កម្ពុជា - 
អត្ថបទចុះ​ផ្សាយ​នៅ​ថ្ងៃ សៅរ៍ 05 ឧសភា 2012 - ព័ត៌មានទើប​កែប្រើ​លើកចុងក្រោយ​ ថ្ងៃ សៅរ៍ 05 ឧសភា 2012

អ្នក​គាំទ្រ​គណបក្ស​ប្រជាជន​មាន​ចំនួន៦៧%

លោក​នាយក​រដ្ឋមន្ត្រី​ ហ៊ុន សែន
លោក​នាយក​រដ្ឋមន្ត្រី​ ហ៊ុន សែន
© ចាន់ណា/rfi

ដោយ គី សុខលីម

នៅពេល​ដែល​កាល​បរិចេ្ឆទ​នៃ​ការ​បោះឆ្នោត​កាន់តែ​ខិត​ចូលមក​ជិត​បន្តិច​ម្តង​ៗ​នោះ នៅ​ថ្ងៃ​ទី​៥​ខែ​ឧសភា​នេះ លោកនាយក​រដ្ឋមន្រ្តី ហ៊ុន សែន​ បាន​ប្រកាស​ថា យោងតាម​ការ​ស្ទង់​មតិ​មួយ អ្នកគាំទ្រ​គណបក្ស​ប្រជាជន​មានចំនួន​៦៧%។ ប៉ុន្តែ​តំណាងរាស្ត្រ​គណបក្ស​សមរង្ស៊ី​​បាន​ប្រតិកម្ម​ថា ពួកគេមិនមាន​ជំនឿ​ពិតប្រាកដ​លើ​ការ​ស្ទង់មតិ​នោះ​ទេ។

សេចក្តីរាយការណ៍​របស់ គី សុខលីម ពីទីក្រុង​ភ្នំពេញ
 

05/05/2012 by គី សុខលីម

«ប្រជាពលរដ្ឋ​ខ្មែរ​ចំនួន​៦៧​%​ក្នុង​ចំណោម​អ្នក​ផ្តល់​បទ​សម្ភាសន៍​២​ពាន់​នាក់​បាន​​សម្តែង​មតិ​គាំទ្រ​គណបក្ស​ប្រជាជន​កម្ពុជា។ ៨៧%​មាន​ជំនឿ​លើ​ការដឹកនាំ​របស់​លោក ហ៊ុន សែន ១៣%​មិនមាន​ជំនឿ​ទេ។ ប្រជាពល​រដ្ឋ​៨១%​យល់​ថា រដ្ឋាភិបាល​កំពុង​ដើរ​លើ​ផ្លូវ​ត្រូវ»។ នេះ​បើយោង​តាម​ការ​អោយ​ដឹងរបស់​លោក​នាយក​រដ្ឋមន្ត្រី ហ៊ុន សែន នៅ​ថ្ងៃ​សៅរ៍​ទី​៥​ខែ​ឧសភា​នេះ​ពី​ខេត្ត​ស្ទឹងត្រែង​ទី​ដែល​លោក​បើក​សម្ពោធ​ការដ្ឋាន​ផ្លូវ។ ប្រមុខ​រាជរដ្ឋាភិបាល​កម្ពុជា​បាន​ពន្យល់​ថា តួលេខ​នេះ​ត្រូវ​បាន​គេ​បង្ហាញនៅក្នុង​ការ​ស្ទង់​មតិ​មួយ​ដែល​ធ្វើ​ដោយ​ជន​បរទេស​ពោល​គឺ​មិនមែន​ជនជាតិខ្មែរ​ជា​អ្នក​ធ្វើ​ទេ។ ប៉ុន្តែ​លោក​នាយករដ្ឋ​មន្ត្រី​មិន​បាន​បញ្ជាក់​ប្រាប់​ថា ស្ថាប័ន​ឬ​ជន​បរទេស​ណា​ជា​អ្នក​ធ្វើ​នោះ​ទេ។ ការ​បង្ហើប​អោយ​ដឹង​របស់​លោក ហ៊ុន សែន​នៅ​ថ្ងៃ​នេះ​បាន​ធ្វើ​ឡើង មុន​ពេល​ដែល​ប្រទេស​កម្ពុជា​នឹង​រៀបចំការ​បោះឆ្នោត​ឃុំ​សង្កាត់​នៅខែ​មិថុនា​២០១២​ខាង​មុខ​នេះ​​និង​ការ​បោះឆ្នោតតំណាង​រាស្រ្ត​នៅ​ឆ្នាំ​២០១៣។
 
លោក ហ៊ុន សែន បាន​បន្ត​ទៀត​ថា ការ​ស្ទង់​មតិ​កាល​ពី​ឆ្នាំ​២០០៨​បាន​បង្ហាញ​ថា មាន​ប្រជាពលរដ្ឋ​៥៨​%​បាន​គាំទ្រ​គណបក្ស​ប្រជាជន​កម្ពុជា​។ តែគណបក្ស​ទទួល​បាន​កៅអី​រដ្ឋសភា​រហូត​ដល់​ទៅ​៩០​ ចុះ​ដល់​ពេល​នេះ ​អ្នកគាំទ្រ​មាន​ដល់​៦៧%....តើ​គណបក្ស​ប្រជាជន​កម្ពុជា​អាច​ទទួល​បាន​កៅអីចំនួន​ប៉ុន្មាន​បន្ថែម​ទៀត។ លោក នាយករដ្ឋមន្រ្តី ហ៊ុន សែន បាន​លើក​ឡើង​ថា ប្រសិនបើ​អត្រា​នៃ​អ្នកមាន​ជំនឿ​លើ​រូប​លោក​ធ្លាក់​ចុះ​នៅ​ក្រោម​៦០%​ លោក​នឹង​ចាក​ចេញ​ពីតំណែង​ជា​នាយក​រដ្ឋមន្ត្រី។ បើ​ទោះ​បី​ជា​លោក​នាយក​រដ្ឋមន្រ្តី​ប្រកាស​អះអាង​បែប​នេះ​ក៏​ដោយក្តី ក៏សមាជិក​គណបក្ស​ប្រជាជន​ទាំងមូល​ធ្លាប់​បាន​ប្រកាស​ជា​ច្រើន​លើក​ច្រើនសា​​ហើយ​ថា ពួកគេ​គាំទ្រ​បេក្ខភាព​លោក ហ៊ុន សែន ជានាយក​រដ្ឋមន្ត្រី​នៅ​ក្នុង​អាណត្តិ​ជា​បន្ត​បន្ទាប់​ខាង​មុខ​ទៀត​នេះ។
 
ឆ្លើយតប​ទៅ​នឹង​លទ្ធផល​នៃ​ការ​ស្ទង់​មតិ​ដែល​ថ្លែង​ដោយ​លោក នាយករដ្ឋមន្ត្រី ​ហ៊ុន សែន ​លោក យឹម សុវណ្ណ តំណាងរាស្ត្រ​និង​ជា​អ្នក​នាំពាក្យ​គណបក្ស​សមរង្ស៊ី​បាន​ពន្យល់​ថា លោក​ពិបាក​នឹង​ជឿ​លើ​លទ្ធផល​នេះ​ទាំង​ស្រុងណាស់​ពីព្រោះ​ការស្ទង់​មតិ​នេះ​ធ្វើ​ឡើង​ក្នុង​បរិបទ​ដែល​ការ​បញ្ចេញ​មតិ​នៅមាន​កំណត់​ ប្រជាពលរដ្ឋ​ខ្មែរ​នៅ​មាន​ការ​ភ័យខ្លាច។ លោក យឹម សុវណ្ណ បាន​បន្ត​ទៀត​ថា អ្វី​ដែល​ជាការពិត គេ​ត្រូវរង់​ចាំមើល​លទ្ធផល​បោះឆ្នោតជាក់ស្តែង។
 
នៅ​ក្នុង​ប្រធាន​បទ​នយោបាយ​ដដែល លោក ហ៊ុន សែន បាន​ថ្លែង​ប្រាប់​សាធារណជន​ថា កាល​ពី​យប់​ម្សិលមិញ​នេះ លោក​បាន​និយាយ​ទូរស័ព្ទជាមួយ​តំណាងរាស្រ្ត​បក្ស​ប្រឆាំង​ម្នាក់​ជាង​២០​នាទី​ពី​ការ​វិវឌ្ឍន៍​នយោបាយចុង​ក្រោយ​នៅ​ក្នុង​ប្រទេស​កម្ពុជា​ប៉ុន្តែ​លោក​មិនបាន​បង្ហាញ​អត្ត​សញ្ញាណតំណាងរាស្ត្រ​រូប​នោះ​ទេ​ដោយ​លោក​គ្រាន់​តែ​និយាយ​បញ្ឆិតបញ្ឆៀង​ថា តំណាងរាស្រ្ត​បក្ស​ប្រឆាំង​រូបនោះ​រស់​នៅ​ក្រុង​តាខ្មៅ​ខេត្ត​កណ្តាល៕

tags: កម្ពុជា
អត្ថាធិប្បាយ (1)

អំពីការដឹកនាំរបស់រដ្ឋភិបាល

តួរលេខដែលស្រង់ចេញពីប្រជាជនជាលក្ខណៈsampleនេះទៅលើប្រជាជនដែលមិនមានមូលដ្ឋានពត័មាននៃការដឹកនាំរបស់រដ្ឋាភិបាលកន្លងទៅគ្រប់ជ្រុងជ្រោយដើម្បីផ្ដល់ជាfeedbackប្រកបដោយសុក្រិតភាពរឺមានការលំអៀងតិចតួចនោះទេ។​ ចំពោះខ្ញុំមិនឯកភាពនឹងរបាយការណ៍នេះទាំងស្រុងទេ។

ប្រតិកម្ម​ជុំវិញ​អត្ថបទនេះ
The content of this field is kept private and will not be shown publicly.
To prevent automated spam submissions leave this field empty.
CAPTCHA
This question is for testing whether you are a human visitor and to prevent automated spam submissions.
Close