តើលោកអាសាដកំពុងបានប្រយោជន៍ពីការវាយប្រហាររបស់អាមេរិកទៅលើក្រុមជីហាតនៅស៊ីរី?
ចុះផ្សាយនៅថ្ងៃ៖
ស្តាប់ - ០៦:៤៩
កិច្ចប្រជុំពិសេសរបស់ក្រុមប្រឹក្សាសន្តិសុខរបស់អង្គការសហប្រជាជាតិ កាលពី ថ្ងៃពុធទី ២៤ កញ្ញា ក្រោមអធិបតីភាពរបស់ប្រធានាធិបតី អាមេរិក បានចេញសេចក្តីសម្រេច មួយទប់ស្កាត់ ការរើសសមាជិកថ្មីរបស់ក្រុមជីហាតអ៊ីរ៉ាក់។ នៅថ្ងៃពុធដដែល ប្រតិបត្តិការទ័ពអាកាសរបស់អាមេរិក និងប្រទេសអារ៉ាប់ទាំង៥បានបាញ់បំផ្លាញកន្លែងចម្រាញ់ប្រេងមួយកន្លែងរបស់ក្រុមជីហាត ដែលតាមធម្មតាអាចធ្វើឲ្យក្រុមជីហាតលក់យកលុយ ប្រមាណ ២លានដុល្លារ ក្នុងមួយថ្ងៃ។
នៅទីក្រុងញូវយ៉ក ក្រុមប្រឹក្សាសន្តិសុខបានបើកការប្រជុំវិសាមញ្ញ ក្រោមអធិបតីភាពរបស់លោកអូបាម៉ា។ កិច្ចប្រជុំរបស់ក្រុមប្រឹក្សាសន្តិសុខស្ថិតនៅក្រោមការដឹកនាំរបស់ប្រធានាធិបតីអាមេរិកជារឿងដ៏កម្រ។ នៅក្នុងកិច្ចប្រជុំ ដែលមានការចូលរួមពីប្រមុខដឹកនាំ និងរដ្ឋាភិបាលចំនួន ២៧ ក្រុមប្រឹក្សាសន្តិសុខបានអនុម័ត ជាឯកច្ឆន្ទ សេចក្តីសម្រេចដែលសំដៅទប់ស្កាត់ការរើសបញ្ចូលសមាជិកថ្មីរបស់ពួកអង្គការរដ្ឋអ៊ីស្លាមជីហាត។
តាមលោកប្រធានាធិបតីបារ៉ាក់ អូបាម៉ា ជនបរទេស ១ម៉ឺន ៥ពាន់នាក់ មកពីប្រទេសចំនួន៨០ បានចូលរួមប្រយុទ្ធជាមួយក្រុមជីហាត នៅស៊ីរី និងនៅអ៊ីរ៉ាក់ ក្នុងរយៈពេលប៉ុន្មានឆ្នាំចុងក្រោយនេះ ពោលគឺចាប់តាំងពីសង្រ្គាមស៊ីវិលបានផ្ទុះឡើងនៅស៊ីរី កាលពីឆ្នាំ ២០១១។
នេះជាលើកទីមួយ ដែលមានសេចក្តីសម្រេចថ្នាក់អន្តរជាតិដែលទាមទារឲ្យគ្រប់ប្រទេសទាំងអស់ មិនថា នៅតំបន់អារ៉ាប់ដែលកំពុងរងការគំរាមកំហែងពីក្រុមជីហាត ផ្ទាល់ ឬដោយប្រយោលក្តី ឲ្យចូលរួមទាំងអស់គ្នា ដើម្បីទប់ស្កាត់កុំឲ្យក្រុមជីហាតរីកធំធាត់ នៅស៊ីរី និងអ៊ីរ៉ាក់តទៅទៀត។ នៅក្នុងសេចក្តីសម្រេច របស់ក្រុមប្រឹក្សាដែលស្នើដោយប្រទេសអាមេរិក ក្រៅតែពីនិយាយពីការបិទខ្ទប់កុំឲ្យក្រុមជីហាតបានទទួលជំនួយហិរញ្ញវត្ថុពីខាងក្រៅ គេផ្តោតសំខាន់ទៅលើវិធានការទប់ស្កាត់កុំឲ្យយុវជនបរទេសអាចទៅចូលរួមនៅក្នុងចលនារបស់ពួកជីហាតអ៊ីរ៉ាក់ទៀតបាន។
សេចក្តីសម្រេចបានចែងថា ប្រទេសទាំងឡាយត្រូវរារាំងកុំឲ្យមានការរើសចូលជាសមាជិកក្រុមជីហាតនៅក្នុងទឹកដីរបស់ខ្លួន ឬក៏ហាមបុគ្គលដែលចង់ធ្វើដំណើរទៅបរទេស ដើម្បីចូលរួមក្នុងជំរំបណ្តុះបណ្តាលរបស់ក្រុមអ៊ីស្លាមជ្រុលនិយម។ អាជ្ញាធររបស់ប្រទេសនីមួយៗ ត្រូវពង្រឹងច្បាប់វិន័យក្នុងស្រុកឲ្យតឹងរ៉ឹងជាងមុន។ សេចក្តីសម្រេចបានទាមទារផងដែរឲ្យប្រទេសពាក់ព័ន្ធបិទព្រំដែន ឬហាមកុំឲ្យជនបរទេសប្រើប្រាស់ទឹកដីខ្លួនឆ្លងចូលទៅស៊ីរី ឬអ៊ីរ៉ាក់។ តួកគីដែលត្រូវអន្តរជាតិចោទប្រកាន់ពីរឿងឈរឱបដៃ បណ្តោយឲ្យយុវជនបរទេសប្រើទឹកដីតួកគីឆ្លងចូលទៅស៊ីរី បានអះអាងថា ខ្លួនចាប់បានក្រុមប្រដាប់អាវុធជាជនបរទេសប្រមាណ ១០០០នាក់ មកពី៧៥ប្រទេស ចាប់តំាងពី ឆ្នាំ ២០១១មក។
ជារួម ប្រសិនបើប្រទេសណាមិនគោរពសេចក្តីសម្រេចខាងលើទេ នោះពួកគេត្រូវប្រឈមនឹងទណ្ឌកម្មពីសហគមន៍អន្តរជាតិ យោងទៅតាមមាត្រាទី ៧របស់ច្បាប់ធម្មនុញ្ញរបស់អង្គការសហប្រជាជាតិ។
នៅស៊ីរីក្រុមជីហាត អាល់នូស្រា និងខូរ៉ាសានជាផ្ទាំងស៊ីបមួយទៀតរបស់អាមេរិក
នៅលើសមរភូមិក្នុងប្រទេសស៊ីរីវិញ យន្តហោះចម្បាំងរបស់សម្ព័ន្ធអន្តរជាតិដឹកនាំដោយអាមេរិក និងអារ៉ាប់ទំាង៥ មិនត្រឹមវាយប្រហារទៅលើទីតាំងរបស់ អង្គការរដ្ឋអ៊ីស្លាមជីហាត ប៉ុន្តែ សំដៅផងដែរទៅលើក្រុមជីហាតផ្សេងទៀត ដូចជាក្រុមអាល់នូស្រា និងក្រុមខូរ៉ាសានដែលបានប្រកាសកាលពីថ្ងៃពុធម្សិលមិញ មេដឹកនាំរបស់ខ្លួនបានស្លាប់នៅក្នុងការវាយប្រហាររបស់យន្តហោះចម្បាំងអាមេរិក។
ទិសដៅសំខាន់នៃប្រតិបត្តិការទ័ពរបស់អាមេរិក និងសម្ព័ន្ធអន្តរជាតិ គឺវាយប្រហារទៅលើអង្គការរដ្ឋអ៊ីស្លាមជីហាត ដើម្បីធ្វើឲ្យក្រុមនេះចុះអន់ថយ កម្លាំងទាំងនៅអ៊ីរ៉ាក់ និងនៅស៊ីរី។ ប៉ុន្តែ ជាមួយគ្នានេះ នៅស៊ីរី នៅពេលជាប់ដៃវាយប្រហារទៅលើអង្គការរដ្ឋអ៊ីស្លាមជីហាត ដែលកំពុងកាន់កាប់តំបន់ជាច្រើនរបស់ស៊ីរី អាមេរិកក៏ឆ្លៀត វាយប្រហារទៅលើក្រុមជីហាតពីរផ្សេងទៀត ដែលជាបណ្តាញរបស់អាល់កៃដា សត្រូវរបស់អាមេរិក។ ក្រុមខូរ៉ាសានដែលទើបមានកំណើតនៅមួយខែតែប៉ុណ្ណោះនៅស៊ីរី គឺជាបណ្តាញរបស់អាល់កៃដា ដែលបានប្រកាសគំរាមកំហែងធ្វើអំពើភេរវកម្មក្នុងទឹកដីអាមេរិក និងនៅអឺរ៉ុប។
មន្រ្តីយោធាអាមេរិកតែងតែនិយាយថា ការវាយកម្ទេចក្រុមជីហាតនៅស៊ីរី នឹងមិនផ្តល់ប្រយោជន៍ទៅឲ្យរបបស៊ីរី របស់លោកបាស្ហា អាល់អាសាដ។ ប៉ុន្តែ ស្ថានភាពជាក់ស្តែងបានបង្ហាញហើយថា អាមេរិករហូតមកដល់ពេលនេះ កំពុងជួយវាយបំបាក់ធ្មុងរបស់សត្រូវរបស់របបស៊ីរី។ អង្គការរដ្ឋអ៊ីស្លាមជីហាតឬក្រុមអាល់នូស្រា ជាដើម សុទ្ធសឹងតែប្រយុទ្ធប្រឆាំងនឹងរបបលោកអាសាដ។ ដោយមិននិយាយពីអង្គការរដ្ឋអ៊ីស្លាមជីហាត ដែលមានប្រភពមកពីប្រទេអ៊ីរ៉ាក់ ក្រុមជីហាតអាល់នូស្រាជាក្រុមអ៊ីស្លាមជ្រុលនិយមដែលបានកើតលេចចេញរូបរាងឡើង នៅពេលសង្រ្គាមស៊ីវិលនៅស៊ីរីបានផ្ទុះឡើង។ ក្រុមអាល់នូស្រា ដែលជាបណ្តាញអាល់កៃដា មិនត្រូវគ្នានឹងអង្គការរដ្ឋអ៊ីស្លាមជីហាត។ ក្រុមនេះមានទិសដៅតែមួយ គឺប្រយុទ្ធ ដើម្បីទម្លាក់អំណាចរបស់លោកបាស្ហា អាល់អាសាដ។ ដូច្នេះ បើអាមេរិក និងយន្តហោះសម្ព័ន្ធមិត្តវាយប្រហារទៅលើក្រុមនេះ ដែរ គឺប្រាកដណាស់ដែលថា លោកអាសាដនឹងបានទទួលប្រយោជន៍ពីការធ្លាក់ថមថយកម្លាំងរបស់ពួកជីហាត។
ចំណុចនេះជាក្តីបារម្ភមួយរបស់សហគមន៍អន្តរជាតិ។ សំណួរបានចោទសួរថា បើសិនអាមេរិកវាយកម្ចាត់អង្គការរដ្ឋអ៊ីស្លាមជីហាតឲ្យខ្ចាត់ខ្ចាយ អស់ពីតំបន់កាន់កាប់របស់ខ្លួននៅ ទឹកដីស៊ីរី តើអាមេរិកនឹងធ្វើអ្វី បន្តទៀត? តើទឹកដីនោះនឹងត្រូវកាន់កាប់ដោយអ្នកណា? គេមិនសូវសង្ឃឹមលើ ក្រុមប្រឆាំងស៊ីរីសេរីដែលប្រឆាំងនឹងរដ្ឋាភិបាលលោកបាស្ហា អាល់អាសាដ ថា នឹងអាចកាន់កាប់តំបន់ដែលអាមេរិកវាយយកឈ្នះពីក្រុមជីហាតបានទេ។ ក្រុមប្រឆាំងស៊ីរីនៅតែទន់ខ្សោយ គ្មានទាំងយុទ្ធសាស្រ្តនយោបាយ និងយោធា ដើម្បីទប់ទល់នឹងក្រុមជីហាត ឬទ័ពរដ្ឋាភិបាលស៊ីរី។ ដូច្នេះ ក្នុងពេលដែលក្រុមប្រឆាំងនៅទន់ខ្សោយនៅឡើយ រដ្ឋាភិបាលស៊ីរីនឹងឆ្លៀតវាតទីយកទឹកដីរបស់ខ្លួន ដែលត្រូវបោសសម្អាតអស់ក្រុមជីហាតដោយស្នាដៃរបស់អាមេរិក។
ប៉ុន្តែ អាមេរិកបានបញ្ជាក់រួចហើយ ពីគោលបំណងរបស់ខ្លួន នោះគឺស៊ីរីគ្មានលោកបាស្ហា អាល់អាសាដ។ កាលពី សប្តាហ៍មុន ព្រឹទ្ធសភាអាមេរិកទើបបោះឆ្នោតយល់ព្រមឲ្យលោកអូបាម៉ាផ្តល់ប្រាក់៥០០លានដុល្លារ ដើម្បីជួយបណ្តុះបណ្តាលក្រុមប្រឆាំងស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ