សង្គ្រាមជីហាត អ៊ីរ៉ាក់ -ស៊ីរី កំពុងអង្រួនការទូតពិភពអារ៉ាប់ ?
ចុះផ្សាយនៅថ្ងៃ៖
ស្តាប់ - ០៦:៥៣
មានស្លាប់យ៉ាងហោចណាស់៣៤នាក់ និងរបួសជាង១៥០នាក់ ក្នុងអំពើភេរវកម្ម មួយខ្សែនាថ្ងៃសៅរ៍ម្សិលមិញ តាមក្រុងមួយចំនួនរបស់អ៊ីរ៉ាក់ មានជាអាទិ៍នៅក្រុងបាកដាដ និងក្រុងអែរប៊ីល។ ភេរវកម្មបំផ្ទុះគ្រាប់បែក បានកើតឡើង ក្នុងខណៈដែលកងទ័ពគៀរឌីស្តង់និងកងទ័ពអ៊ីរ៉ាក់កំពុងប្រឹងប្រយុទ្ធតទល់ជាមួយនឹងពួកអ៊ីស្លាមស៊ុននីត ឬពួកជីហាត តាំងពីខែមិថុនាមកមិនបានសម្រេចសោះ។ សហគមន៍អន្តរជាតិកំពុងបន្តស្វះស្វែងរកគ្រប់មធ្យោបាយដើម្បីកម្ចាត់ពួកជីហាតនេះ។ សហរដ្ឋអាមេរិកចង់ពង្រីកការវាយប្រហារផ្លូវអាកាសលើស៊ីរី។ សម្មតិកម្មដែលជំរុញឱ្យពិភពអារ៉ាប់ (អេហ្ស៊ីប ហ្ស័កដានី កាតា អេមីរ៉ាអារ៉ាបរួម និងអារ៉ាប៊ីសាអ៊ូឌីត) កោះប្រជុំគ្នាជាបន្ទាន់នៅថ្ងៃអាទិត្យ។
ភេរវកម្មមួយខ្សែ ក្នុងក្រុងបាកដាដ ទីគ្រីត អែរប៊ីល និងគៀគូក កើតឡើងក្រោយការវាយប្រហារប្រឆាំងនឹងវិហារអ៊ីស្លាមនិកាយស៊ុននីត កាលពីថ្ងៃសុក្រស្លាប់មនុស្សអស់៦៨នាក់។ ការវាយប្រហារនោះគឺជាស្នាដៃរបស់ពួកយុទ្ធជនប្រដាប់អាវុធនិកាយឈីអ៊ីត និងបានរុញច្រានឱ្យប្រជាជនស៊ុននីតនិងឈីអ៊ីតប្រទ្រូសប្រទ្រះគ្នាមួយឆ្អែតហើយ។ ហើយកន្លងបានតែមួយថ្ងៃ ក៏ផ្តើមភេរវកម្ម នៅតាមចំណុចយុទ្ធសាស្ត្រទៀត ដែលបានផ្តាច់ជីវិតជនស៊ីវិលនិងទាហានឬយុទ្ធជន ជានិកាយឈីអ៊ីតអស់យ៉ាងហោច៣៤នាក់។
ភាពតានតឹងក្នុងសហគមន៍
រលកហិង្សាថ្មីនេះ អាចនឹងរំខានដល់ការខិតខំប្រឹងប្រែងរបស់លោកនាយករដ្ឋមន្ត្រី ហៃដា អាល់ អាប៉ាឌី ដែលជាអ្នកឈីអ៊ីត ក្នុងការទាក់ទាញនិងផ្តល់ទំនុកចិត្តឡើងវិញដល់ពលរដ្ឋអ៊ីរ៉ាក់និកាយស៊ុននីត។ ក្រុមអ្នកស៊ុននីតដែលធ្លាក់អស់ទឹកចិត្តរលីងពីប្រមុខដឹកនាំរដ្ឋាភិបាលមុន គឺលោក នូរីអាល់ម៉ាលិគិ។ ដោយសារតែមូលហេតុប្រកាន់ពូជសាសន៍និកាយសាសនានេះឯង ទើបឱ្យអ៊ីរ៉ាក់បាក់បែកក្នុងសហគមន៍ ផ្ទុះការវាយប្រហារនៅភាគខាងជើងអ៊ីរ៉ាក់ ពួកជីហាតរដ្ឋអ៊ីស្លាម (ដែលជានិកាយស៊ុននីត) ឱ្យកាន់តែមានសន្ទុះ មានកម្លាំងវាយប្រហារ។
កាលពីឆ្នាំ២០០៦-២០០៧ ការប្រឈមមុខដាក់គ្នារវាងក្រុមឈីអ៊ីត និងស៊ុននីត បានសម្លាប់ជីវិតមនុស្សអស់រាប់សិបពាន់នាក់។ សម័យនោះ ចលនាជ្រុលនិយមអ៊ីស្លាមជីហាតមិនទាន់រីកខ្លាំង ដូចពេលនេះ ដែលបើបានទៅដល់ទីណាតែងធ្វើឃាតប្រល័យទាំងពូជៗ។ ដូច្នេះ គេត្រូវតែធ្វើយ៉ាងណាកុំឱ្យជម្លោះសហគមន៍រីករាលបាន មកបន្ថែមបន្ទុកពីលើការប្រយុទ្ធប្រឆាំងនឹងពួកជីហាតរដ្ឋអ៊ីស្លាម ដែលសហគមន៍អន្តរជាតិកំពុងរិះរកមធ្យោបាយកម្ចាត់។ ហេតុដូច្នេះហើយបានជានាយករដ្ឋមន្ត្រីអ៊ីរ៉ាក់ថ្មី អំពាវនាវហើយអំពាវនាវទៀត ឱ្យសហគមន៍អ៊ីរ៉ាក់ចូលពួតដៃគ្នាថ្មី កុំឱ្យមានភាពប្រេះឆា ព្រោះអ៊ីរ៉ាក់ត្រូវការរួបរួមគ្នាដើម្បីដោះស្រាយវិបត្តិនយោបាយ និងប្រយុទ្ធទប់ទល់នឹងពួកជីហាតរដ្ឋអ៊ីស្លាម។
ដំណើរឆ្ពោះទៅរកការប្រមូលផ្តុំជាលក្ខណៈតំបន់
នៅថ្ងៃនេះ រដ្ឋមន្ត្រីការបរទេសអ៊ីរ៉ង់ ត្រូវចាប់ផ្តើមបំពេញទស្សនកិច្ចពីរថ្ងៃនៅអ៊ីរ៉ាក់ ! លោកត្រូវជួបពិភាក្សាជាមួយសមភាគីអ៊ីរ៉ាក់ផង និងជាមួយលោកនាយករដ្ឋមន្ត្រីអ៊ីរ៉ាក់ថ្មីផង។ ជាទស្សនកិច្ចដែលប្រកបដោយអត្ថន័យព្រោះប្រព្រឹត្តទៅនៅក្រោយពេលដែលអ៊ីរ៉ាក់រងការវាយប្រហារភេរវកម្ម។ អ៊ីរ៉ង់ ដូចជាអ៊ីរ៉ាក់ដែរ មានបណ្តាជនភាគច្រើនជាអ្នកឈីអ៊ិត អ៊ីរ៉ង់ធ្លាប់គាំទ្រនាយករដ្ឋមន្ត្រីអ៊ីរ៉ាក់ខ្លាំងណាស់ និងបានផ្តល់អនុសាសន៍ច្រើនដល់រដ្ឋាភិបាលស្វយ័តគៀរឌីស្តង់ ក្នុងការប្រយុទ្ធប្រឆាំងនឹងពួកជីហាតរដ្ឋអ៊ីស្លាម។ ហើយបើតាមអ្នកវិភាគមួយចំនួន អ៊ីរ៉ង់ ក្រៅពីបញ្ហានុយក្លេអ៊ែរជាមួយបស្ចឹមលោក មានតួនាទីសំខាន់ណាស់ ក្នុងការជួយអ៊ីរ៉ាក់ និងស្ថិរភាពតំបន់ ដែលសហគមន៍អន្តរជាតិមិនគួរមើលរំលងសមត្ថភាពអ៊ីរ៉ង់ទេ។
►សូមអាន ៖ តើពួកជីហាតអ៊ីរ៉ាក់មានដើមកំណើតមកពីណា ?
ពួកជីហាតរដ្ឋអ៊ីស្លាមអ៊ីរ៉ាក់ ជាក្រុមតែមួយនឹងជីហាតនៅស៊ីរី ! គេមិនអាចនិយាយអំពីពួករដ្ឋអ៊ីស្លាមអ៊ីរ៉ាក់ ដោយមិននិយាយអំពីស៊ីរីឡើយ។ នេះជាចំណុចមួយ ! ចំណុចសំខាន់មួយទៀត ការណ៍ដែលក្រុមប្រទេសអារ៉ាប មានជាអាទិ៍ ប្រទេសអេហ្ស៊ីប ហ្ស័កដានី កាតារ អេម៊ីរ៉ា និងអារ៉ាប៊ីសាអ៊ូឌីត ជួបប្រជុំគ្នានៅថ្ងៃអាទិត្យនេះ ពិភាក្សាអំពីស្ថានភាពប្រទេស ក៏ដើម្បីវាស់វែងគ្រោះថ្នាក់ដែលពួកជីហាតរដ្ឋអ៊ីស្លាមអាចបង្កដល់ពិភពអារ៉ាប។
ការទូតរបស់ពិភពអារ៉ាប ប្រឈមការវាយប្រហារជាយថាហេតុរបស់អាមេរិក
ហេតុអ្វីសុខៗនាំគ្នាប្រជុំ ? បន្ទាប់ពីអាក់ខានអស់ពេលជាងមួយឆ្នាំ ក្រុមប្រទេសជាអ្នកភ្ជាប់ទំនាក់ទំនងដោះស្រាយវិបត្តិស៊ីរី បាននាំគ្នាភ្ញាក់ខ្លួន នៅពេលបានឮសហរដ្ឋអាមេរិកប្រកាសអំពីលទ្ធភាពចង់ពង្រីកប្រតិបត្តិការយោធាផ្លូវអាកាសបន្តពីអ៊ីរ៉ាក់ ទៅលើស៊ីរី។ អាមេរិកតាំងដើមវិបត្តិស៊ីរីមក មិនដែលបង្ហាញឆន្ទៈចង់ប្រើកម្លាំងយោធានៅស៊ីរីទេ បើទោះបីជារបបលោកបាស្ហារអាល់អាសាដកំពុងកាន់តំណែងបច្ចុប្បន្នរំលោភបម្រាមហាមឃាត់យ៉ាងណាក៏ដោយ ប៉ុន្តែពេលនេះខុសពីពេលមុន អាមេរិកបានប្តូរចិត្តក៏ព្រោះតែការគំរាមកំហែងរបស់ពួកជីហាតមានខ្លាំងប៉ះពាល់ដល់ប្រយោជន៍អាមេរិក សម្លាប់ពលរដ្ឋអាមេរិក។
ហេតុដូច្នេះហើយបានក្រុមបណ្តាប្រទេសអារ៉ាបត្រូវជួបប្រជុំពិភាក្សាគ្នា វាយតម្លៃការវិវឌ្ឍន៍ផ្នែកយោធាផង និងអំពីការប្តូរផ្លាស់នយោបាយ ដែលជាផលវិបាកនៃប្រតិបត្តិការយោធាផ្លូវអាកាសអាមេរិកផង។ បើប្រភពអេហ្ស៊ីប ក្រុមប្រមុខការទូតអារ៉ាប ត្រូវពិនិត្យអំពីលទ្ធភាពកោះហៅភាគីជម្លោះនៅស៊ីរី ទាំងអស់ លើកលែងតែក្រុមរដ្ឋអ៊ីស្លាមមកចរចាឡើងវិញ។ សម្ពាធអាចមានខ្លាំងដាក់លើកាតា ឱ្យឈប់ផ្តល់ជំនួយហិរញ្ញវត្ថុ និងអាវុធដល់ពួកអ៊ីស្លាមជ្រុលនិយមនៅ ស៊ីរី។
អេហ្ស៊ីប ហ្ស័កដានី ឬ អារ៉ាប៊ីសាអ៊ូឌីត ត្រូវតែរួសរាន់ គិតគូរ ព្រោះប្រសិនបើអាមេរិកពិតជាចូលធ្វើអន្តរាគមន៍មែននោះ ភាគីជម្លោះនៅស៊ីរី លែងមានលំនឹងផ្នែកកម្លាំងយោធា ពួកជីហាតអាចនឹងរត់រកកន្លែងលាក់ខ្លួនថ្មី ដែលគ្មានអ្វីក្រៅពីរត់ចូលផ្ទះខ្លួន បង្កភាពវឹកវរឡើយ។ សូមបញ្ជាក់ថា មានបណ្តាជនអេហ្ស៊ីប ហ្ស័កដានី និងអារ៉ាប៊ីសាអ៊ូឌីត រាប់ពាន់ បានចូលទៅបំរើចលនាជីហាតរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ