតាំងខ្លួនជាបក្សប្រឆាំងនយោបាយ និងជាចរន្តទីបីនៅក្នុងឆាកនយោបាយបារាំង។
ប៉ុន្តែបើឱ្យអ្នកជ្រុលនិយមដឹកនាំប្រទេស ដឹកនាំឃុំសង្កាត់ នោះមិនវីវរធំហើយ ?!
វាមិនមែនជាប្រការល្អទេ ដែលត្រូវឱ្យអ្នកមានគំនិតជ្រុលនិយម ឬជាតិនិយមជ្រុលដឹកនាំប្រទេសនោះ។ ពាក្យថាជ្រុល គឺមិនល្អទេ ! បណ្តាជនទូទៅ សុទ្ធតែខ្លាចរអាគ្រប់គ្នា។ ការងាកទៅរកក្រុមជ្រុលនិយមដើម្បីដាក់តឿនអ្នកដឹកនាំនយោបាយឱ្យកំរើកឡើង តែក៏អាចជាអាវុធមុខពីរ។ កាលពីឆ្នាំ១៩៩៥ បារាំងធ្លាប់មានមេឃុំម្នាក់ជាអ្នកស្តាំជ្រុលនិយម ដែលពេលនោះ ឃុំសង្កាត់បានកាត់ជំនួយឧបត្ថម្ភ ព្រោះតែមិនមែនជាជនជាតិបារាំងសុទ្ធ។ ក្រុមអ្នកជាតិជ្រុលនិយម គឺប្រឆាំងនឹងសកលោកភាវូបនីកម្ម ប្រឆាំងនឹងវប្បធម៌បរទេស ... ចំណាត់ការដឹកនាំប្រទេស ក៏ចេះតែជ្រុល ទៅតាមបែបជ្រុលនិយម។
គណបក្សស្តាំជ្រុលនិយមនេះ កំពុងប្រឹងកែលម្អរូបភាពបក្ស និងចង់បង្ហាញបណ្តាជនថាគេអាចដឹកនាំប្រទេសដោយបែបផ្សេង ពោលគឺមិនស្ថិតនៅប៉ូល ស្តាំ ឬឆ្វេងនិយម តែពីរទិសនោះទេ។ លុបបំបាត់ចោលគំនិតចាស់គំរិល ខ្លាចបក្សជ្រុលនិយម ព្រោះបក្សនេះចេះតែបំប៉ោង និងបន្លាចប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ