ប្រធានាធិបតីអាហ្វហ្កានីស្ថាន៖« CIA ពិតជាបានផ្តល់លុយដោយសម្ងាត់មែន »
នៅប្រទេសអាហ្វហ្កានីស្ថាន លោកប្រធានាធិបតី Hamid Karzai បានប្រកាសទទួលស្គាល់ជាផ្លូវការនៅថ្ងៃចន្ទ ទី២៩ មេសាម្សិលមិញថា ក្នុងរយៈពេល ១០ឆ្នំាចុងក្រោយនេះ ក្រសួងស៊ើបការសម្ងាត់អាមេរិកំាង CIA ពិតជាបានផ្តល់លុយដោយសម្ងាត់ឲ្យក្រុមប្រឹក្សាសន្តិសុខជាតិរបស់វិមានប្រធានាធិបតីអាហ្វហ្កានីស្ថាន។ ការប្រកាសទទួលស្គាល់របស់លោក Hamid Karzai បានធ្វើឡើង ក្រោយពីព័ត៌មាននេះត្រូវបានចុះផ្សាយដោយកាសែតអាមេរិកំាងមួយឈ្មោះ New York Times។
ចុះផ្សាយនៅថ្ងៃ៖
ស្តាប់ - ០២:៣៤
« ពិតណាស់ ក្នុងរយៈពេល ១០ឆ្នំាចុងក្រោយនេះ ក្រុមប្រឹក្សាសន្តិសុខជាតិនៃវិមានប្រធានាធិបតីអាហ្វហ្កានីស្ថានពិតជាបានទទួលប្រាក់ពី CIA ដោយសម្ងាត់មែន តែមិនមានចំនួនច្រើនប៉ុន្មានទេ » នេះជាការថ្លែងរបស់លោកប្រធានាធិបតីអាហ្វហ្កានីស្ថាន Hamid Karzai នៅក្នុងសន្និសីទកាសែតមួយនាដំណើរទស្សនកិច្ចរបស់លោកក្នុងប្រទេសហ្វំាងឡង់។ ក៏ប៉ុន្តែ លោក Karzai មិនបានបញ្ជាក់ពីចំនួនដែលបានទទួល និងក៏មិនបានពន្យល់ឲ្យបានច្បាស់លាស់អំពីគោលដៅនៃការប្រើប្រាស់លុយកាក់នោះ។ លោក Karzai គ្រាន់តែបានបញ្ជាក់ថា លុយកាក់ទំាងនោះត្រូវបានយកទៅចាយវាយលើផ្នែកផ្សេងៗ រួមមាន ជួយង្រ្គោះអ្នករងរបួស អ្នកជំងឺ ឬមួយក៏ចំណាយលើការជួលផ្ទះជាដើម និងថា ការគំាទ្រផ្នែកហិរញ្ញវត្ថុនេះពិតជាមានប្រយោជន៍ខ្លំាងណាស់។
ការប្រកាសទទួលស្គាល់ជាផ្លូវការរបស់លោកប្រធានាធិបតីអាហ្វហ្កានីស្ថានពេលនេះបានធ្វើឡើង ក្រោយពីព័ត៌មាននេះត្រូវបានផ្សព្វផ្សាយជាសាធារណៈដោយកាសែតអាមេរិកំាង New York Times កាលពីថ្ងៃចន្ទ ទី២៩ មេសាម្សិលមិញ។ យោងតាម New York Times មានលុយសុទ្ធរាប់សិបលានដុល្លារត្រូវបាន CIA ដាក់ក្នុងវ៉ាលិស ឬមួយក៏ដាក់ក្នុងកាបូបស្ពៀយខ្នងប្រគល់ទៅឲ្យក្រុមប្រឹក្សាសន្តិសុខជាតិនៃវិមានប្រធានាធិបតីអាហ្វហ្កានីស្ថាន។ បន្ទាប់មក វិមានប្រធានាធិបតីបានយកលុយទំាងនោះមួយភាគទៅចែកចាយឲ្យមេកន្ទ្រាញសង្រ្គាមដែលអ្នកខ្លះមានជាប់ពាក់ព័ន្ធនឹងការរត់ពន្ធគ្រឿងញាន ឬមួយក៏ប្រគល់ទៅឲ្យពួកឧទ្ទាមតាលីបង់ ជាថ្នូរនឹងការធានានូវសេចក្តីស្មោះត្រង់របស់ពួកគេ។
គួរជម្រាបជូនថា ក្រៅពីសហរដ្ឋអាមេរិក ប្រទេសអ៊ីរ៉ង់ក៏ធ្លាប់បានលួចផ្តល់លុយស្ងាត់ៗឲ្យទៅទីប្រឹក្សាម្នាក់ស្និទ្ធនឹងលោកប្រធានាធិបតីអាហ្វហ្កានីស្ថាន Hamid Karzai ដែរ ដូចដែលលោក Karzai បានប្រកាសទទួលស្គាល់កាលពីឆ្នំា ២០១០។ កាលណោះ លោក Karzai ក៏បានគូសបញ្ជាក់បន្ថែមថា អាមេរិកក៏បានធ្វើដូចគ្នានេះដែរ។ ប៉ុន្តែតំាងពីពេលនោះមក ទីក្រុងតេហេរ៉ង់បានបញ្ឈប់ការផ្តល់លុយនេះ រីឯ CIA វិញបានបន្តរហូតមកដល់ពេលបច្ចុប្បន្ន នេះបើយោងតាមកាសែត New York Times។ យោងតាមកាសែត New York Times ដដែល អាមេរិកថែមទំាងបានផ្តល់លុយដោយផ្ទាល់ទៅឲ្យមេកន្ទ្រាញសង្រ្គាមអាហ្វហ្កានីស្ថានក្នុងឆ្នំា ២០០១ ដើម្បីឲ្យពួកគេវាយប្រហារផ្តួលរំលំរបបតាលីបង់ដែលបានលាក់បំពួនសត្រូវទីមួយរបស់អាមេរិក គឺ Oussama ben Laden។
អ្វីជាការកត់សម្គាល់ ព័ត៌មាននេះបានលេចឡើង ចំពេលដែលថ្ងៃនៃការដកកម្លំាងទ័ពអាមរិកំាង និងសម្ព័ន្ធមិត្តចេញពីអាហ្វហ្កានីស្ថានកាន់តែខិតចូលជិតមកដល់ ពោលគឺនៅដំណាច់ឆ្នំា ២០១៤។ ឆ្នំា ២០១៤ ក៏ជាឆ្នំាដែលត្រូវរៀបចំការបោះឆ្នោតប្រធានាធិបតីអាហ្វហ្កានីស្ថានថ្មីដែរ និងដែលលោក Hamid Karzai មិនអាចឈរឈ្មោះជាថ្មីបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ