លោកស្រី អ៊ុង សានស៊ូជី ក្លាយជាតំណាងរាស្ត្របន្ទាប់ពីតស៊ូអស់ជាងពីរទសវត្ស
ជ័យលាភីរង្វាន់ណូបែលសន្តិភាព លោកស្រី អ៊ុងសានស៊ូជី បានចូលធ្វើសច្ចាប្រណិធាន ស្បថចូលកាន់តំណែងជាតំណាងរាស្ត្រ នៅចំពោះមុខសភាហើយ នាព្រឹកថ្ងៃពុធទី ២ ឧសភា ឆ្នាំ២០១២នេះ។ ពិធីស្បថចូលកាន់តំណែងជាផ្លូវការមានរយៈពេលខ្លីមែន ប៉ុន្តែមានអត្ថន័យជាប្រវត្តិសាស្ត្រ ព្រោះនេះជាលើកទីមួយដែលប្រមុខបក្សប្រឆាំង អ៊ុង សានស៊ូជី បានចាប់អាជីពជាតំណាងរាស្ត្រអាណត្តិដំបូង បន្ទាប់ពីតស៊ូយ៉ាងស្វិតស្វាញ ជិតពីរទសវត្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
ប្រមុខបក្សប្រឆាំងលោកស្រី អ៊ុង សានស៊ូជី និងសមាជិកសភា៣៣រូបផ្សេងទៀត របស់គណបក្សសម្ព័ន្ធជាតិដើម្បីលិទ្ធិប្រជាធិបតេយ្យបានងើបឈរធ្វើសច្ចាប្រណិធាន ការពាររដ្ឋធម្មនុញ្ញ និងបានសន្យារក្សាភក្តីភាពចំពោះសាធារណរដ្ឋសហភាពភូមា និងប្រជាពលរដ្ឋភូមា ព្រមទាំងធ្វើយ៉ាងណាររក្សាជានិច្ចមិនឱ្យមានការបែកបាក់សាមគ្គីជាតិ និងរក្សាបូរណភាពជាតិឱ្យបានស្ថិតស្ថេរ” នៅចំពោះមុខប្រធានរដ្ឋសភា។
អាយុ៦៦ឆ្នាំ លោកស្រីអ៊ុងសានស៊ូជី ជ័យលាភីរង្វាន់ណូបែលសន្តិភាពដ៏ល្បីល្បាញ ដែលបានចាប់ផ្តើមជីវិតនយោបាយតាំងពីឆ្នាំ១៩៨៨ និងរស់នៅជាប់ឃុំឃាំងក្នុងគេហដ្ឋានច្រើនជាងមានសេរីភាព មិនបានសម្តែងអារម្មណ៍រំភើប ឬរំជើបរំជួលនឹងតួនាទីជាសមាជិកសភា នៅព្រឹកមិញនេះទេ ប៉ុន្តែលោកស្រីបានទទួលស្គាល់ថា ជាការគួរឱ្យចាប់អារម្មណ៍ !
បានទទួលជោគជ័យយ៉ាងត្រចះត្រចង់ ក្នុងសម័យបោះឆ្នោតសភាថ្ងៃទី ១មេសា លោកស្រី និងបក្ស បានបដិសេធមិនព្រមចូលធ្វើសច្ចាប្រណិធានជាមហោឡាឫកទេ កាលពីសប្តាហ៍មុន ដោយទាមទារត្រឹមប្រកាសសន្យាគោរពរដ្ឋធម្មនុញ្ញឆ្នាំ២០០៨។ លោកស្រីទើបបានសម្របសម្រួលខ្លួនយល់ព្រមវិញពីរថ្ងៃមុននេះ ដើម្បីសម្តែងការគោរពឆន្ទៈប្រជាពលរដ្ឋ និងដើម្បីកុំឱ្យដំណើរការធ្វើកំណែទម្រង់របស់រដ្ឋាភិបាលស៊ីវិលភូមាថ្មីត្រូវជាប់គាំង។ ចលនាប្រឆាំងធំបំផុតរបស់ភូមានេះ មានជំនឿជាក់ជានិច្ចលើភាពសម្របសម្រួល ក្នុងនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ