របបសឹកថៃបន្តចាប់ខ្លួនពួកប្រឆំាងរដ្ឋប្រហារ និងពង្រឹងសន្តិសុខក្នុងទីក្រុងបាងកក
ពេញមួយថ្ងៃអាទិត្យ ទី៨ មិថុនា និងបន្តរហូតមកដល់ថ្ងៃចន្ទ ទី៩ មិថុនានេះ ទីក្រុងបាងកកកំពុងបន្តស្ថិតក្រោមការយាមកាមពីសំណាក់ទាហាន និងប៉ូលិសជាច្រើនពាន់នាក់។ នៅក្នុងក្បួនបាតុកម្មប្រឆំាងនឹងរដ្ឋប្រហារនាថ្ងៃអាទិត្យម្សិលមិញ កម្លំាងប៉ូលិសបានចាប់ខ្លួនអ្នកចេញមុខប្រឆំាងនឹងរដ្ឋប្រហារចំនួន ៧នាក់បន្ថែមទៀត។ នៅថ្ងៃសុក្រកន្លងទៅ មេបាតុករប្រឆំាងរដ្ឋប្រហារម្នាក់ត្រូវបានចាប់ខ្លួនពីបទបានអំពាវនាវឲ្យមានការងើបបះបោរប្រឆំាងរបបសឹក និងការលើកម្រាមដៃ ៣ ដូចក្នុងភាពយន្ត « The Hunger Games » ដែលតំណាងឲ្យនិមិត្តរូបរបស់អ្នកតស៊ូប្រឆំាងនឹងរបបផ្តាច់ការ។
ចុះផ្សាយនៅថ្ងៃ៖
ស្តាប់ - ០២:១១
តំាងពីទីក្រុងបាងកកធ្លាក់ក្នុងកណ្តាប់ដៃយោធានៅថ្ងៃទី២២ ឧសភា និងបើទោះបីជារបបសឹកហាមមិនឲ្យធ្វើបាតុកម្ម ឬមួយក៏ការជួបជុំគ្នាលើសពី៥នាក់ក៏ដោយ ក៏គេនៅតែសង្កេតឃើញមានការរៀបចំក្បួនបាតុកម្មជាហូរហែក្រោមទ្រង់ទ្រាយធំ តូចមកទល់ថ្ងៃនេះ។ ជាក់ស្តែងនៅថ្ងៃអាទិត្យ ទី៨ មិថុនាម្សិលមិញ របបសឹកបានដាក់ពង្រាយកម្លំាងប៉ូលិស និងទាហានមានគ្នាសរុបជាង ៦ ៥០០នាក់នៅតាមទីតំាងសំខាន់ៗជាច្រើនក្នុងទីក្រុងបាងកកដើម្បីប្រឈមទប់នឹងក្បួនបាតុកម្មនានា។ តែនៅទីបំផុត ចំនួនអ្នកចូលរួមហាក់ដូចជាមិនសូវមានច្រើនដូចបានប្រកាសឡើយ។ ទោះជាយ៉ាងនេះក្តី ក៏ក្បួនបាតុកម្មក្រោមទ្រង់ទ្រាយតូចនេះត្រូវបានមធ្យោបាយឃោសនាមហាជនជាតិ និងអន្តរជាតិនំាគ្នាចាប់អារម្មណ៍យ៉ាងខ្លំាង។
មានបាតុករប្រឆំាងនឹងរដ្ឋប្រហារយោធាប្រមាណជា ២០នាក់បានប្រមូលផ្តុំគ្នាស្រែកប្រឆំាងនៅពីមជ្ឈមណ្ឌលពាណិជ្ជកម្មមួយក្រោមក្រសែភ្នែករបស់ទាហាន និងប៉ូលិសរាប់រយនាក់។ នៅទីបំផុត កងប៉ូលិសបានចាប់បាតុករ ៧នាក់បញ្ជូនទៅកាន់ទីស្នាក់ការកងទ័ព។ កងទ័ពដែលធ្លាប់បានប្រកាសព្រមានពួកបាតុករ និងក្រុមគ្រួសាររបស់ពួកគេ ពិសេសចាប់បញ្ជូនទៅកាត់ទោសនៅតុលាការយោធា។ តែរហូតមកទល់ពេលនេះ របបសឹកនៅមិនទាន់បានអនុវត្តន៍វិធានការនេះនៅឡើយទេ។
កាលពីថ្ងៃសុក្រ ទី៦ មិថុនាកន្លងទៅ ទាហានបានចាប់ខ្លួនមេបាតុករឈ្មោះ សម្បត្តិ ប៊ុនហ្គាម៉ាណងដោយបានចោទពីបទបានអំពាវនាវឲ្យមានការងើបបះបោរប្រឆំាងរដ្ឋប្រហារ និងការលើកម្រាមដៃ ៣ ដូចក្នុងភាពយន្ត « The Hunger Games »។ ការលើកម្រាមដៃ ៣ ដែលជានិមិត្តរូបតំណាងឲ្យអ្នកតស៊ូប្រឆំាងនឹងរបបផ្តាច់ការ។ មេរដ្ឋប្រហារចាន់អូចាបានអំពាវនាវតាមកញ្ចក់ទូរស្សន៍កុំឲ្យលើកម្រាមដៃ ៣ ជាបន្តទៀត ព្រោះវាជាការធ្វើតម្រាប់តាមជនបរទេស។ គួររម្លឹកជូនថា តំាងពីក្រោយរដ្ឋប្រហារយោធាដែលបានទទួលរងការរិះគន់ ទិតៀនយ៉ាងខ្លំាងពីសហគមន៍អន្តរជាតិមក របបសឹកក្រុងបាងកកបាន និងកំពុងបន្តជម្រះបញ្ជីជាមួយក្រុមប្រឆំាងខ្លួន ដោយបានកោះហៅមនុស្សជាង ៣០០នាក់ មានទំាងអ្នកនយោបាយ គ្រូបង្រៀន ឬមួយអ្នកកាសែតឲ្យចូលជួប។
ក្នុងចំណោមអ្នកកោះហៅទំាងនោះ មានមួយភាគបានដោះលែងឲ្យមានសេរីភាពវិញ បន្ទាប់ពីពួកគេបានចុះកិច្ចសន្យាឈប់ប្រឆំាងរដ្ឋប្រហារ និងបញ្ឈប់នូវគ្រប់សកម្មភាពនយោបាយ។ រីឯអ្នកខ្លះទៀតត្រូវបានគេឃុំនៅកន្លែងសម្ងាត់មកដល់សព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ