កូរ៉េខាងត្បូងបានសិទ្ធិសាងសង់និងធ្វើអាជីវកម្មអាកាសយានដ្ឋានថ្មីរបស់ភូមា
ជាមួយនឹងកើនឡើងឥតឈប់ឈរចំនួនទេសចរ និងអ្នកវិនិយោគ ភូមាសម័យបើកចំហទីផ្សារ ត្រូវការពង្រីកអាកាសយានដ្ឋាន ឱ្យបានសមស្រប។ អាកាសយានដ្ឋានខ្នាតអន្តរជាតិថ្មី នៅក្បែរទីក្រុងចាស់រ៉ង់ហ្គូន នឹងត្រូវសាងសង់ និងធ្វើអាជីវកម្មដោយក្រុមហ៊ុនអាកាសចរណ៍កូរ៉េខាងត្បូង ចាប់ពីឆ្នាំ២០១៨ទៅ ដល់ឆ្នាំ២០៦៧។
ចុះផ្សាយនៅថ្ងៃ៖
ស្តាប់ - ០១:៣៥
នៅទីបំផុតគឺក្រុមហ៊ុន Incheon Airport Consortium របស់កូរ៉េខាងត្បូង ដែលជាអ្នកបានទទួលសិទ្ធិសាងសង់ អាកាសយានដ្ឋានអន្តរជាតិភូមាថ្មី Hanthawaddy ឈ្នះក្រុមហ៊ុនរបស់បារាំង និងមានសិទ្ធិធ្វើអាជីវកម្ម រយៈពេល៥០ឆ្នាំ ពោលគឺរហូតដល់ឆ្នាំ២០៦៧។ កិច្ចសន្យាបង្ហើយ ក្នុងទំហំទឹកប្រាក់ប្រមាណជាជាង ១ពាន់លានដុល្លារសហរដ្ឋអាមេរិក នឹងត្រូវចុះហត្ថលេខា ដោយភាគីពាក់ព័ន្ធនៅចុងឆ្នាំ២០១៣។ នេះបើតាមការគូសបញ្ជាក់របស់ក្រសួងអាកាសចរណ៍ស៊ីវិលភូមា និងក្រសួងដឹកជញ្ជូនកូរ៉េខាងត្បូង នៅថ្ងៃអាទិត្យទី ១១សីហា។
Hanthawaddy នឹងក្លាយជាអាកាសយានដ្ឋានអន្តរជាតិទីពីរ របស់ភូមា មានទីតាំងនៅចម្ងាយប្រមាណ៨០គ.ម. ពីរដ្ឋធានីចាស់ រ៉ង់ហ្គូន ហើយនឹងត្រូវសាងសង់ចប់នៅរវាងឆ្នាំ២០១៨ និងមានសមត្ថភាពទទួលភ្ញៀវ ១២លាននាក់ក្នុងមួយឆ្នាំៗ។
អាកាសយានដ្ឋានអន្តរជាតិរង់ហ្គូន អាចទទួលអ្នកដំណើរបានត្រឹមតែប្រមាណជាង២លាន៧សែនប៉ុណ្ណោះ គឺមិនអាចឆ្លើយតបទៅនឹងសកម្មភាពជាក់ស្តែងនាពេលបច្ចុប្បន្ននិងអនាគតទេ។ បន្ទាប់ពីរស់នៅឯកា ក្រោមរបបដឹកនាំផ្តាច់ការអស់ជិតកន្លះសតវត្សរ៍មក នៅខែមីនាឆ្នាំ២០១១ រដ្ឋាភិបាលភូមាកែប្រែរូបភាពមកជារដ្ឋាភិបាលស៊ីវិល។ ការធ្វើកំណែទម្រង់នយោបាយ សេដ្ឋកិច្ច ដ៏គួរឱ្យភ្ញាក់ផ្អើល បានទាក់ទាញចំណាប់អារម្មណ៍ពិភពលោក ទាំងទេសចរ ទាំងអ្នកជំនួញ វិនិយោគនាំគ្នារួសរាន់សំរុកចូលក្នុងប្រទេស ដ៏មានសក្តានុពលសេដ្ឋកិច្ចមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ