លោកស្រីយីងឡាក់ អាចជាប់បណ្តឹងដោយសារបានហូតតំណែងមេដឹកនាំសន្តិសុខជាតិម្នាក់
នៅថ្ងៃពុធនេះ តុលាការថៃបានទទួលពាក្យបណ្តឹងរបស់សមាជិកព្រឹទ្ធសភាថៃ២៧រូប ដែលបាន ប្តឹងចោទនាយករដ្ឋមន្ត្រីថៃយីងឡាក់ ថារំលោភរដ្ឋធម្មនុញ្ញ ដោយបានដកហូតមុខតំណែងរបស់អ្នកដឹកនាំសន្តិសុខជាតិថៃមួយរូប កាលពី៣ឆ្នាំមុន។ រឿងរ៉ាវប្តឹងផ្តល់ថ្មីនេះ កាន់តែធ្វើអោយលោកស្រី យីងឡាក់ជាប់ផុងខ្លួនក្នុងផ្លូវច្បាប់ថែមទៀត ព្រោះថា លោកស្រីអាចនឹងធ្លាក់ពីតំណែងនាយករដ្ឋមន្ត្រីបាន ប្រសិនបើលោកស្រីពិតជាត្រូវតុលាការរកឃើញថា បានរំលោភរដ្ឋធម្មនុញ្ញមែននោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ក្រុមសមាជិកព្រឹទ្ធសភាថៃ២៧នាក់ បានដាក់ពាក្យប្តឹងតុលាការប្រឆាំងនាយករដ្ឋមន្ត្រីថៃ យីងឡាក់ ពីបទបានដកហូតមុខងារមេដឹកនាំសន្តិសុខជាតិមួយរូប គឺលោក ថាវីល ភ្លីអិនស្រ៊ី កាលពីឆ្នាំ២០១១។ សមាជិកព្រឹទ្ធសភាទាំងនេះបានធ្វើញត្តិចាត់ថ្នាក់មួយ ចោទលោកស្រីយីងឡាក់ថា ការដែលលោកស្រីដកតំណែងលោកថាវីលនេះ គឺជាការរំលោភបំពានរដ្ឋធម្មនុញ្ញទាំងស្រុង។ កាលណោះលោកថាវីល ត្រូវបានដកចេញពីតំណែងមេដឹកនាំសន្តិសុខជាតិ អោយទៅកាន់ការងារមួយផ្សេងដែលជាការងារ មិនអោយលោកថាវីលបញ្ចេញសកម្មភាពអ្វីទាំងអស់។
នេះមិនមែនជារឿងប្តឹងចោទប្រកាន់ទី១សម្រាប់នាយករដ្ឋមន្ត្រីថៃនោះទេ។ កន្លងមក លោកស្រីយីងឡាក់ក៏កំពុងតែជាប់ចោទ ពីបទធ្វេសប្រហែសក្នុងសំណុំរឿងកម្មវិធីរដ្ឋទិញផលស្រូវជួយកសិករ ក្នុងតម្លៃ៥០ភាគរយ លើសតម្លៃទីផ្សារផងដែរ។ កន្លងមក កសិករថៃបានធ្វើបាតុកម្មចោទលោកស្រីយីងឡាក់ថាមិនបានបង់ថ្លៃស្រូវអោយពួកគេ។
ក្រុមប្រឆាំងបានចោទលោកស្រី យីងឡាក់ ថាបានធ្វើអោយរដ្ឋបាត់បង់ថវិកា ដោយសារតែការទិញស្រូវពីកសិករនេះ ហើយស្រូវអង្ករច្រើនសន្ធឹកសន្ធាប់ នៅគរដូចភ្នំ មិនទាន់បានលក់ចេញទៅវិញដែរ។ សំណុំរឿងក្តីក្តាំទាំងនេះ អាចនឹងទំលាក់លោកស្រីយីងឡាក់ ចេញពីតំណែងនាយករដ្ឋមន្ត្រីបាន។ ទន្ទឹមនេះដែរ កន្លងមក ក្រុមប្រឆាំងរដ្ឋាភិបាលបាន ចោទលោកស្រីយីងឡាក់ថា បានប្រើប្រាស់លុយរដ្ឋដើម្បីធ្វើការឃោសនានយោបាយនៅភាគខាងជើងប្រទេស។
ដោយឡែក ក្នុងសំណុំរឿងក្តីក្តាំប្រឆាំងនាយករដ្ឋមន្ត្រីនេះ ក្រុមអ្នកគាំទ្រនាយករដ្ឋមន្ត្រីថៃបានចោទក្រុមប្រឆាំងថា បានធ្វើរដ្ឋប្រហារផ្លូវច្បាប់។ គួរបញ្ជាក់ដែរថា ក្នុងចំណោមសមាជិកព្រឹទ្ធសភា១៥០នាក់ សមាជិក៧៣នាក់មិនបានឆ្លងកាត់ការបោះឆ្នោតនោះទេ ពួកគេត្រូវបានគេតែងតាំងតែប៉ុណ្ណោះ។ ដូច្នេះ សមាជិកព្រឹទ្ធសភា៧៣នាក់នេះ ត្រូវគេចាត់ទុកដូចជាក្រុមប្រឆាំងរដ្ឋាភិបាល។
សកម្មជនគាំទ្រលោកស្រីយីងឡាក់បានព្រមានសកម្មជនប្រឆាំងរដ្ឋាភិបាលថា ខ្លួននឹងធ្វើបាតុកម្មគាំទ្រការពារលោកស្រីយីងឡាក់ នៅថ្ងៃសៅរ៍ចុងសប្តាហ៍នេះ។ អំពើហិង្សាប៉ះទង្គិចក្នុងបាតុកម្មហិង្សា កន្លងមក បានសម្លាប់មនុស្ស២៤នាក់ហើយ ក្នុងនោះមានបាតុករម្នាក់បានត្រូវគ្រាប់កាំភ្លើងចំក្បាល នៅក្រុងបាងកក កាលពីថ្ងៃអង្គារកន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ