មេក្រុមអាវក្រហមថៃត្រូវកងទ័ពដោះលែង ចំណែក Facebook ត្រូវជាប់គាំងមួយរយៈ
មេដឹកនាំរដ្ឋាភិបាលយោធាថៃបានប្រកាស នៅថ្ងៃពុធថា មេដឹកនាំក្រុមអាវក្រហម ដែលត្រូវបានចាប់ឃុំខ្លួន តាំងពីថ្ងៃរដ្ឋប្រហារមកនោះ ត្រូវបានដោះលែងឲ្យមានសេរីភាពវិញហើយ។ នៅថ្ងៃពុធនេះដែរ ភាពឆោឡោមួយបានកើតមានឡើង ក្រោយពីបណ្តាញសង្គម Facebook នៅក្នុងប្រទេសថៃត្រូវជាប់គាំងមួយរយៈ ដោយគេសង្ស័យថា មេទ័ពថៃជាអ្នកបិទ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
អ្នកនាំពាក្យកងទ័ពថៃបានឲ្យដឹងថា គិតចាប់តាំងពីថ្ងៃដែលកងទ័ពធ្វើរដ្ឋប្រហារ កាលពីថ្ងៃព្រហស្បតិ៍ ២២ឧសភាមក មានមនុស្សចំនួន ២៥៣រូប ដែលត្រូវបានកងទ័ពកោះហៅ។ ក្នុងនោះ មាន ៥៣នាក់មិនបង្ហាញខ្លួន។ ក្នុងចំណោមអ្នកដែលចូលខ្លួនតាមការកោះ មាន ៧៦នាក់ កំពុងជាប់ឃុំនៅឡើយ ចំណែកក្រៅពីនោះត្រូវបានដោះលែងឲ្យមានសេរីភាពវិញទាំងអស់ ក្នុងនោះ ក៏រួមមានលោកស្រីយីងឡាក់ អតីតនាយករដ្ឋមន្រ្តី និងលោកអាភិស៊ីត ប្រមុខដឹកនាំបក្សប្រឆាំងផងដែរ។
លោកចតុផន ព្រំផាន ព្រមទាំងមេដឹកនាំក្រុមអាវក្រហមផ្សេងទៀត ត្រូវបានរដ្ឋាភិបាលយោធាថៃដោះលែងឲ្យមានសេរីភាព នៅថ្ងៃពុធនេះ។ ក៏ប៉ុន្តែ មន្រ្តីអ្នកនាំពាក្យកងទ័ពថៃបានបញ្ជាក់ថា អ្នកដែលត្រូវបានដោះលែងអស់ទាំងនេះមិនអាចធ្វើដំណើរចេញទៅក្រៅប្រទេសបាននោះទេ ហើយត្រូវហាមឃាត់មិនឲ្យបញ្ចេញមតិយោបល់អ្វីទាំងអស់ ដែលទាក់ទងនឹងរឿងនយោបាយ។
ការចាប់ឃុំខ្លួនអ្នកនយោបាយ ការដាក់បម្រាមគោចរ និងការហាមឃាត់ការជួបប្រជុំគ្នា គឺជាវិធានការ ដែលមេទ័ពថៃបានដាក់ ក្នុងគោលដៅ ចៀសវាងកុំឲ្យមានចលនាប្រឆាំងនឹងរដ្ឋប្រហារ។ ក៏ប៉ុន្តែ គេសង្កេតឃើញថា បើទោះបីជាមានវិធានការតឹងរ៉ឹងបែបនេះក៏ដោយ ចលនាបាតុកម្មប្រឆាំងនឹងរដ្ឋាភិបាលយោធាថៃនៅតែបានកើតឡើងជាបន្តបន្ទាប់ ហើយជាទូទៅ ការប្រកូកប្រកាសឲ្យចេញធ្វើបាតុកម្មទាំងនេះត្រូវបានធ្វើឡើង តាមរយៈបណ្តាញសង្គម ដូចជា Facebook និង Twitter ជាដើម។
នៅរសៀលថ្ងៃពុធ ភាពឆោឡោមួយបានផ្ទុះឡើង ក្រោយពី Facebook នៅថៃត្រូវគាំងលែងដំណើរការរយៈពេល ៣០នាទី ហើយពាក្យចចាមអារ៉ាមបានផ្ទុះឡើងថា រដ្ឋាភិបាលយោធាជាអ្នកចេញបញ្ជាឲ្យបិទ Facebook ដើម្បីបំបិទសំឡេងប្រឆាំង។ ក្រោយពីមានភាពឆោឡោនេះ កងទ័ពថៃក៏បានចេញមុខប្រកាសតាមទូរទស្សន៍ជាតិថា ខ្លួនមិនបានបិទ Facebook ដូចពាក្យចចាមអារ៉ាមនេះទេ។
ក៏ប៉ុន្តែ អ្នកប្រើអ៊ីនធ័រនែតខ្លះនៅតែមានមន្ទិលសង្ស័យថា ការជាប់គាំង Facebook នៅថ្ងៃពុធ ទំនងជាការសាកល្បងមួយរបស់កងទ័ពថៃ ដើម្បីត្រៀមបិទបណ្តាញសង្គម នៅពេលណាមានចលនាប្រឆាំងផ្ទុះឡើងខ្លាំង ឬក៏អាចជាការព្រមានមួយ ដល់អ្នកប្រើប្រាស់បណ្តាញសង្គមកុំឲ្យប្រឆាំងនឹងរដ្ឋប្រហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ