លោកប្រធានាធិបតីភូមា ថេន សេនហៅអាណិកជនភូមាឲ្យធ្វើមាតុភូមិនិវត្តន៍
នៅថ្ងៃសៅរ៍ ទី១២ ឧសភានេះ លោកប្រធានាធិបតីភូមា ថេន សេនបានអំពាវនាវអាណិកជនភូមានៅឯបរទេសឲ្យវិលត្រឡប់ចូលប្រទេសវិញ ដោយបានសន្យានឹងជួយសម្រួលការងារគ្រប់បែបយ៉ាងចំពោះពួកគេ មានទំាងការស្នាក់នៅក្នុងសង្គម ក៏ដូចការប្រកបមុខរបបផ្សេងៗ។
ចុះផ្សាយនៅថ្ងៃ៖
ស្តាប់ - ០២:០៥
នៅពេលដែលភូមាស្ថិតក្រោមការគ្រប់គ្រងនៃរបបសឹកអស់រយៈពេលកន្លះសតវត្ស ក្រុមឧត្តមសេនីយមិនបានខ្វល់ខ្វាយពីការកសាងប្រទេសឲ្យចម្រើនទៅមុខឡើយ ពិសេស ពួកគេបានបំភ្លេចចោលសឹងតែទំាងស្រុងនូវប្រព័ន្ធអប់រំជាតិដែលជាថ្នាលបណ្តុះបណ្តាលបញ្ញវ័ន្ត។ ការធ្វើយ៉ាងនេះ មកពីក្រុមឧត្តមសេនីយបារម្ភខ្លាចក្រុមសិស្ស-និស្សិតងើបបះបោរប្រឆំាងខ្លួន។ ទន្ទឹមគ្នានេះ ក្រុមឧត្តមសេនីយ និងក្រុមបក្សពួករបស់គេគិតតែនំាគ្នាចែកចាយផលប្រយោជន៍ដែលជាសម្បត្តិធម្មជាតិរបស់ប្រទេស។
ប៉ុន្តែជាមួយនឹងរបបថ្មីដឹកនំាដោយក្រុមស៊ីវិលនាពេលបច្ចុប្បន្ន រដ្ឋាភិបាលទីក្រុងណៃពីដ៏បានបន្តធ្វើកំណែទម្រង់នយោបាយ និងសេដ្ឋកិច្ចគួរឲ្យភ្ញាក់ផ្អើល។ ការធ្វើកំណែទម្រង់នយោបាយ និងសេដ្ឋកិច្ចដែលលោកប្រធានាធិបតីថេន សេនចង់បានចំណេះដឹង និងសមត្ថភាពវិនិយោគរបស់ក្រុមអាណិកជនភូមាដែលកំពុងស្នាក់នៅឯបរទេស។ លោក ថេន សេនយល់ឃើញថា ទោះបីជាក្រុមអាណិកជនភូមានៅបរទេសទំាងនោះបានចាកចេញពីស្រុកកំណើតរបស់គេដោយមូលហេតុអ្វីក៏ដោយ ក៏ការរួមចំណែកកសាងប្រទេសរបស់ពួកគេ គឺជារឿងមួយចំាបាច់ មិនអាចខ្វះបាន។
បើតាមលោក ថេន សេន នៅក្នុងចំណោមក្រុមអាណិកជនភូមានៅបរទេសទំាងនោះ មានក្រុមអ្នកបច្ចេកទេស ក្រុមអ្នកឯកទេស និងក្រុមអ្នកជំនួញ។ លោក ថេន សេនបានសន្យាថា រដ្ឋាភិបាលនឹងធ្វើអ្វីៗដែលអាចធ្វើទៅបាន ដើម្បីជួយសម្រួលការធ្វើមាតុភូមិនិវត្តន៍របស់ពួកគេ មានទំាងការស្នាក់នៅក្នុងសង្គម ក៏ដូចការប្រកបមុខរបបផ្សេងៗ។ គួរជម្រាបជូនថា ពីដំបូង ក្រុមអាណិកជនភូមានៅបរទេសមានការប្រយ័ត្នប្រយែងយ៉ាងខ្លំាងចំពោះរដ្ឋាភិបាលថ្មី តែឥឡូវនេះ និងក្រោយពីឃើញមានកំណែទម្រង់ជាបន្តបន្ទាប់មក ពួកគេហាក់ដូចមានទំនុកទុកចិត្តបន្តិចម្តងៗលើរដ្ឋាភិបាលថ្មី។
ការអំពាវនាវហៅក្រុមអាណិកជនភូមាឲ្យចូលរួមជួយកសាងប្រទេសពីសំណាក់លោក ថេន សេនពេលនេះបានធ្វើឡើង ក្រោយពីអង្គការមូលនិធិរូបិយវត្ថុអន្តរជាតិបានជំរុញរដ្ឋាភិបាលទីក្រុងណៃពីដ៏ឲ្យបើកចំហទីផ្សារសេដ្ឋកិច្ចដើម្បីទាញយកសក្តានុពលរបស់ប្រទេស និងកាត់បន្ថយអាត្រានៃភាពក្រីក្ររបស់ប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ