សមុទ្រក្រហម៖ ស្លាប់៣នាក់ ក្នុងការវាយប្រហាររបស់ក្រុមហ៊ូទីយេម៉ែន ទៅលើកប៉ាល់ដឹកទំនិញ
ចរាចរណ៍ផ្លូវទឹកនៅសមុទ្រក្រហមកាន់តែយ៉ាប់យ៉ឺន និងគ្រោះថ្នាក់។ បន្ទាប់ពីបាញ់ពន្លិចកប៉ាល់អង់គ្លេស ដឹកជីគីមី កាលពីថ្ងៃសៅរ៍សប្តាហ៍មុន ក្រុមហ៊ូទីយេម៉ែនបានអះអាងថា ខ្លួនបានបាញ់មីស៊ីលបាលីស្ទិក បំផ្លាញកប៉ាល់ដឹកទំនិញមួយគ្រឿងរបស់អាមេរិក នៅថ្ងៃពុធម្សិលមិញ។ ការវាយប្រហាររបស់ក្រុមហ៊ូទីយេម៉ែនបានសម្លាប់បុគ្គលិករបស់កប៉ាល់៣នាក់ និងរបួសធ្ងន់៤នាក់។ គិតចាប់តាំងពីក្រុមហ៊ូទីយេម៉ែនបង្កព្យុះភ្លៀងនៅសមុទ្រក្រហម ដើម្បីបង្ហាញសាមគ្គីភាពជាមួយក្រុមហាម៉ាសប៉ាឡេស្ទីន នេះជាលើកទី១ហើយដែល មានមនុស្សស្លាប់នៅក្នុងការវាយឆ្មក់មីស៊ីល និងដ្រូនរបស់ក្រុមហ៊ូទីយេម៉ែន ដែលគាំទ្រដោយប្រទេសអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១១
បន្ទាប់ពីកប៉ាល់អង់គ្លេស Rubymar ត្រូវគ្រាប់មីស៊ីល លិចចូលសមុទ្រ កាលពីថ្ងៃសៅរ៍សប្តាហ៍មុន កប៉ាល់ដឹកទំនិញមួយគ្រឿងទៀតរងគ្រោះថ្នាក់ ដោយសារការវាយប្រហារមីស៊ីលរបស់ក្រុមហ៊ូទីយេម៉ែន នៅសមុទ្រក្រហម។ កាន់តែគ្រោះថ្នាក់ និងធ្ងន់ធ្ងរព្រោះថា ការវាយប្រហាររបស់ក្រុមហូទីយេម៉ែន ទៅលើកប៉ាល់ដឹកទំនិញ ដែលក្រុមនេះចាត់ទុកថា ជាកប៉ាល់របស់អាមេរិក បានសម្លាប់មនុស្ស៣នាក់ និងរបួស៤នាក់។
តាមទីបញ្ជាការដ្ឋានកងទ័ពអាមេរិកប្រចាំតំបន់ដើមបូព៌ា ហៅកាត់ថា Centcom កប៉ាល់ទំនិញឈ្មោះTrue Confidence ត្រូវគ្រាប់មីស៊ីលបាលីស្ទិក ដែលបាញ់ចេញពីទឹកដីយេម៉ែន នៅព្រឹកថ្ងៃពុធ នៅពេលកប៉ាល់មួយគ្រឿងនេះកំពុងបើកចរាចរណ៍ នៅឈូងសមុទ្រអេឌិន ចម្ងាយ១០៥គីឡូម៉ែត្រ។ សម្រាប់ Centcom នេះជាលើកទី១ហើយ ដែលសកម្មភាពវាយប្រហាររបស់ក្រុមហ៊ូទីយេម៉ែន បង្កគ្រោះថ្នាក់ដល់ជីវិតមនុស្ស។
នៅក្នុងសេចក្តីថ្លែងការណ៍កាលពីថ្ងៃពុធ អ្នកនាំពាក្យរបស់ពួកឧទ្ទាមហ៊ូទីដែលគ្រប់គ្រងទឹកដីមួយផ្នែកធំរបស់យេម៉ែនអះអាងថា កប៉ាល់អាមេរិកត្រូវគ្រាប់មីស៊ីល ព្រោះអ្នកបើកបរកប៉ាល់បដិសេធមិនព្រមសហការ ធ្វើតាមសារព្រមានរបស់ក្រុមហ៊ូទី។
តាមទីភ្នាក់ងារUKMTO ដឹកនាំដោយកងទ័ពជើងទឹកអង់គ្លេស បុគ្គលិកនៅកប៉ាល់និយាយថា គេបានទទួលសារមួយ ពីកងកម្លាំងប្រដាប់អាវុធយេម៉ែន ដែលបានបញ្ជាឲ្យគេប្តូរទិស បើកចេញពីឈូងសមុទ្រអេឌិន។ ប៉ុន្តែ មួយសន្ទុះក្រោយមក គេក៏លឺសំឡេងផ្ទុះខ្លាំងនៅក្បែរនាវា។
នៅក្រោយការវាយប្រហាររបស់ក្រុមហ៊ូទី កងកម្លាំងរបស់បក្សសម្ព័ន្ធធានាសន្តិសុខនៅសមុទ្រក្រហមបានអន្តរាគមជួយសង្រ្គោះបុគ្គលិកនៅលើកប៉ាល់ True Confidence។ វីដេអូរបស់កងទ័ពជើងទឹកឥណ្ឌា កាលពីថ្ងៃពុធ បង្ហាញបេសកកម្មជួយសង្រ្គោះ រំដោះយកមនុស្សចេញពីកប៉ាល់True Confidence ដែលត្រូវគេបោះបង់ អណ្តែតចោលនៅលើសមុទ្រ។
ក្រុមហ៊ូទីអះអាងថា គេវាយប្រហារTrue Confidence ព្រោះកប៉ាល់នេះជាកម្មសិទ្ធិរបស់អាមេរិក ដែលជាសម្ព័ន្ធមិត្តរបស់អ៊ីស្រាអែល។ ប៉ុន្តែ អ្នកនាំពាក្យរបស់សេតវិមាននិយាយថា កប៉ាល់True Confidence មានជាប់ទាក់ទងនឹងប្រទេសលីបេរីយ៉ា។ មានទង់ជាតិប្រទេសកូនកោះ Barbade កប៉ាល់ដឹកទំនិញ True Confidence ធ្លាប់ជាកប៉ាល់របស់ក្រុមហ៊ុនអាមេរិក មុននឹងត្រូវប្តូរ ចុះឈ្មោះនៅប្រទេសលីបេរីយ៉ា។ ប៉ុន្តែ នៅថ្ងៃវាយប្រហាររបស់ក្រុមហ៊ូទីយេម៉ែន កប៉ាល់ True Confidence ស្ថិតក្រោមការគ្រប់គ្រងរបស់ក្រុមហ៊ុន Third January Maritime Ltd របស់ប្រទេសក្រិក ដែលទទួលបន្ទុកដឹកដែក ចេញពីកំពង់ផែ Lianyungang ររបស់ប្រទេសចិន សំដៅកំពង់ផែJeddah នៅអារ៉ាប៊ី សាអូឌីត។
កប៉ាល់ True Confidenceមានបុគ្គលិកធ្វើការ២០នាក់ ដែលនៅក្នុងនោះ មាន១នាក់ ជាជនជាតិឥណ្ឌា ហ្វីលីពីន ១៥នាក់ វៀតណាម ៤នាក់។ បន្ថែមពីលើនោះ មានកម្លាំងប្រដាប់អាវុធ៣នាក់ ដែលនៅក្នុងនោះ ២នាក់ ជាតិស្រីលង្កា និង១នាក់ នេប៉ាល់។
នៅថ្ងៃចន្ទ កងទ័ពជើងទឹកឥណ្ឌានិយាយថា ខ្លួនបានជួយសង្រ្គោះបុគ្គលិករបស់កប៉ាល់ដឹកទំនិញមួយគ្រឿងទៀត MSC Sky II មានទង់ជាតិលីបេរីយ៉ា ដែលបានរងការខូចខាតដោយសារត្រូវគ្រាប់មីស៊ីលរបស់ពួកហ៊ូទីយេម៉ែន ដែរ ប៉ុន្តែ មិនបានបង្កឲ្យមានគ្រោះថ្នាក់សម្លាប់ជីវិតមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ