កប៉ាល់ដឹកស្បៀងទី១ចេញពីកំពង់ផែស៊ីបទៅហ្កាហ្សា ខណៈអ៊ីស្រាអែលនិងក្រុមហាម៉ាសមិនព្រមធ្វើបទឈប់បាញ់
កប៉ាល់ដឹកជំនួយមនុស្សធម៌ ទី១ បានចេញដំណើរពីប្រទេសស៊ីប សំដៅទៅឆ្នេរតំបន់ហ្កាហ្សា នៅថ្ងៃអង្គារ ទី១២មីនា។ កប៉ាល់នេះជារបស់អង្គការអេស្ប៉ាញ Open Arms។ ថ្នាក់ដឹកនាំអង្គការនេះ និងមន្ត្រីជាន់ខ្ពស់ប្រទេសស៊ីប រួមទាំង សហភាពអឺរ៉ុប កំពុងតែសហការត្រៀមបញ្ជូននាវាដឹកនាំស្បៀង ជើងទី ២ បន្ថែមទៀតទៅកាន់ឆេរហ្កាហ្សា។ នៅថ្ងៃអង្គារដដែល នាវាអាមេរិកដែលប្រុងទៅសង់កំពង់ផែបណ្តោះអាសន្ននៅជិតឆ្នេរហ្កាហ្សាដើម្បីចាត់ចែងផ្តល់ជំនួយ ក៏បានចេញដំណើរពីសហរដ្ឋអាមេរិកទៅដែរ។
ចុះផ្សាយនៅថ្ងៃ៖
ស្តាប់ - ០២:៤៧
កប៉ាល់ដឹកជំនួយមនុស្សធម៌ ទី១ ចេញពីកំពង់ផែប្រទេសស៊ីបនេះ មានផ្ទុកស្បៀង ដូចជា អង្ករ ម្សៅធ្វើនំចំណីអាហារ គ្រឿងកំប៉ុង ជាដើម ទម្ងន់សរុប ប្រមាណ ២០០ តោន ដែលត្រូវដឹកតាមផ្លូវទឹក ចម្ងាយ ៣៧០ គីឡូម៉ែត្រ។ រយៈចម្ងាយប៉ុណ្ណឹង ជាធម្មតា កប៉ាល់នោះអាចត្រូវចំណាយពេល ១៥ ម៉ោង ក៏ប៉ុន្តែ ដោយដឹកស្បៀងធ្ងន់ វាទំនងជាត្រូវប្រើពេល ជិត ២ ថ្ងៃ ទើបទៅដល់គោលដៅតំបន់ឆេរហ្កាហ្សា។ នេះបើតាមដំណឹងពីទីភ្នាក់ងារសារព័ត៌មានបារាំងអាអេហ្វប៉េ។
ពីប្រទេសលីបង់ រដ្ឋមន្ត្រីការបរទេសស៊ីបបានថ្លែងថា នាវាដឹកស្បៀង ជើងទី ២ កំពុងតែត្រៀមខ្លួនចេញដំណើរ ជាបន្តបន្ទាប់ទៀត។ ប្រធានអង្គការម្ចាស់នាវាកប៉ាល Open Arms ដែលទទួលបន្ទុកដឹកស្បៀងនេះ បញ្ជាក់ដែរថា ការដឹកជញ្ជូននាវាទី២ អាចនឹងមានស្បៀង ចំនួនច្រើនជាងជើងដំបូង។ កន្លែងស្តុកនៅស៊ីប មានស្បៀងស្រេច ប្រហែល ៥០០ តោន រង់ចាំដឹកចេញដំណើរ។
ស៊ីប ជារដ្ឋសមាជិកសហភាពអឺរ៉ុប និងដែលឋិតនៅជិតនឹងតំបន់ឆេរហ្កាហ្សា ជាងប្រទេសសហភាពអឺរ៉ុបផ្សេងទៀត។ ប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរ ឡេយែ អបអរសាទរការជញ្ជូនស្បៀងជើងទី១នេះ ហើយសន្យាថា សហភាពអឺរ៉ុប នឹងបន្តសហការរួមគ្នាទៀត ដើម្បីបញ្ជូនជំនួយស្បៀងបន្ថែម។
ទន្ទឹមនឹងគ្នានេះដែរ អង្គការសហប្រជាជាតិ បានកោតសរសើរចំពោះការដឹកជំនួយតាមផ្លូវសមុទ្រទៅជួយពលរដ្ឋហ្កាហ្សា និងបានលើកឡើងទៀតថា ការដឹកស្បៀងតាមផ្លូវទឹក និងទម្លាក់ស្បៀងតាមផ្លូវអាកាស ពុំគ្រប់គ្រាន់ឡើយសម្រាប់ជួយដល់ជនរងគ្រោះដែលកំពុងដង្ហើយសុំជំនួយបន្ទាន់។ បើតាមការិយាល័យកិច្ចការមនុស្សធម៌របស់អង្គការសហប្រជាជាតិ, មានតែការដឹកជញ្ជូនជំនួយតាមផ្លូវគោកតែមួយគត់ ទើបគ្រប់គ្រាន់និងមានប្រសិទ្ធភាពជាងគេ។ តាមផ្លូវគោក មិនអាចធ្វើទៅបានទេ ព្រោះតែអ៊ីស្រាអែល បិទផ្លូវ។
ដោយឡែក អ៊ីស្រាអែលនិងក្រុមហាម៉ាស គ្មានសញ្ញាណឈានដល់ការធ្វើបទឈប់បាញ់គ្នាទេ។ នេះបើតាមព័ត៌មានធ្លាក់មកចុងក្រោយពីភាគីការតា។ ការតា ជាប្រទេសអន្តរការីសម្របសម្រួលតាំងពីផ្ទុះសង្គ្រាម ប្រមាណ ៥ ខែមក។ អ្នកនាំពាក្យក្រសួងការបរទេសការតា ថ្លែងប្រាប់អ្នកកាសែត នៅថ្ងៃអង្គារ ទី១២មីនា ថា យើងមិនទាន់អាចសម្រេចកិច្ចព្រមព្រៀងបទឈប់បាញ់ ឆាប់ៗនេះទេ។ យើងមិនមើលឃើញថា ភាគីទាំងពីរឈានទៅរកសំឡេងរួមគ្នាសោះ ហើយ ភាគីទាំងពីរ ក៏មិនបានដោះស្រាយទៅលើចំណុចខ្វែងគំនិតគ្នា នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ