ព្យុះទឹកកកសំឡី កំពុងបោកបក់ខ្លាំងនៅអាមេរិក
បន្ទាប់ពីអឺរ៉ុប ដល់វេនសហរដ្ឋអាមេរិកម្តងដែលទទួលរងព្យុះទឹកកកសំឡី ! គិតមកទល់រសៀលថ្ងៃអាទិត្យទី២៦ធ្នូ ជើងយន្តហោះរាប់រយត្រូវលុបចោល នៅអាមេរិកភាគឦសាន មានជាអាទិ៍ញូយ៉ក ហ្វីឡាឌែលហ្វី និងបូស្តុន ព្រោះតែមានទឹកកកសំឡី ក្រាស់ឃ្មឹក និងខ្យល់បោកបក់ យ៉ាងសាហាវ។ ទឹកកកសំឡីអាចឡើងដល់កម្ពស់កន្លះម៉ែត្រនៅថ្ងៃនេះ នៅក្រុងបូស្តុន។
ចុះផ្សាយនៅថ្ងៃ៖
សេចក្តីរាយការណ៍របស់ អៀង សុខម៉ិញ
នៅញូយ៉ក ការហោះហើរប្រមាណជិត ១៥០០ ជើង ត្រូវលុបចោល។ អភិបាលក្រុងញូយ៉ក បានធ្វើសន្និសីទកាសែតអំពាវនាវឲ្យបណ្តាជនអាមេរិកមានការប្រុងប្រយ័ត្ន ព្រោះព្យុះទឹកកកសំឡី អាចបោកបក់ក្នុងល្បឿនដល់៩០គ.ម.ក្នុងម៉ោង។ ខ្យល់ត្រជាក់ និងដីក្រាលទៅដោយទឹកកកក្រាស់ឃ្មឹក អាចងាយបង្កគ្រោះថ្នាក់ខ្លាំងណាស់។
ចំណែកនៅបូស្តុន អាកាសយានដ្ឋានមិនបិទទេ ប៉ុន្តែគ្មានយន្តហោះណាមួយអាចធ្វើការហោះហើរបានឡើយ។ រថភ្លើង ដែលរត់ភ្ជាប់ពីញូយ៉កទៅបូស្តុន ឬពីបូស្តុនទៅញូយ៉ក ភាគច្រើនត្រូវលុបចោលតែម្តង។ បើតាមអភិបាលក្រុងបូស្តុន រថយន្តចូក និងកៀរទឹកកកចំនួន ៥០០គ្រឿងកំពុងធ្វើសកម្មភាពយ៉ាងសស្រាក់សស្រាំ នាពេលនេះ។
បន្ទាប់ពីសហរដ្ឋអាមេរិក ប្រទេសកាណាដា ក៏កំពុងត្រៀមលក្ខណៈទទួលរងឥទ្ធិពលនៃព្យុះទឹកកកសំឡីនេះដែរ នៅថ្ងៃចន្ទនេះ។ គេប៉ាន់ប្រមាណថា ក្នុងរយៈពេល២៤ម៉ោងព្យុះទឹកកកសំឡីនឹងមានកម្ពស់ពី២០ទៅ៤០សង់ទីម៉ែត្រ នៅកាណាដាផ្នែកខាងលិច ចំណែកខាងតំបន់ឆ្នេរសមុទ្ទវិញ ព្យុះទឹកកកសំឡីនឹងក្លាយទៅជាទឹកភ្លៀង និងខ្យល់បោកបក់ខ្លាំង។
សូមបញ្ជាក់ថាធាតុអាកាសត្រជាក់ ធ្លាក់ទឹកកកសំឡី ដ៏ច្រើនសន្ធឹកសន្ធាប់នេះ បានធ្វើឲ្យអឺរ៉ុបជាប់គាំង កាលពីសប្តាហ៍មុន ក្នុងឱកាសថ្ងៃបុណ្យណូអែល។ រហូតមកទល់ពេលនេះ មេឃចាប់ផ្តើមស្រឡះបន្តិច នៅអឺរ៉ុប ទឹកកកឈប់ធ្លាក់ ប៉ុន្តែសីតុណ្ហភាពនៅតែត្រជាក់ក្រោមសូន្យ។ នេះជាលើកទីមួយ គិតក្នុងរយៈពេលជាង៤០ឆ្នាំចុងក្រោយ ដែលអឺរ៉ុប ជាពិសេសប្រទេសបារាំង បានស្គាល់ភាពត្រជាក់ខ្លាំង កន្លែងខ្លះចុះដល់ជាង១៧អង្សាក្រោមសូន្យ។ នៅប្រទេសរុស្ស៊ី ចិញ្ចើមថ្នល់ក្នុងរដ្ឋធានីម៉ូស្គូ បានក្លាយទៅជាទីលានលេងកីឡាទឹកកក ដ៏ធំមហាសាល ព្រោះរាល់តំណក់ទឹកភ្លៀងដែលធា្លក់មកត្រូវកកភ្លាមលើដី។ អភិបាលក្រុងបានណែនាំឲ្យបណ្តាជនរស់នៅម៉ូស្គូសម្រាកនៅក្នុងផ្ទះរៀងៗខ្លួន កុំចេញទៅក្រៅបើគ្មានការចាំបាច់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ