បក្សភ្លើងទៀន៖ការចាប់ខ្លួនមន្ត្រីបក្សនៅកំពង់ចាមជាការគំរាមកំហែងសកម្មជនទូទាំងប្រទេស
គណបក្សភ្លើងទៀនបានអំពាវនាវឲ្យអាជ្ញាធរដោះលែងសមាជិករបស់ខ្លួនឲ្យមានសេរីភាពឡើងវិញ បន្ទាប់ពីសកម្មជនគណបក្សភ្លើងទៀនម្នាក់ទៀតនៅខេត្តកំពង់ចាម លោក គង់ ថារ៉េត ត្រូវបានអាជ្ញាធរចាប់ខ្លួនកាលពីថ្ងៃទី២៨ ខែមេសា ឆ្នាំ២០២៤។ គួរបញ្ជាក់ថា លោក គង់ ថារ៉េត គឺជាសមាជិកគណបក្សប្រឆាំងទី៧ ដែលត្រូវបានអាជ្ញាធរចាប់ខ្លួននៅក្នុងខែមេសា ឆ្នាំ២០២៤ នេះ។
ចុះផ្សាយនៅថ្ងៃ៖
ស្តាប់ - ០១:៤៦
គណបក្សភ្លើងទៀនបានចាត់ទុកការចាប់ខ្លួនលោក គង់ ថារ៉េត អនុប្រធានគណៈកម្មាធិការប្រតិបត្តិគណបក្សភ្លើងទៀនក្រុងកំពង់ចាម និងជាចៅសង្កាត់រងទី២ នៃសង្កាត់វាលវង់ ក្រុងកំពង់ចាម ជាការគំរាមកំហែងថ្មីមួយទៀតក្នុងគោលបំណងរារាំងការធ្វើសកម្មភាពនយោបាយស្របច្បាប់របស់គណបក្ស និងសកម្មជនគណបក្សនៅទូទាំងប្រទេស។
បើតាមសេចក្តីថ្លែងការណ៍របស់គណបក្សប្រឆាំងមួយនេះ សមត្ថកិច្ចមិនបានប្រាប់ពីមូលហេតុនៃការចាប់ខ្លួនលោក គង់ ថារ៉េត ទេ។ ចំណែកមន្ត្រីប៉ូលីសជាន់ខ្ពស់នានានៃស្នងការដ្ឋានប៉ូលីសខេត្តកំពង់ចាមបានបដិសេធមិនធ្វើអត្ថាធិប្បាយអ្វីទាំងអស់។
តែលោក អំ សំអាត នាយកប្រតិបត្តិអង្គការការពារសិទ្ធិមនុស្សលីកាដូបានមើលឃើញថា សកម្មជន និងអ្នកនយោបាយគណបក្សប្រឆាំងត្រូវបានចាប់ខ្លួនជាបន្តបន្ទាប់ ក្រោយគណបក្សភ្លើងទៀនមិនអាចចូលរួមបោះឆ្នោតកាលពីឆ្នាំ២០២៣។ តាមលោក អំ សំអាត ការបន្តចាប់ខ្លួនសមាជិកបក្សប្រឆាំងបានធ្វើឲ្យបរិយាកាសនយោបាយល្អក់កករ និងរងការរិះគន់ពីសហគមន៍អន្តរជាតិ។
ក្នុងនាមសង្គមស៊ីវិល លោកចង់ឃើញអ្នកនយោបាយទាំងអស់តម្កល់ប្រយោជន៍ជាតិ និងប្រជាជនជាធំ ពោលធ្វើយ៉ាងណាឲ្យបរិយាកាសនយោបាយមានការធូរស្រាល។
សូមរំលឹកថា ចាប់តាំងពីដើមឆ្នាំ២០២៣ រហូតដល់ខែមេសា ឆ្នាំ២០២៤នេះ មានមន្ត្រីសំខាន់ៗនៅតាមមូលដ្ឋានរបស់បក្សភ្លើងទៀនជាង២០នាក់ ត្រូវបានអាជ្ញាធរចាប់ខ្លួន និងឃុំខ្លួននៅក្នុងពន្ធនាគារ។ ក្នុងចំណោមអ្នកនយោបាយដែលត្រូវបានចាប់ខ្លួនទាំងនោះមាន លោក ថាច់ សេដ្ឋា អនុប្រធានគណបក្ស មានសមាជិកគណៈកម្មាធិការនាយក ប្រធាន និងអនុប្រធានប្រតិបត្តិគណបក្សភ្លើងទៀនប្រចាំខេត្ត ក្រុងនានា រួមទាំងចៅសង្កាត់រង និងជំទប់ឃុំផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ