ក្រុមហ៊ុនអាកាសចរណ៍ជាតិភូមានឹងបង្កើនការហោះហើរក្រៅប្រទេស
នៅថ្ងៃអង្គារនេះ ក្រុមហ៊ុនអាកាសចរណ៍ជាតិរបស់ភូមា ឈ្មោះ Myanmar Airways បានចុះកិច្ចសន្យាជួលយន្តហោះធុនប៊ូអ៊ីង ចំនួន ១០គ្រឿង ដើម្បីបង្កើនជើងហោះហើរអន្តរជាតិ សម្របទៅតាមតម្រូវការនៃលំហូរទេសចរបរទេស ដែលកំពុងតែកើនឡើងខ្លាំង ចាប់តាំងពីរដ្ឋាភិបាលភូមាបានរៀបចំធ្វើកំណែទម្រង់នយោបាយ ហើយត្រូវបានសហគមន៍អន្តរជាតិចាប់ផ្តើមរាប់រកឡើងវិញ។
ចុះផ្សាយនៅថ្ងៃ៖
កិច្ចសន្យាជួលយន្តហោះ ដែលមានតម្លៃជាទឹកប្រាក់ជិត ១ពាន់លានដុល្លារអាមេរិក ត្រូវបានធ្វើឡើង រវាងក្រុមហ៊ុន Myanmar Airways និងក្រុមហ៊ុនជួលយន្តហោះរបស់អាមេរិក នៅក្នុងឱកាសពិព័រណ៍យន្តហោះ នៅក្នុងប្រទេសសិង្ហបុរី។ យន្តហោះទាំង ១០គ្រឿង ដែលក្រុមហ៊ុន Myanmar Airways ចុះកិច្ចសន្យាជួលនេះ គឺជាយន្តហោះធុន Boeing 737 ដែលអាចដឹកអ្នកដំណើរ ពី១៦០នាក់ ទៅ១៨០នាក់។
រដ្ឋមន្រ្តីក្រសួងដឹកជញ្ជូនរបស់ភូមាបានថ្លែងក្នុងពិធីចុះហត្ថលេខាលើកិច្ចសន្យាជួលយន្តហោះនេះថា "ក្រុមហ៊ុន Myanmar Airways ដែលបានផ្អាកជើងហោះហើរក្រៅប្រទេស តាំងពីឆ្នាំ១៩៩៣មកនោះ ឥឡូវនេះ កំពុងបោះជំហានចូលក្នុងទីផ្សារអាកាសចរណ៍អន្តរជាតិវិញហើយ"។
គួរបញ្ជាក់ថា នៅក្នុងពេលបច្ចុប្បន្ននេះ ក្រុមហ៊ុន Myanmar Airways ប្រើតែយន្តហោះតូចៗ ហើយជើងហោះហើរភាគច្រើន ធ្វើឡើងតែនៅក្នុងប្រទេសប៉ុណ្ណោះ។ ជើងហោះហើរក្រៅប្រទេស មានតែទៅកាន់ប្រទេសឥណ្ឌាមួយប៉ុណ្ណោះ។
រដ្ឋមន្រ្តីក្រសួងដឹកជញ្ជូនរបស់ភូមាបានឲ្យដឹងថា យន្តហោះធុនប៊ូអ៊ីង ដែលក្រុមហ៊ុន Myanmar Airways ទើបនឹងចុះកិច្ចសន្យាជួលថ្ងៃនេះ នឹងត្រូវយកមកប្រើ ដើម្បីពង្រីកជើងហោះហើរ ទៅកាន់ប្រទេសជប៉ុន និងកូរ៉េខាងត្បូង ដើម្បីសម្របទៅតាមតម្រូវការនៃចំនួនអ្នកដំណើរ ដែលមានការកើនឡើងយ៉ាងខ្លាំង ចាប់តាំងពីឆ្នាំ២០១១ ក្រោយពីភូមាបានបិទបញ្ចប់របបដឹកនាំយោធា។
គេឃើញថា អត្រាកំណើននៃចំនួនអ្នកដំណើរតាមផ្លូវអាកាស នៅភូមា ក៏កំពុងតែទាក់ទាញក្រុមហ៊ុនអាកាសចរណ៍អន្តរជាតិយ៉ាងខ្លាំងផងដែរ។ ជាក់ស្តែង កាលពីឆ្នាំទៅមិញ ក្រុមហ៊ុនអាកាសចរណ៍ដ៏ធំមួយរបស់ជប៉ុន គឺក្រុមហ៊ុន All Nippon Airways (ANA) បានទិញភាគហ៊ុន ៤៩% របស់ក្រុមហ៊ុន Asian Wings Airways ដែលជាក្រុមហ៊ុនអាកាសចរណ៍ក្នុងស្រុករបស់ភូមា ហើយដែលទើបនឹងបានបើកជើងហោះហើរក្រៅប្រទេសជាលើកទីមួយ ទៅកាន់ប្រទេសថៃ កាលពីខែមករា កន្លងទៅថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ