អាមេរិកចង់រក្សាទុកមូលដ្ឋានយោធា៩នៅអាហ្វហ្កានីស្ថានក្រោយ២០១៤
សហរដ្ឋអាមេរិកមានបំណងរក្សាទុកមូលដ្ឋានយោធាខ្លួន៩នៅអាហ្វហ្កានីស្ថានក្រោយពីឆ្នាំ២០១៤។ នេះជាសេចក្តីថ្លែងរបស់លោកប្រធានាធិបតី Hamid Karzaï នៅថ្ងៃព្រហស្បតិ៍ម្សិលមិញ។ សេចក្តីថ្លែងរបស់ប្រធានាធិបតីអាហ្វហ្កានីស្ថាននេះ ត្រូវបានទីក្រុងវ៉ាស៊ីនតោនប្រតិកម្មភ្លាមៗ ថាអាមេរិកពុំមែនស្វះស្វែងរក្សាទុកមូលដ្ឋានខ្លួនជាអចិន្ត្រៃយ៍នៅក្នុងប្រទេសអាហ្វហ្កានីស្ថានឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
បន្ទាប់ពីសេចក្តីថ្លែងការណ៍របស់ប្រធានាធិបតីអាហ្វហ្កានីស្ថានកាល ពី ម្សិលមិញ សេតវិមាន បានបញ្ចេញប្រតិកម្មភ្លាមៗថា អាមេរិក ពុំមែនស្វះស្វែងចង់រក្សាទុកមូលដា្ឋនយោធាខ្លួនជាអចិន្ត្រៃយ៍នៅក្នុងប្រទេសអាហ្វហ្កានីស្ថានឡើយ។ នេះ ជាសេចក្តីថ្លែងរបស់អ្នកនាំពាក្យសេតវិមានដែលបន្ថែមទៀតថា៖ « គ្រប់វត្តមានកងទ័ពអាមេរិកនៅអាហ្វហ្កានីស្ថាន គឺត្រូវធ្វើឡើងតាមសេចក្តីស្នើសុំរបស់កាប៊ូលតែប៉ុណ្ណោះ។ ក៏ប៉ុន្តែ លោក កាហ្សៃ បានថែមទាំងអះអាងទៀតថា “ ក្រៅពីសហរដ្ឋអាមេរិក សមាជិកអូតង់ផ្សេងទៀត ក៏បានសន្យារក្សាទុកកងទ័ពខ្លួននៅក្រោយឆ្នាំ២០១៤ដែរ។
ការរក្សាទុកមូលដ្ឋានយោធាបរទេសនៅអាហ្វហ្កានីស្ថាន ត្រូវបានចលនាឧទ្ទាមតាលីបង់ បរិហារជានិច្ច។
សូមបញ្ជាក់ថា អង្គការអូតង់នឹងដកកងទ័ពអន្តរជាតិទាំំងអស់ ប្រមាណ១០ម៉ឺននាក់ពីអាហ្វហ្កានីស្ថាននៅចុងឆ្នាំ ២០១៤។ វ៉ាស៊ីនតោន ដែលមានកងទ័ពខ្លួន២/៣នៅលើទឹកដីអាហ្វហ្កានីស្ថាន ធ្លាប់បានបញ្ជាក់ប្រាប់ថាក្រោយឆ្នាំ២០១៤ អាមេរិក សុខចិត្តរក្សាវត្តមានទាហាន លុះណា តែកាប៊ូល សុខចិត្តផ្តល់អភ័យឯកសិទ្ធឲ្យដល់ទាហានអាមេរិក។
អូតង់ បានជួយទាហានអាហ្វហ្កានីស្ថានប្រយុទ្ធប្រឆាំងនឹងពួកឧទ្ទាមតាលីបង់ជាង១០ឆ្នាំមកហើយ។ ពួកឧទ្ទាមតាលីបង់ដែលក្នុងប៉ុន្មានឆ្នាំចុងក្រោយនេះ បានធ្វើសកម្មភាពយ៉ាងខ្លាំង យល់ព្រមចូលចរចា ដរាបណាកងទ័ពបរទេស ដកចេញអស់ពីអាហ្វហ្កានីស្ថាន។ ប្រទេសអាហ្វាហ្កានីស្ថានដែលនឹងត្រូវធ្វើការបោះឆ្នោតប្រធានាធិបតីនៅឆ្នាំ២០១៤។
សំរាប់អ្នកស្រាវជ្រាវ សេចក្តីជូនដំណឹងរបស់លោកប្រធានាធិបតីហាមីតកាហ្សៃនេះ គឺគ្រាន់តែចង់ស្ទាបស្ទង់ប្រតិកម្មឬក៏មតិសាធារណៈអាហ្វហ្កនីស្ថាន ប៉ាគីស្ថាន អ៊ីរ៉ង់និងប្រទេសជិតខាងខ្លួនតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ