លោកស្រី អ៊ុង សានស៊ូជីត្រៀមខ្លួនទទួលយកការព្យួរទ័ណ្ឌកម្មប្រឆំាងភូមា
នៅថ្ងៃពុធ ទី១៦ ឧសភានេះ លោកស្រី អ៊ុង សានស៊ូជី ប្រធានគណបក្សប្រឆំាងភូមាបានប្រាប់ឲ្យដឹងថា លោកស្រីត្រៀមខ្លួនរួចជាស្រេចដើម្បីទទួលយកការព្យួរទ័ណ្ឌកម្មប្រឆំាងនឹងប្រទេសរបស់លោកស្រីពីសំណាក់ប្រទេសលោកខាងលិច ពិសេសពីសហរដ្ឋមេរិក។ ប៉ុន្តែលោកស្រីបានព្រមានថា ដើម្បីអាចទទួលយកកាយវិការនេះបាន លុះត្រាណាតែរបបទីក្រុងណៃពីដ៏មិនបញ្ឈប់ដំណើរការលទ្ធិប្រជាធិបតេយ្យ និងនយោបាយបើកចំហរបស់ខ្លួនទេនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
« ខ្ញុំមិនជំទាស់ទៅនឹងការព្យួរទ័ណ្ឌកម្មប្រឆំាងនឹងប្រទេសរបស់ខ្ញុំទេ ប្រសិនបើប្រជាពលរដ្ឋអាមេរិកយល់ឃើញថា វាជាជម្រើសមួយដ៏ល្អនៅពេលនេះ។ ប៉ុន្តែ ខ្ញុំគ្រាន់តែសំណូមពរឲ្យមានការប្រយ័ត្នប្រយែងជាទីបំផុត » នេះជាការថ្លែងរបស់លោកស្រី អ៊ុង សានស៊ូជី តាមរយៈ Visioconférence មួយទៅកាន់ទីក្រុងវ៉ាស៊ីនតោនដែលរៀបចំឡើងដោយវិទ្យាស្ថានរបស់លោកអតីតប្រធានាធិបតីអាមេរិក George W.Bush។ លោកស្រីបានបន្ថែមថា « ពេលខ្លះ ខ្ញុំមានអារម្មណ៍ថា គ្រប់គ្នាហាក់ដូចជាមានសុទិដ្ឋិនិយមខ្លំាងពេកចំពោះព្រឹត្តិការណ៍ដែលកំពុងវិវត្តនៅក្នុងប្រទេសភូមា។ ខ្ញុំសូមរម្លឹកជាថ្មីថា ដំណើរការនៃការកសាងលទ្ធិប្រជាធិបតេយ្យមិនមែនចេះតែទៅមុខដោយរលូននោះទេ »។
សេចក្តីថ្លែងរបស់លោកស្រី អ៊ុង សានស៊ូជីពេលនេះបានធ្វើឡើង បន្ទាប់ពីមានការអំពាវនាវរបស់លោក John McCain សមាជិកព្រឹទ្ធសភាអាមេរិកឲ្យទីក្រុងវ៉ាស៊ីតោនព្យួរជាបណ្តោះអាសន្ននូវទ័ណ្ឌកម្មមួយចំនួនប្រឆំាងភូមា ដូចដែលប្រទេសលោកខាងលិចខ្លះបានធ្វើ និងសន្យានឹងធ្វើនាពេលកន្លងមក។ យោងតាមលោកស្រី អ៊ុង សានស៊ូជី ការព្យួរទ័ណ្ឌកម្ម គឺជាមធ្យោបាយដ៏ល្អសម្រាប់ចូលរួមជួយផ្តល់សន្ទុះដំណើរការស្ថាបនាលទ្ធិប្រជាធិបតេយ្យនៅភូមា ក៏ប៉ុន្តែ ប្រសិនបើដំណើរការស្ថាបនាលទ្ធិប្រជាធិបតេយ្យនេះមិនបានកើតមានពិតប្រាកដទេ គេត្រូវតែគិតគូរវិធានការផ្សេងដើម្បីធ្វើយ៉ាងណា បំពេញសេចក្តីស្រេកឃ្លានលទ្ធិប្រជាធិបតេយ្យរបស់ប្រជាជនភូមា។
ក្រៅពីការប្រកាសត្រៀមខ្លួនគំាទ្រការព្យួរទ័ណ្ឌកម្មប្រឆំាងនឹងប្រទេសរបស់លោកស្រី លោកស្រី អ៊ុង សានស៊ូជីក៏បញ្ជាក់ពីចំនួនអ្នកទោសនយោបាយ ២៧១នាក់ដែលកំពុងបន្តជាប់ក្នុងពន្ធនាគារ។ យោងតាមលោកស្រី គេមិនត្រូវឲ្យមានអ្នកទោសនយោបាយទៀតទេ ប្រសិនបើភូមាកំពុងស្ថិតនៅផ្លូវឆ្ពោះទៅកាន់របបប្រជាធិបតេយ្យនោះ។
សូមជម្រាបជូនថា នៅក្នុងសុន្ទរកថារបស់លោកអគ្គលេខាធិការអង្គការសហប្រជាជាតិនៅក្នុងសភាភូមាកាលពីដំណាច់ខែមេសាកន្លងទៅ លោក បាន គីមូនបានអំពាវនាវប្រទេសលោកខាងលិចឲ្យគិតគូរបន្ថែមទៀត ពីការលើកទ័ណ្ឌកម្មនយោបាយ និងសេដ្ឋកិច្ចប្រឆំាងភូមា។ កាលពីថ្ងៃទី ២៦ មេសា សហភាពអឺរ៉ុបបានសម្រេចព្យួរទ័ណ្ឌកម្មនយោបាយ និងសេដ្ឋកិច្ចលើភូមារយៈពេល ១ឆ្នំា វាលើកលែងតែទ័ណ្ឌកម្មលើគ្រឿងសព្វាវុធ។ ចំណែកប្រទេសផ្សេងទៀតមាន កាណាដា អូស្រ្តាលី ឬមួយន័រវែសបានប្រកាសលើកចេញទំាងស្រុង ឬក៏មួយភាគនូវទ័ណ្ឌកម្មរបស់ខ្លួនប្រឆំាងភូមា។
ដោយឡែក សហរដ្ឋអាមេរិកមកដល់ថ្ងៃនេះ ក្រៅពីបានប្រកាសសម្រេចចិត្តសម្រាលទ័ណ្ឌកម្មសេដ្ឋកិច្ច និងពីការតែងតំាងឯកអគ្គរដ្ឋទូតរបស់ខ្លួនប្រចំានៅភូមានាពេលឆាប់ៗខាងមុខ ទីក្រុងវ៉ាស៊ីនតោនបានបន្តរក្សាទុកទ័ណ្ឌកម្មសំខាន់ៗមួយចំនួន ដើម្បីធ្វើជាមធ្យោបាយដាក់គំនាបលើរបបទីក្រុងណៃពីដ៏៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ