លោកបានគីមូនសាទរគោលជំហរសម្របខ្លួនរបស់លោកស្រីអ៊ុងសាន់ស៊ូជី
លោកបានគីមូនអគ្គលេខាធិការអ.ស.ប.នៅថ្ងៃអង្គារនេះដែលជាថ្ងៃបញ្ចប់ដំណើរទស្សនកិច្ច ៣ថ្ងៃរបស់លោកនៅភូមា បានជួបសន្ទនាជាលើកទីមួយជាមួយប្រធានបក្សប្រឆាំងលោកស្រី អ៊ុងសានស៊ូជីដោយបានសំដែងគាវរកិច្ចចំពោះគោលជំហរឈ្លាសវៃរបស់លោកស្រីនៅក្នុងវិស័យនយោបាយ។ ជាពិសេសបន្ទាប់ពីសេចក្តីសម្រេចចិត្តរបស់ប្រធានបក្សប្រឆាំង នេះក្នុងការផ្លាស់ប្តូរចិត្តគំនិតដោយសុខចិត្តចូលធ្វើសច្ចាប្រណិធានវិញនៅក្នុងរដ្ឋសភាក្នុងនាមជាអ្នកតំណាងរាស្រ្តទោះបីជាមានការខ្វែងគំនិតគ្នាខ្លាំងជាមួយរដ្ឋាភិបាលក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
លោកអគ្គលេខាធិការ អ.ស.ប បានគីមូន.បន្ទាប់ពីបានជួបលោកប្រធានាធិបតីភូមាថេនសេននៅថ្ងៃចន្ទម្សិលមិញមក បានជួបសន្ទនាជាមួយលោកស្រីអ៊ុងសានស៊ូជីនៅលំនៅឋានរបស់គាត់ក្នុងទីក្រុងរ៉ង់ហ្គូននៅថ្ងៃអង្គារទី១ឧសភានេះ។
លោកស្រីស៊ូជីដែលបានក្លាយជាអ្នកតំណាងរាស្ត្រមួយរូបបន្ទាប់ពីការបោះឆ្នោតសភាមួយភាគនៅថ្ងៃទី១មេសាកន្លងទៅ។
គួររំលឹកថា លោកអគ្គលេខាធិការ បានគីមូន នៅឱកាសទស្សនកិច្ចរបស់លោកនៅភូមានៅឆ្នាំ២០០៩ ជំនាន់ដែលលោកស្រីស៊ូជី កំពុងស្ថិតនៅក្រោមការឃុំឃាំងក្នុងលំនៅឋាននៅឡើយ ពុំអាចជួបប្រាស្រ័យជាមួយលោកស្រីស៊ូជីបានទេ ដោយគ្មានការអនុញ្ញាតពីរបបសឹកភូមា។
បន្ទាប់ពី ជំនួបប្រាស្រ័យជាមួយលោកស្រីស៊ូជីរួចមក នៅឱកាសសន្និសីទសារព័ត៌មានដ៏ខ្លីមួយ លោកបានគីមូន បានថ្លែងកោតសរសើរនិងគោរពចំពោះគោលជំហរនយោបាយរបស់លោកស្រីស៊ូជី ដែលសុខចិត្តសម្របខ្លួន ដើម្បីមូលហេតុដ៏ខ្ពង់ខ្ពស់សំរាប់ប្រជាពលរដ្ឋភូមា។
ម្សិលមិញ ដោយហេតុ លោកស្រីស៊ូជី បានផ្លាស់ចិត្តគំនិតទាំងស្រុង ទោះបីជាលោកស្រីនៅមានមតិខ្វែងគ្នាជាមួយរដ្ឋអំណាចក៏ដោយក្តី ក៏លោកស្រីសម្រេចចិត្តចូលធ្វើសច្ចាប្រណិធាននៅក្នុងរដ្ឋសភានៅរសៀលថ្ងៃស្អែក២ឧសភា បន្ទាប់ពីបានធ្វើពហិការនៅសប្តាហ៍មុន។
ត្រង់នេះហើយដែលលោកបានគីមូន សម្តែងការគោរពនិងកោតសរសើរដោយអះអាងទៀតថា លោកស្រីស៊ូជីក្នុងនាមជាអ្នកតំណាងរាស្រ្តមួយរូប នឹងដើរតួនាទីមួយដ៏សកម្មនិងប្រកបដោយលក្ខណៈស្ថាបនាដើម្បីមូលហេតុកសាងជាតិរបស់ខ្លួន។
លោកបានគីមូន ត្រូវចាកចេញពីភូមានៅយប់ថ្ងៃអង្គារនេះ បន្ទាប់ពីបានក្លាយជាជនបរទេសទីមួយដែលបានឡើងថ្លែងសុន្ទរកថានៅពីមុខអង្គប្រជុំរដ្ឋសភាភូមានៅថ្ងៃចន្ទម្សិលមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ