ប្រជាជនបារាំងបោះឆ្នោតរើសតំណាងក្រុមប្រឹក្សាឃុំ-សង្កាត់ ជុំទី១
នៅប្រទេសបារាំងថ្ងៃអាទិត្យនេះ ពលរដ្ឋបារាំងនិងពលរដ្ឋប្រទេសសហភាពអឺរ៉ុប៤៥លាននាក់ នាំគ្នាទៅបោះឆ្នោត ជុំទី១ ជ្រើសរើសតំណាងក្រុមប្រឹក្សាឃុំ-សង្កាត់ សម្រាប់អាណត្តិ៦ឆ្នាំ។ ការបោះឆ្នោតជុំទី២ នឹងប្រព្រឹត្តទៅនៅថ្ងៃអាទិត្យ៣០មីនា សប្តាហ៍ក្រោយ។ អត្រាអ្នកចូលរួម ចេញផ្សាយម៉ោង១២ថ្ងៃត្រង់នេះ មាន២៣,១៦ភាគរយ។ ការបោះឆ្នោតនេះ ជាតេស្តសម្រាប់ប្រធានាធិបតីហ្វ្រង់ស៊័រ ហូឡង់ ក្នុងពេលកាន់អំណាចជិត២ឆ្នាំមកនេះ។ ប្រជាប្រិយភាពប្រធានាធិបតីបារាំងបានធ្លាក់ចុះជាខ្លាំង ក្នុងពេលចុងក្រោយនេះ។ យោងតាមការស្ទាបស្ទង់ សម្លេងអនុប្បវាទអាចមានដល់៤០ភាគរយ ជាអត្រាខ្ពស់ប្រៀបនឹងឆ្នាំ២០០៨ ដែលកាលណោះ សម្លេងអនុប្បវាទមាន៣៣,៥ភាគរយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
សម្រាប់ការបោះឆ្នោតក្រុមប្រឹក្សាឃុំ-សង្កាត់ ជុំទី១នៅបារាំង ថ្ងៃអាទិត្យនេះ ប្រជាជនបារាំង និងពលរដ្ឋសហភាពអឺរ៉ុប មានឈ្មោះក្នុងបញ្ជីបោះឆ្នោត៤៥លាននាក់ ត្រូវជ្រើសរើសតំណាងក្រុមប្រឹក្សា សម្រាប់ឃុំ-សង្កាត់ប្រមាណ៣ម៉ឺន៦ពាន់៧រយ សម្រាប់អាណត្តិ៦ឆ្នាំ។ ជាលើកទី១ នៅបារាំង នៅឆ្នាំ២០១៤នេះ ឃុំដែលមានប្រជាជនរស់នៅ១០០០នាក់ បានរៀបចំការបោះឆ្នោតនេះដែរ។
ការបោះឆ្នោតឃុំ-សង្កាត់បារាំង ឆ្នាំ២០១៤នេះ ជាតេស្តសម្រាប់រដ្ឋាភិបាលបារាំងក្នុងការកាន់អំណាចជិត២ឆ្នាំមកនេះ។ យោងតាមការស្ទាបស្ទង់មតិ ប្រជាជនបារាំងផ្តល់ការទុកចិត្តដល់ប្រធានាធិបតីហូឡង់ និងនាយករដ្ឋមន្ត្រីអៃរ៉ូល តែត្រឹមពី២០ទៅ២៥ភាគរយប៉ុណ្ណោះ។ បញ្ហាគឺដោយសារបក្សកាន់អំណាចត្រូវរងការចោទប្រកាន់ថា មិនបានគោរពពាក្យសន្យា គ្មានគោលនយោបាយដឹកនាំច្បាស់លាស់ ប្រឈមនឹងចំនួនជនគ្មានការងារធ្វើដែលចេះតែកើនឡើង។ ក្នុងរយៈពេលចុងក្រោយនេះដែរ មានព័ត៌មានលេចលឺថា តុលាការបានសម្រេចអោយមានការលួចស្តាប់សម្លេងអតីតប្រធានាធិបតីសាកូហ្ស៊ី ក្នុងសំណុំរឿងថាលោកសាកូហ្ស៊ី អាចប្រើឥទ្ធិពលនិងអំណាច និងរំលោភច្បាប់តុលាការ កាលពីលោកកាន់អំណាចក្នុងអាណត្តិមុន ដូច្នេះអាចនឹងធ្វើអោយអ្នកបោះឆ្នោតទំនោរស្តាំនិយមចូលរួមបោះឆ្នោតកាន់តែច្រើន។ ទោះយ៉ាងនេះក្តី ការស្ទាបស្ទង់មតិភាគច្រើន បង្ហាញថា អ្នកបោះឆ្នោតនឹងជ្រើសរើសយកប្រធានឃុំ-សង្កាត់របស់ពួកគេច្រើនជាង ព្រោះថា ពួកគេផ្តោតការយល់ឃើញលើករណីជាក់ស្តែងរបស់ប្រធានឃុំ-សង្កាត់ ក្នុងការគ្រប់គ្រងពន្ធដារ សន្តិសុខ រឺក៏ការងារធ្វើជាដើម។
ដោយឡែក នៅថ្ងៃអាទិត្យនេះ គេចាប់អារម្មណ៍លើការបោះឆ្នោតនៅទីក្រុងប៉ារីស និងនៅMarseilleស្ថិតនៅភាគខាងត្បូងប្រទេស ដែលបេក្ខជនគូប្រជែងសុទ្ធតែមកពីបក្សស្តាំ និយម UMP បក្សកាន់អំណាចសង្គមនិយមបារាំង។ បក្សស្តាំនិយមជ្រុលFNរបស់លោកស្រីម៉ារីន ឡឺប៉េន ក៏អាចមានជាប់ឈ្មោះមានវត្តមានសម្រាប់ការបោះឆ្នោតឃុំ-សង្កាត់ជុំទី២ នៅថ្ងៃអាទិត្យសប្តាហ៍ក្រោយនេះ ជាមួយបក្សកាន់អំណាច និងបក្សUMP ដែរ។ បក្សស្តាំនិយមជ្រុលFN គិតថាអាចនឹងដណ្តើមបានជ័យជំនះក្នុងក្រុងពី១០ទៅ១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ