ក្រុមអាវក្រហមរាប់ពាន់នាក់ធ្វើបាតុកម្មគាំទ្រលោកស្រីយីងឡាក់ នៅបាងកក
នៅក្រុងបាងកក ប្រទេសថៃ ថ្ងៃសៅរ៍នេះ សកម្មជនអាវក្រហមរាប់ពាន់នាក់បាននាំគ្នាធ្វើបាតុកម្មគាំទ្រនាយករដ្ឋមន្ត្រីយីងឡាក់ ប្រឈមនឹងការវាយប្រហារផ្លូវច្បាប់ពីតុលាការ មកលើលោកស្រីយីងឡាក់។ បាតុកម្មនេះ នឹងបន្តធ្វើរហូតដល់ថ្ងៃចន្ទ។ ប៉ូលិសនិងទាហានជាង៣ពាន់នាក់ ត្រូវបានដាក់ពង្រាយនៅកន្លែងបាតុកម្ម ដើម្បីការពារសន្តិសុខ។ មេដឹកនាំចលនាអាវក្រហមអះអាងថា គ្មានបំណងនឹងធ្វើបាតុកម្មប៉ះទង្គិចជាមួយបាតុកម្មរបស់សកម្មជនប្រឆាំងរដ្ឋាភិបាលនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
នៅក្រុងបាងកក ថ្ងៃសៅរ៍នេះ ចលនាបាតុកម្មរបស់សកម្មជនអាវក្រហមថៃរាប់ពាន់នាក់ ដែលនាំគ្នាគាំទ្រលោកស្រីយីងឡាក់ ស្ថិតនៅតែ៣០គីឡូម៉ែត្រប៉ុណ្ណោះ ពីចលនាបាតុកម្មរបស់សកម្មជនប្រឆាំងរដ្ឋាភិបាលថៃ។ ប៉ុន្តែ អ្នកដឹកនាំចលនាអាវក្រហមប្រាប់ថា សកម្មភាពខ្លួនគ្មានទិសដៅប៉ះទង្គិចជាមួយក្រុមប្រឆាំងរដ្ឋាភិបាលទេ។ រដ្ឋាភិបាលថៃបានប្រាប់ថា ក្រុមបាតុករអាចមានដល់២សែននាក់ នៅថ្ងៃសៅរ៍នេះ។
តាំងពីថ្ងៃសុក្រម្សិលមិញ នៅក្នុងជំរំហ្វឹកហាត់មួយនៅភាគខាងជើងប្រទេស ក្រុមអាវក្រហមថៃរាប់រយនាក់ បានហ្វឹកហាត់កីឡាប្រដាល់ ជាការត្រៀមធ្វើបាតុកម្មគាំទ្រលោកស្រីយីងឡាក់ នៅថ្ងៃសៅរ៍នេះ។ ក្រុមអាវក្រហមថៃចង់សំដែងការគាំទ្រដល់លោកស្រីយីងឡាក់ នៅចំពោះមុខការប្រហារផ្លូវច្បាប់នានា ដែលលោកស្រីយីងឡាក់កំពុងជួបប្រទះនៅពេលនេះ។ ក្រុមអាវក្រហមចង់ប្រាប់សកម្មជនប្រឆាំងរដ្ឋាភិបាលថា ពួកគេមិនព្រមអោយតុលាការទំលាក់លោកស្រីយីងឡាក់ពីតំណែងជាដាច់ខាត។
តុលាការថៃទើបតែបានទទួលពាក្យបណ្តឹងរបស់សមាជិកព្រឹទ្ធសភាថៃ២៧នាក់ កាលពីថ្ងៃពុធកន្លងទៅ ជាពាក្យបណ្តឹងចោទប្រកាន់លោកស្រីយីងឡាក់ថា បានរំលោភរដ្ឋធម្មនុញ្ញ ដោយសារលោកស្រីបានដកហូតតំណែងមេដឹកនាំសន្តិសុខជាតិថៃមួយរូប កាលពីឆ្នាំ២០១១។ លោកស្រីយីងឡាក់ក៏ត្រូវបានគណៈកម្មការប្រឆាំងអំពើពុករលួយថៃ សង្ស័យថា ធ្វេសប្រហែសក្នុងកម្មវិធីទិញផលស្រូវជួយកសិករ។ ក្រុមប្រឆាំងបានចោទលោកស្រីយីងឡាក់ថា ដោយសារកម្មវិធីទិញផលស្រូវអង្ករក្នុងតម្លៃ៥០ភាគរយថ្លៃជាងតម្លៃទីផ្សារនេះ រដ្ឋថៃបានបាត់បង់ថវិកាសន្ធឹកសន្ធាប់ ហើយស្រូវអង្ករនៅគរដូចភ្នំមិនទាន់លក់ចេញបាននៅឡើយ។ សំណុំរឿងក្តីក្តាំទាំងនេះ អាចនឹងទំលាក់លោកស្រីយីងឡាក់ពីតំណែងនាយករដ្ឋមន្ត្រីបាន។
ប្រសិនបើលោកស្រីយីងឡាក់ធ្លាក់ពីតំណែង នោះថៃអាចតែងតាំងនាយករដ្ឋមន្ត្រីម្នាក់ទៀត ដែលមានលក្ខណៈអព្យាក្រឹត។ ប៉ុន្តែ ក្រុមអាវក្រហមព្រមានថា បើស្ថានភាពធ្លាក់ដល់ថ្នាក់មានការតែងតាំងបែបនេះ ពួកគេនឹងប្រើកម្លាំងបាយជំទាស់ជាក់ជាមិនខាន។ ថៃរងការរង្គោះរង្គើនយោបាយ៨ឆ្នាំមកហើយ។ ប្រជាជនក្នុងស្រុកបែងចែកគ្នាជា២បក្សពួក គឺមានសកម្មជនបញ្ញវន្តថៃជាក្រុមអភិរក្សនិយម មានជីវភាពមធ្យម ដែលមិនពេញចិត្តរដ្ឋាភិបាលយីងឡាក់ និងក្រុមអាវក្រហមមានប្រភពមកពីជនបទ និងមានជីវភាពមិនសូវជាធូរធារ។ តាំងពីខែវិច្ឆិកាមក ការប៉ះទង្គិចហិង្សាក្នុងបាតុកម្មប្រឆាំងរដ្ឋាភិបាលថៃ បានសម្លាប់មនុស្ស២៤នាក់ហើយ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ