បក្សប្រឆាំងថៃគ្មានវត្តមានក្នុងកិច្ចប្រជុំស្តីពីការបោះឆ្នោតសភាឡើងវិញ
នៅថ្ងៃអង្គារនេះ គណៈកម្មការបោះឆ្នោតថៃបានរៀបចំការពិភាក្សាដ៏កម្រមានមួយ ស្តីពីការបោះឆ្នោតសភា ដែលថៃត្រូវរៀបចំធ្វើឡើងវិញ ក្នុងពេលខាងមុខ។ គណៈកម្មការបោះឆ្នោតថៃសង្ឃឹមថា ជាកិច្ចប្រជុំអាចអោយបក្សប្រឆាំងនិងបក្សកាន់អំណាច ស្រុះស្រួលគ្នារកដំណោះស្រាយវិបត្តិនយោបាយ។ ប៉ុន្តែ នៅនាទីចុងក្រោយ មុនកិច្ចប្រជុំ គណបក្សប្រឆាំងបានសម្រេច មិនចូលរួមក្នុងកិច្ចពិភាក្សានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
នៅប្រទេសថៃ កិច្ចប្រជុំស្តីពីការបោះឆ្នោតសភាឡើងវិញ ដែលគណៈកម្មការបោះឆ្នោតថៃ រៀបចំធ្វើនៅថ្ងៃអង្គារនេះ គ្រោងមានវត្តមានរបស់បក្សកាន់អំណាចរបស់លោកស្រីយីងឡាក់ និងបក្សប្រជាធិបតេយ្យ ជាបក្សប្រឆាំងដឹកនាំដោយលោកអាភិសិត វេចាជីវ៉ា។ កិច្ចប្រជុំនេះ ជាកិច្ចប្រជុំដ៏កម្រមានបំផុត មានទិសដៅពិភាក្សាពីផែនការដើម្បីសម្រេចទៅដល់ការបោះឆ្នោតសភាឡើងវិញ។
ប៉ុន្តែ បក្សប្រឆាំងថៃដែលបានធ្វើពហិការមិនចូលរួមបោះឆ្នោតកាលពីថ្ងៃ២កុម្ភៈនោះ បានបដិសេធ ក្នុងនាទីចុងក្រោយ មិនចូលរួមក្នុងជំនួបនេះទេ។ លោកអភិសិត លើកឡើងថា មិនចូលរួមពិភាក្សា ដោយសារតែបញ្ហាសុវត្ថិភាពសន្តិសុខ។ ដោយឡែក លោកអភិសិត ខ្លួនឯងផ្ទាល់ ធ្លាប់រំពឹងថា ជំនួបពិភាក្សានេះជាឱកាសល្អបំផុត ដើម្បីដាក់ទស្សនៈយល់ឃើញរបស់បក្សប្រឆាំងអោយនៅដាច់ដោយឡែក។ ថ្ងៃចន្ទម្សិលមិញ បក្សភឿថៃរបស់លោកស្រីយីងឡាក់ បានចោទក្រុមប្រឆាំងថា រួមគំនិតគ្នាធ្វើអំពើអាក្រក់ ដើម្បីចៀសវាងមិនអោយមានការបោះឆ្នោតសាជាថ្មី។
ការសម្រេចរបស់បក្សប្រឆាំងមិនចូលរួមជំនួបថ្ងៃអង្គារនេះ ធ្វើអោយការព្យាយាមស្វែងរកដំណោះស្រាយវិបត្តិថៃ នៅជាប់ស្ទះពិបាករកច្រកចេញ។ តាំងពីសភាថៃត្រូវបានរំលាយចោល ក្នុងខែធ្នូឆ្នាំ២០១៣មក រដ្ឋាភិបាលលោកស្រីយីងឡាក់មិនអាចធ្វើកិច្ចការអ្វីធំដុំបាននោះទេ។ ការបោះឆ្នោតសភាកាលពីថ្ងៃ២កុម្ភៈទៀតសោត ត្រូវបានតុលាការបដិសេធមិនផ្តល់សុពលភាព ដោយសារតែសកម្មជនប្រឆាំងបានបាតុកម្ម បង្ករាំងស្ទះដំណើរការ។ ទន្ទឹមនេះទៀត លោកស្រីយីងឡាក់កំពុងរងការចោទប្រកាន់ផ្លូវច្បាប់ ពីបទធ្វេសប្រហែសក្នុងរឿងទិញស្រូវអង្ករពីកសិករ និងពីបទដកហូតតំណែងមន្ត្រីរាជការមួយរូប ក្នុងលក្ខណៈមិនសមស្រប។
សកម្មជនប្រឆាំងរដ្ឋាភិបាលបានគំរាមថា នឹងរាំងស្ទះដំណើរការបោះឆ្នោតជាថ្មីទៀត។ នៅថ្ងៃអង្គារនេះ សកម្មជនប្រឆាំងជាង១០នាក់ បានទៅតវ៉ាមុខសណ្ឋាគារដែលគណៈកម្មការបោះឆ្នោតរៀបចំកិច្ចប្រជុំនោះ ទាមទារអោយសម្រេចអោយបានកំណែទម្រង់ នៅមុនពេលបោះឆ្នោត។ គួររំលឹកថា បាតុកម្មហិង្សាប្រឆាំងរដ្ឋាភិបាលថៃ រាប់ខែកន្លងមក បានសម្លាប់មនុស្ស២៥នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ