នៅអឺរ៉ុប ព្យុះទឹកកកសំឡី-រាំងស្ទះដំណើរវិស្សមកាល បុណ្យណូអែល
ការធ្វើដំណើរតាមផ្លូវ អាកាសនិងផ្លូវគោកនៅអឺរ៉ុប បានខកខាននិងទទួលរងនូវភាពយឺតយ៉ាវដោយសារតែការធ្លាក់ទឹកកកសំឡី យ៉ាងខ្លាំងក្លា ចាប់តាំងពីយប់ម្សិលមិញ។ វិស្សមកាលបុណ្យណូអែល ឆ្នាំនេះ ពោរពេញដោយភាពសៅហ្មងនិងការរអ៊ូរទាំ៕
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អ៊ុង ច័ន្ទសោភា
យន្តហោះជាច្រើនត្រូវបញ្ឈរជើងចោលក្រោមអំណាច នៃទឹកកកសំឡីដែលបន្តធ្លាក់យ៉ាងជោកជាំរហូតមកទល់នឹងថ្ងៃអាទិត្យនេះ។ តាំងពីថ្ងៃម្សិលមិញ ជើងហោះហើរជាច្រើននៅប្រទេសបារាំង បែលហ្សិក អ៊ីតាលី ជាពិសេសប្រទេសអង់គ្លេស ត្រូវបានសំរេចលុបចោល។ នៅថ្ងៃនេះទៀត អាកាសចរណ៏ស៊ីវិលបារាំង បានសំរេចលុបចោលការហោះហើរប្រមាណមួយភាគបួននៅព្រលានយន្តហោះ RoissyCharles de Gaule។
អ្នកដំណើរប្រមាណ ៤000នាក់ ដែលរំពឹងអបអរសាទរបុណ្យណូអែលនៅក្រៅប្រទេសបានជាប់គាំង នៅព្រលានយន្តហោះBruxelles។ នៅឯព្រលានយន្តហោះ Francfort ប្រទេសអាល្លឺម៉ង់ឯណោះវិញ ជើងហោះហើរចំនួន១៧០ត្រូវបានខកខានផងដែរ។
ចំពោះការហោះហើរផ្សេងទៀត ដែលអាចធ្វើទៅបាននៅប្រទេសបារាំង ក៏ទទួលរងយ៉ាងហោចណាស់នូវការយឺតយ៉ាវមួយម៉ោង។
បើគេក្រលេកទៅមើលនៅលើផ្លូវថ្នល់វិញ ភាពរអិល និងកម្រាស់ទឹកកកដល់ទៅជាង៤០សង់ទីម៉ែត្រ បានធ្វើអោយអ្នកដំណើររាប់រយនាក់បង្ខំចិត្តដេកនៅក្នុងរថយន្តជាពិសេសនៅប៉ែកខាងជើង និងខាងកើតប្រទេសអង់គ្លេស។ នៅប្រទេសបារាំងដោយសារតែគ្រោះថ្នាក់ចរាចរណ៏មួយចំនួនបានបង្កឡើង រថយន្តធុនធ្ងន់ត្រូវបានហាមឃាត់មិនឲ្យធ្វើចរាចរណ៏ នៅក្នុងតំបន់ជាច្រើន។ នៅទីក្រុង ប៉ារីសដែលជាទីប្រជុំជនដ៏សំខាន់ រថយន្តក្រុងពុំមានសកម្មភាពទេកាលពីម្សិលមិញ។
រីឯការធ្វើដំណើរតាមផ្លូវដែកក៏មានភាពរអាក់រអួលផងដែរ។ រថភ្លើងក្នុងរូងដីក្រោមសមុទ្រ Eurostar ដែលភ្ជាប់ពីទីក្រុងប៉ារីសនិងទីក្រុង ឡុងដ៏ មានការយឺតយ៉ាវជាមធ្យម៦០នាទី។
លោក Brice Hortefeux រដ្ឋមន្ត្រីក្រសួងមហាផ្ទៃបារាំងដែលត្រូវបានរិះគន់កាលពីសប្តាហ៍មុនពីភាពបរាជ័យរបស់ខ្លួនក្នុងការគ្រប់គ្រងស្ថានភាពនេះ បានធ្វើការកោះប្រជុំភ្លាមៗកាលពីល្ងាចម្សិលមិញ។ គាត់បានប្រកាសឲ្យម្ចាស់យានយន្តកំរិតនូវការធ្វើដំណើររបស់ខ្លួនក្នុងករណីមិនចាំបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ