សន្តិសុខសមុទ្រក្រហម៖ កងទ័ពសម្ព័ន្ធមិត្ត បាញ់ស្ទាក់ដ្រូន១៥គ្រឿងរបស់ក្រុមហ៊ូទីយេម៉ែន
ក្រុមឧទ្ទាមហ៊ូទីយេម៉ែន ដែលជាកូនចៅអ៊ីរ៉ង់ បានប្រកាសកាលពីព្រឹកថ្ងៃសៅរ៍ថា ខ្លួនបានបើកប្រតិបត្តិការធំ វាយប្រហារទៅលើនាវាចម្បាំងរបស់អាមេរិក ដែលចល័តនៅក្នុងសមុទ្រក្រហម។ នៅព្រឹកថ្ងៃសៅរ៍ដែរ ប្រភពពីអគ្គបញ្ជាការដ្ឋានកងទ័ពសម្ព័ន្ធមិត្ត ដឹកនាំសហរដ្ឋអាមេរិក បានឲ្យដឹងថា គេបានបាញ់ស្ទាក់កម្ទេចដ្រូនរបស់ក្រុមហ៊ូទី ចំនួន១៥គ្រឿង ដែលប៉ុនប៉ងវាយប្រហារមកលើនាវាចម្បាំង ព្រមទាំងនាវាដឹកទំនិញនៅក្នុងតំបន់នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
យោងតាមទីបញ្ជាការកងទ័ពអាមេរិកប្រចាំនៅតំបន់ដើមបូព៌ា Centcom ក្រុមហ៊ូទីយេម៉ែន បានបើកការវាយប្រហារទ្រង់ទ្រាយធំមិនធ្លាប់មាន កាលពីវេលាទាបភ្លឺ ព្រឹកថ្ងៃសៅរ៍ ទី៩មីនា។ កងទ័ពសម្ព័ន្ធមិត្តអន្តរជាតិ ប្រចាំការនៅតំបន់សមុទ្រក្រហម និងឈូងសមុទ្រអាដេន បានបើកប្រតិបត្តិការការពារខ្លួន ដោយបានបាញ់កម្ទេចដ្រូនរបស់ក្រុមហ៊ូទី ចំនួន១៥គ្រឿង។ ក្នុងនោះ កងទ័ពបារាំង បានបាញ់កម្ទេចបាន ចំនួន៤គ្រឿង នៅឆកសមុទ្រអាដេន បន្ទាប់ពីឃើញដ្រូនទាំងនោះ ហោះសំដៅមកលើនាវាចម្បាំងរបស់បារាំង។
យ៉ាងណាមិញ ក្រសួងការពារជាតិបារាំង បានបញ្ជាក់ឲ្យដឹងថា នេះគឺជាប្រតិបត្តិការការពារខ្លួន សុទ្ធសាធ មិនមែនជាការវាយប្រហារទៅលើក្រុមហ៊ូទីនោះឡើយ។ ប្រតិបត្តិការរបស់កងទ័ពបារាំងនេះ បានជួយការពារផងដែរ ដល់នាវាដឹកទំនិញ True Confidence ដែលបានរងគ្រាប់មីស៊ីលរបស់ក្រុមឧទ្ទាមហ៊ូទី កាលពីថ្ងៃ៦មីនា ហើយដែលបច្ចុប្បន្ន គេកំពុងតែព្យាយាមអូសសណ្តោង។
ក្រោយការប្រកាសរបស់កងទ័ពសម្ព័ន្ធអន្តរជាតិនេះ ក្រុមឧទ្ទាមហ៊ូទីបានអះអាងថាក្រុមខ្លួនបានបើកប្រតិបត្តិការវាយប្រហារទ្រង់ទ្រាយធំនៅព្រឹកព្រហាមថ្ងៃសៅរ៍។ Yahya Saree អ្នកនាំពាក្យកងកម្លាំងហ៊ូទី បានថ្លែងសារស្រែកតាមទូរទស្សន៍ថា ក្រុមខ្លួនបានបើកប្រតិបត្តិការ២ផ្សេងគ្នា ទី១គឺសំដៅវាយប្រហារនាវាដឹកទំនិញ Propel Fortune ស្ថិតនៅឈូងសមុទ្រអាដេន និងទី២គឺសំដៅវាយប្រហារនាវាចម្បាំងរបស់អាមេរិក។ នៅក្នុងប្រតិបត្តិការទី២ គឺក្រុមហ៊ូទីបានអួតថាខ្លួនបានបញ្ជាយានដ្រូន ចំនួន៣៧គ្រឿង ទៅបាញ់ទម្លាក់គ្រាប់លើនាវាចម្បាំងអាមេរិក។
សូមបញ្ជាក់ថា ក្រោយពីសង្គ្រាមនៅតំបន់ហ្កាហ្សាបានផ្ទុះឡើង ក្រុមឧទ្ទាមហ៊ូទីយេម៉ែន ដែលជាកូនចៅអ៊ីរ៉ង់ បានបើកការវាយប្រហារជាញឹកញាប់ មកលើនាវាដឹកទំនិញ ដែលឆ្លងកាត់សមុទ្រក្រហម និងតំបន់ឈូងសមុទ្រអាដេន។ មាននាវាដឹកទំនិញជាច្រើនគ្រឿង ដែលបានរងគ្រោះ ត្រូវគ្រាប់ឆេះ និងលេចចូលទៅក្នុងសមុទ្រ។ សហរដ្ឋអាមេរិក បានបង្កើតសម្ព័ន្ធមិត្តអន្តរជាតិមួយ ដើម្បីរួមគ្នាការពារសន្តិសុខនៅតំបន់នេះ។ ផ្អែកតាមសម្ព័ន្ធភាពនេះ ដ្រូននិងមីស៊ីលរបស់ក្រុមហ៊ូទី គឺជាការគំរាមដ៏ធំ មកលើការធ្វើចរាចរណ៍ដឹកទំនិញ និងបានប៉ះពាល់យ៉ាងខ្លាំង មកលើពាណិជ្ជកម្មអន្តរជាតិ ១២%នៃទំនិញទូទាំងពិភពលោក ត្រូវដឹកឆ្លងកាត់តំបន់នេះ។
គិតមកត្រឹមពេលនេះ កងទ័ពសម្ព័ន្ធមិត្តអាមេរិក មានបេសសកម្មត្រឹមតែការពារ និងបង្កាសន្តិសុខ ក្នុងករណីមានការគំរាមណាមួយតែប៉ុណ្ណោះ។ ពោលគឺបេសកកម្មនេះ មិនមានកម្មវត្ថុវាយប្រហារទៅលើទីតាំងរបស់ក្រុមឧទ្ទាមហ៊ូទី នៅក្នុងទឹកដីយេម៉ែនឡើយ។ តែយ៉ាងណាក៏ដោយ ក្រុមឧទ្ទាមហ៊ូទី ហាក់ដូចជាមិនញញើតទេ ហើយរឹតតែបន្ថែមការវាយប្រហារថែមទៀត មកលើនាវាដឹកទំនិញ និងនាវាចម្បាំងកងទ័ពសម្ព័ន្ធមិត្ត ខណៈកងទ័ពសម្ព័ន្ធមិត្តវិញ នៅតែប្រកាន់គោលជំហរថា ទាល់តែមានការវាយប្រហារពីក្រុមហ៊ូទី ទើបគេបាញ់ស្ទាក់កម្ទេច ដើម្បីការពារខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ