លោក ហ៊ុន សែន ប្រមូលលុយបានជិត៥លានដុលា្លរពីកម្មវិធីបាល់ទាត់សប្បុរសធម៌
លោក ហ៊ុន សែន ប្រធានព្រឹទ្ធសភាកម្ពុជាបានប្រកាសនៅលើហ្វេសប៊ុករបស់លោកនៅថ្ងៃចន្ទ ទី២៩ ខែមេសា ឆ្នាំ២០២៤នេះថា លោកទទួលបានថវិកាឧបត្ថម្ភពីសប្បុរសជនជាង ៤,៨លានដុល្លារ សម្រាប់ការរៀបចំប្រកួតបាល់ទាត់សប្បុរសធម៌មួយនៅថ្ងៃទី០១ ខែឧសភា ខាងមុខ។ ការទទួលបានថវិកាបរិច្ចាកដ៏ច្រើនសន្ធឹកសន្ធាប់ត្រឹមរយៈពេលតែ៥ថ្ងៃនេះ ធ្វើឡើងក្រោយ លោក ហ៊ុន សែន ប្រកាសដឹកនាំការប្រកួតបាល់ទាត់ (Cambodia football super stars) កាលពីថ្ងៃទី ២៥ ខែ មេសា កន្លងទៅ។
ចុះផ្សាយនៅថ្ងៃ៖
ស្តាប់ - ០១:៤១
ថវិកាជាង ៤,៨លានដុល្លារ ដែលប្រមូលបានពីសប្បុរសជនសម្រាប់ព្រឹត្តិការណ៍ប្រកួតបាល់ទាត់តារាកម្ពុជា (Cambodia football super stars)ត្រូវបានលោក ហ៊ុន សែន ប្រធានព្រឹទ្ធសភាប្រកាសតាមហ្វេសប៊ុករបស់លោកថានឹងដកចំនួន ១លានដុល្លារ ដើម្បីបែងចែកឲ្យកន្លែងដែលជួបការលំបាកមួយចំនួន ក្នុងនោះ ផ្តល់ឲ្យមន្ទីរពេទ្យកុមារអង្គរខេត្តសៀមរាបចំនួន ៥០ម៉ឺនដុល្លារ ផ្តល់ឲ្យមជ្ឈមណ្ឌលព្យាបាលកុមារបេះដូងជប៉ុនខេត្តកំពង់ស្ពឺចំនួន ៣០ម៉ឺនដុល្លារ និងផ្តល់ជូនគ្រួសារយុទ្ធជន ដែលបានពលីដោយសារផ្ទុះគ្រាប់នៅយោធភូមិភាគ៣ ចំនួន២០គ្រួសារដោយ ១គ្រួសារទទួលបាន ១ម៉ឺនដុល្លារ ដែលសរុបអស់ ២០ម៉ឺនដុល្លារ។
ចំណែកថវិកាដែលនៅសេសសល់ នឹងត្រូវប្រគល់ជូនមន្ទីរពេទ្យគន្ធបុប្ផាទាំងអស់។ នេះបើតាមការបញ្ជាក់របស់លោក ហ៊ុន សែន។
សូមរំលឹកថា ក្រោមមូលបទ «រួមគ្នាដើម្បីសប្បុរសធម៌ និងប្រយុទ្ធប្រឆាំងគ្រឿងញៀន និងដើម្បីប្រមូលថវិកាជួយដល់មន្ទីរពេទ្យគន្ធបុប្ផា» អតីតនាយករដ្ឋមន្ត្រីកម្ពុជារូបនេះបានប្រកាសកាលពីថ្ងៃទី ២៥ ខែសីហាថា លោកនឹងចូលរួមដឹកនាំការប្រកួតជាមួយគ្រូបង្វឹកផ្លូវការនៅស្តាតអូឡាំពិកនាល្ងាចថ្ងៃទី០១ ខែឧសភា ឆ្នាំ២០២៤ ដោយចាប់ផ្តើមនូវទម្រង់លេងរបស់លោកគឺ ៣-៤-៣។
ក្រៅពីអំពាវនាវដល់សប្បុរសជនឲ្យចូលរួមគាំទ្រក្នុងព្រឹត្តិការណ៍មួយនេះ លោក ហ៊ុន សែន និងភរិយាក៏បានប្រកាសចូលថវិកាចំនួន ២០០លានរៀលសម្រាប់ជួយដល់មន្ទីរពេទ្យគន្ធបុប្ផាដែលកំពុងត្រូវការសម្រាប់ព្យាបាលដល់កុមារកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ