ហ្កាហ្សា៖ ការចរចាចាប់ផ្តើមជាថ្មីនៅទីក្រុងគែរ ខណៈអាមេរិកអំពាវនាវឲ្យមានបទឈប់បាញ់
មួយថ្ងៃបន្ទាប់ពីលោកស្រីអនុប្រធានាធិបតីអាមេរិក កាម៉ាឡា ហារីស បានអំពាវនាវ ឲ្យមានបទឈប់បាញ់នៅតំបន់ហ្កាហ្សា ការចរចាបានចាប់ផ្តើមកាលពីថ្ងៃចន្ទទិ៤មីនា នៅទីក្រុងគែរប្រទេសអេហ្ស៊ីប។ ផ្អែកតាមការផ្សាយរបស់បណ្តាញព័ត៌មានអេហ្ស៊ីប ការចរចាហាក់បានហុចផលវិជ្ជមានគួរជាទីសង្ឃឹម ដើម្បីឈានទៅរំដោះចំណាប់ខ្មាំង និងបិទបញ្ចប់សង្គ្រាមនេះ ខណៈប្រជាជននៅតំបន់ហ្កាហ្សាកំពុងប្រឈមនឹងគ្រោះទុរ្ភិក្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
សហគមន៍អន្តរជាតិ ដោយរាប់ទាំងសហរដ្ឋអាមេរិក ដែលជាសម្ព័ន្ធមិត្តធំបំផុតរបស់អ៊ីស្រាអែលផង បាននាំគ្នាអំពាវនាវ ឲ្យមានបទឈប់បាញ់នៅតំបន់ហ្កាហ្សាជាបន្ទាន់។ បើផ្អែកតាមបណ្តាញព័ត៌មានអេហ្ស៊ីប ការចរចាបានចាប់ផ្តើម យ៉ាងសស្រាក់សាស្រាំនៅថ្ងៃចន្ទ ទី៤មីនា នៅទីក្រុងគែរ ដោយមានតំណាងភាគីអេហ្ស៊ីប កាតា សហរដ្ឋអាមេរិក និងតំណាងរបស់ក្រុមហាម៉ាសផងដែរ។ បណ្តាញទូរទស្សន៍អេហ្ស៊ីបស្និទ្ធនិងរដ្ឋាភិបាល បានអះអាងថា ការចរចាបានលទ្ធផលវិជ្ជមានគួរជាទីសង្ឃឹម។
សូមបញ្ជាក់ថា ក្រុមប្រទេសសម្របសម្រួលការចរចានេះ កំពុងតែព្យាយាម ឲ្យភាគីជម្លោះ អ៊ីស្រាអែល និងក្រុមហាម៉ាស ទទួលយកលក្ខខណ្ឌឈានទៅទម្លាក់អាវុធ បិទបញ្ចប់សង្គ្រាម។ ការចរចានេះ ផ្តោតទៅលើការរំដោះចំណាប់ខ្មាំងអ៊ីស្រាអែល ដែលក្រុមហាម៉ាសបានចាប់យកទៅ និងអ្នកទោសប៉ាឡេស្ទីនដែលស្ថិតក្នុងដៃអ៊ីស្រាអែល។
គួររំលឹកថា នៅថ្ងៃទី៧តុលា ក្រៅពីបានសម្លាប់យ៉ាងសាហាវ នូវជនស៊ីវីលប្រមាណ១១៦០នាក់ ក្នុងទឹកដីអ៊ីស្រាអែល ក្រុមភេរវកម្មហាម៉ាសបានចាប់ចំណាប់ខ្មាំងទៅហ្កាហ្សា ចំនួនប្រមាណ២៥០នាក់ទៀត។ កាលពីខែវិច្ឆិកា ក្រុមហាម៉ាសបានយល់ព្រមដោះលែងចំណាប់ខ្មាំង ចំនួន១០៥នាក់ ជាថ្នូរនឹងការដោះលែងអ្នកទោសប៉ាឡេស្ទីន ចំនួន២៤០នាក់។
គួរកត់សំគាល់ដែរថា ភាគីរដ្ឋាភិបាលអេហ្ស៊ីបកំពុងតែប្រឹងប្រែង ជំរុញការចរចាទំលាក់អាវុធ ឲ្យបានមុនបុណ្យបួសរ៉ាម៉ាដន់អ៊ីស្លាម ដែលនឹងមកដល់នៅថ្ងៃទី១០មីនាខាងមុខ។ តែយ៉ាងណា ការចរចានៅរដ្ឋធានីគែរ គឺពុំមានការចូលរួមពីភាគីអ៊ីស្រាអែលទេ។ បើទោះបីជារងការរិះគន់ខ្លាំងឡើងពីប្រជាជនអ៊ីស្រាអែល រដ្ឋាភិបាលលោកណេតាន់យ៉ាហ៊ូ បានអះអាងយ៉ាងរឹងរូសបំផុត ថានឹងបន្តការប្រយុទ្ធ ទាល់តែបោសសំអាតក្រុមភេរវកម្មអាហាម៉ាស ឲ្យអស់ពីតំបន់ហ្កាហ្សា។
អង្គការសហប្រជាជាតិ បានថ្លែងសារអាសន្នថា ប្រជាជននៅតំបន់ហ្កហ្សា ប្រមាណ២លាន២សែននាក់ នឹងជួបគ្រោះទុរ្ភិក្សដោយចៀសមិនផុតទេ។ នេះនៅមិនរាប់អំពីការបំផ្លាញអស់សឹងទាំងស្រុង នូវជម្រកផ្ទះសម្បែករបស់ពួកគេ។ យោងតាមក្រុមហាម៉ាស យ៉ាងហោចណាស់ មានមនុស្សស្លាប់ចំនួន៣០៥៣៤នាក់។លោកស្រីកាម៉ាឡា ហារីស អនុប្រធានាធិបតីសហរដ្ឋអាមេរិក បានលើកឡើងថា សេចក្តីទុក្ខវេទនារបស់ប្រជាជននៅហ្កាហ្សានាពេលនេះ គឺរកពាក្យអ្វីមកថ្លែងឲ្យសមបានឡើយ ដូច្នេះត្រូវតែមានបទឈប់បាញ់ជាបន្ទាន់ ដើម្បីដឹកស្បៀងមនុស្សធម៌ចូលទៅហ្កាហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ