មានបច្ច័យជាវិជ្ជមានច្រើន ពីគោលនយោបាយប្រមូលពន្ធគយ ១០០ភាគរយ
ចុះផ្សាយនៅថ្ងៃ៖
ស្តាប់ - ០៥:៣៣
អគ្គនាយកដ្ឋានគយកំពុងអនុវត្តវិធានការប្រមូលពន្ធគយ១០០ភាគរយគ្រប់ច្រក។ ការអនុវត្តវិធានការនេះ ត្រូវបានធ្វើឡើងបន្ទាប់ពីលោកនាយករដ្ឋមន្ត្រីហ៊ុន សែនបានបរិហារធ្ងន់ៗ អំពើពុករលួយរបស់មន្ត្រីគយ នៅក្នុងកិច្ចប្រជុំគណៈរដ្ឋមន្ត្រីនៅក្នុងខែតុលាកន្លងមក។ វិធានការប្រមូលពន្ធគយ១០០ភាគរយ កំពុងតែធ្វើឱ្យតម្លៃទំនិញនៅលើទីផ្សារកើនឡើង ខណៈចំណូលរបស់ពលរដ្ឋមិនបានកើនឡើងដោយគ្មានតុល្យភាពជាមួយគ្នានោះ។ ក៏ប៉ុន្តែ អ្នកសេដ្ឋកិច្ចបានមើលឃើញពីភាពវិជ្ជមានច្រើន ដែលកើតចេញពីការពង្រឹងការប្រមូលពន្ធគយ។
ក្នុងរយៈពេលប៉ុន្មានថ្ងៃចុងក្រោយនេះ ពលរដ្ឋខ្មែរនៅទូទាំងប្រទេសបាននិយាយអំពីការឡើងថ្លៃទំនិញនៅតាមទីផ្សារ។ ទន្ទឹមគ្នានេះ ពួកគេក៏បានដឹងអំពីមូលហេតុនៃការថ្លៃទំនិញទាំងនោះដែរ។ ចេញពីមាត់ អ្នកលក់ និងឈ្មួញ គ្រប់គ្នាក៏បាននិយាយអំពីការរឹតបន្តឹងរបស់គយ ក្នុងការប្រមូលពន្ធតាមព្រំដែន។
អគ្គនាយកដ្ឋានគយបានដាក់ចេញវិធានការប្រមូលពន្ធគយ១០០ភាគរយគ្រប់ច្រកព្រំដែន បន្ទាប់ពីមានការព្រមានយ៉ាងខ្លាំងពីលោកនាយករដ្ឋមន្ត្រីហ៊ុន សែន នៅក្នុងកិច្ចប្រជុំគណៈរដ្ឋមន្ត្រីនៅក្នុងខែតុលាកន្លងទៅ។ លោកនាយករដ្ឋមន្ត្រីដែលបានទុកពេល៦០ថ្ងៃ អោយមន្ត្រីគយ ឆ្លុះកញ្ចក់ ដុសក្អែល និងព្យាបាលខ្លួនឯង។ ពេលនេះជាពេលនៃការអនុវត្តការប្រមូលពន្ធគយ១០០ភាគរយ ដែលចាប់ផ្តើមពីពេល៦០ថ្ងៃនេះទៅ។
ផលប៉ះពាល់ជាអវិជ្ជមានបានកើតភា្លមទៅដល់ពលរដ្ឋ។ ពីព្រោះ កម្ពុជាបានប្រើប្រាស់ទំនិញមិនតិចជាង៥០ភាគរយឡើយ ដែលនាំចូលពីប្រទេសជិតខាងរួមមាន វៀតណាម ថៃ និងចិនជាដើម។ ទំនិញទាំងនោះ មិនមែនមានតែទំនិញធំៗទេ ប៉ុន្តែជាទំនិញប្រើប្រាស់ជាសាមញ្ញប្រចាំថ្ងៃ។ ដូច្នេះ ការរឹតបន្តឹង ឬការពង្រឹងការប្រមូលពន្ធ បានធ្វើអោយតម្លៃទំនិញនៅលើទីផ្សារឡើងថ្លៃ ដោយចៀសមិនរួច។
ទំនិញឡើងថ្លៃ ប៉ុន្តែអ្នកសេដ្ឋកិច្ចមិនបានចាត់ទុកថា វាជាអតិផរណា ដែលរដ្ឋាភិបាលត្រូវព្រួយបារម្ភឡើយ។ វាជាការឡើងថ្លៃទំនិញមួយដែល កើតឡើងពីការប្រមូលពន្ធ បង្កើនចំណូលរដ្ឋ។
ដោយផ្អាកនិយាយអំពី ការឡើងទំនិញបន្តិចសិន អ្នកសេដ្ឋកិច្ចបានបង្ហាញគំនិតសុទិដ្ឋិយមច្រើន ចំពោះការអនុវត្តវិធានការប្រមូលពន្ធគយអោយបាន១០០ភាគរយនេះ។ នេះប្រសិនបើគេនិយាយអំពីការអនុវត្តពិតប្រាកដ និងមាននិរន្តរភាពផង។
តើមានបច្ច័យជាវិជ្ជមានអ្វីខ្លះ ពីការអនុវត្តពិតប្រាកដនៃវិធានការប្រមូលពន្ធគយ១០០ភាគរយ?
គេអាចនិយាយអំពីបច្ច័យវិជ្ជមានចំនួន២ ដែលកើតចេញពីការប្រមូលពន្ធគយ១០០ភាគរយនេះ។ ទីមួយ គឺបច្ច័យវិជ្ជមានភ្លាមៗ និងទី២ គឺជាបច្ច័យវិជ្ជមានសម្រាប់រយៈពេលមធ្យម និងរយៈពេលយូរ។
និយាយពីផលវិជ្ជមានរយៈពេលខ្លី។ បានន័យថា គឺជាសារៈប្រយោជន៍ដែលកើតមានភ្លាមៗពីការប្រមូលពន្ធគយ។ ទី១នោះ គឺកំណើនចំណូលពន្ធរបស់រដ្ឋ។ ទី២ ការដាក់ចេញនូវវិធានការម៉ឺងម៉ាត់ពេលនេះ វាក៏បានពង្រឹងវិន័យរបស់មន្ត្រីគយភ្លាមៗដែរ។
មន្ត្រីគយដែលធ្លាប់ទទួលរងការចោទប្រកាន់ជាទូទៅ អំពីអំពើពុករលួយ។ អំពើពុករលួយរបស់មន្ត្រីគយដែលលោកនាយករដ្ឋមន្ត្រីក៏ធ្លាប់បានព្រមានហើយដែរ។ ទី៣ ដើម្បីអនុវត្តវិធានការប្រមូលពន្ធគយ១០០ភាគរយនេះ ការសម្រួលនីតិវិធីមួយចំនួន ដែលទាក់ទងនឹងការបង់ពន្ធ ក៏ត្រូវបានពិនិត្យ និងសម្រេចឡើងវិញ។ នីតិវិធីនៃការបង់ពន្ធកន្លងមក ក៏ធ្លាប់ត្រូវបានរិះគន់ថា វាបានផ្តល់ឱកាសអោយមានការប្រព្រឹត្តអំពើពុករលួយពីសំណាក់មន្ត្រីគយដែរ។ និយាយសរុបមកវិញ ទាំងនេះ គឺជាប្រសិទ្ធភាពភ្លាមៗ ដែលកើតចេញពីការអនុវត្តការប្រមូលពន្ធគយ១០០ភាគរយ។
និយាយអំពីផលវិជ្ជមានសម្រាប់រយៈពេលមធ្យម និងរយៈពេលយូរវិញម្តង។ ទី១ ការរឹតបន្តឹងចំណូលគយលើផលិតផលនាំចូលនោះ វាគឺជាការជំរុញ និងការលើកទឹកចិត្តដល់ការផលិតក្នុងស្រុក។ បានន័យថា ក្រោយពីការពង្រឹងការប្រមូលពន្ធលើផលិតផលនាំចូលហើយនោះ តម្លៃផលិផលនាំចូលពីបរទេស នឹងកើនតម្លៃជាងផលិតផលក្នុងស្រុក។ ហើយវាក៏ជាបាតុភូតដែលធ្វើអោយ ពលរដ្ឋខ្មែរងាកមកគាំទ្រផលិតក្នុងស្រុកដែលមានគុណភាពប្រហាក់ប្រហែលនឹងផលិតផលនាំចូលដែរ។
ទី២ ប្រសិនបើ ការប្រមូលពន្ធត្រូវបានរឹតបន្តឹងហើយនោះ ករណីនេះ វាក៏អាចជំរុញអោយអ្នកវិនិយោគមួយចំនួន ស្វែងរកការបោះទុន បង្កើតរោងចក្រនៅក្នុងប្រទេសកម្ពុជា ដើម្បីអាចប្រកួតប្រជែងជាមួយផលិតផលក្នុងស្រុករបស់កម្ពុជា។ នៅពេលមានវិនិយោគចូលមកកម្ពុជានោះហើយ ដែលវាបង្កើតឱកាសការងារបន្ថែមទៀតនៅកម្ពុជា។ និងទី៣ ការប្រមូលពន្ធគយ១០០ភាគរយ វាក៏ជាអនុវត្តច្បាប់មួយដែលអ្នកវិនិយោគចង់បានដើម្បីធានាការប្រកួតប្រជែងស្មើភាពគ្នា។
វាក៏នឹងបង្ហាញអំពីកិត្តិនាមរបស់កម្ពុជាក្នុងវិស័យគយនៅឆាកតំបន់ និងឆាកអន្តរជាតិដែរ។ គួរបញ្ជាក់ថា មន្ត្រីគយដែលពុករលួយ ហើយដែលអនុញ្ញាតអោយមានការរួចពន្ធ ឬបង់ពន្ធតិចលើផលិតផលមួយចំនួន វាបានបង្កអោយមានការប្រកួតប្រជែងទីផ្សារដោយមិនមានសមភាព ជាមួយផលិតផលនាំចូលផ្សេងទៀត និងផលិតផលក្នុងស្រុក។ ពេលខ្លះផលិតផលនាំចូលដែលមិនបានបង់ពន្ធត្រឹមត្រូវបានផ្តួលគូរប្រជែងនៅលើទីផ្សារកម្ពុជាហើយ ហើយក៏បានឈានទៅធ្វើខ្លួនអោយក្លាយជាទំនិញផ្តាច់មុខ ហើយបង្កើនតម្លៃខ្លួនឯងទៀតផង។
និយាយសរុបមកវិញ វិធានការប្រមូលពន្ធ១០០ភាគរយ ប្រសិនបើគេអនុវត្តអោយពិតប្រាកដ និងជានិរន្ត ដែលមិនមែនជាការអនុវត្តរបៀបភ្លើងចំបើង វានឹងផ្តល់ផលប្រយោជន៍យ៉ាងច្រើនយ៉ាងពិតប្រាកដដល់កម្ពុជាមែន។
ប៉ុន្តែ រដ្ឋាភិបាលក៏មិនត្រូវភ្លេចដែរអំពីការដំឡើងប្រាក់បៀវវត្សសមរម្យដល់មន្ត្រីរាជការ និងកម្មករ។ ប្រាក់ខែដែលត្រូវតែមានតុល្យភាពនឹងតម្លៃទំនិញទីផ្សារ។ គួររម្លឹកថា ការដំឡើងប្រាក់ខែជូនដល់មន្ត្រីរាជការ និងកម្មកររោងចក្រកាត់ដេរ ដែលប្រកាសដោយលោកនាយករដ្ឋមន្ត្រីថ្មីៗនេះ ក៏មិនទាន់មានតុល្យភាពនឹងតម្លៃទំនិញទីផ្សារ មុនការឡើងថ្លៃថែមទៀតក្នុងរយៈពេលចុងក្រោយនេះផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ