អ៊ីស្រាអែលមិនទទួលស្គាល់ រដ្ឋាភិបាលឯកភាពជាតិថ្មីរបស់ប៉ាឡេស្ទីន
ភាពប្រេះឆាជាតិ ទំនងកំពុងផ្សះផ្សាជាប់វិញហើយ ! រដ្ឋាភិបាលឯកភាពជាតិប៉ាឡេស្ទីន បានបង្កើតឡើងនិងស្បថចូលកាន់តំណែងនៅថ្ងៃចន្ទទី ២ មិថុនា។ ប្រធានរដ្ឋអំណាចប៉ាឡេស្ទីន លោក មះមូត អាបាស បានប្រកាស “បិទបញ្ចប់ការទាស់ទែងផ្ទៃក្នុង”។ ប៉ុន្តែអ៊ីស្រាអែលស្រែកបដិសេធ ឈប់ចូលចរចាសន្តិភាពជាមួយ និងគំរាមដាក់ទណ្ឌកម្មបន្ថែមលើប៉ាឡេស្ទីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
រដ្ឋាភិបាលឯកភាពប៉ាឡេស្ទីន មានសមាភាពរដ្ឋមន្ត្រី ១៧រូប គាំទ្រដោយអាជ្ញាធរប៉ាឡេស្ទីន និងដោយចលនាអាម៉ាស។ ចលនាហាម៉ាស ដែលបានប្រកាសភ្លាមពីទីស្នាក់ការនៅហ្កាហ្សា ថានឹងប្រគល់អំណាច ដល់ក្រុមការងារជារដ្ឋាភិបាលថ្មីបង្រួបបង្រួមជាតិ។
ហាម៉ាសបានធ្លាក់ក្រោយ ទើបព្រមទទួលយកគំនិតផ្តួចផ្តើមផ្សះផ្សាជាតិថ្មីនេះ។ ពីមុនមកអង្គការអ៊ីស្លាមជ្រុលនិយមហាម៉ាសនេះ តែងរំពឹងលើក្រុមអ៊ីស្លាមភាតរបុត្រក្នុងតំបន់ ប៉ុន្តែក្តីសង្ឃឹមត្រូវរលត់បន្ទាប់ពីអតីតប្រធានាធិបតីអេហ្ស៊ីប មហាម៉េត ម័រស៊ី ធា្លក់ពីតំណែង។ កាន់តែ ឯកាទៀត ដោយត្រូវកាត់ផ្តាច់ទំនាក់ទំនងជាមួយរបបស៊ីរីរបស់លោក បាស្ហារ អាល់អាសាទ ដូច្នេះកាន់តែឃ្លាតឆ្ងាយពីមេបាអ៊ីរ៉ង់។
ចំណែកខាងអាជ្ញាធរប៉ាឡេស្ទីនរបស់លោក មះមូដ អាបាសវិញ ក៏ប្តូរផ្លាស់ជំហរងាកមកផ្សះផ្សា ព្រោះបរិបទតម្រូវ។ ផែនការចរចា៩ខែ អ៊ីស្រាអែល ប៉ាឡេស្ទីន ស្នើឡើងរដ្ឋបាលអាមេរិក មិនបានសម្រេចលទ្ធផល។ ការចរចាដែលចលនាហាម៉ា ចាត់ទុកជាឧបសគ្គនៃការផ្សះផ្សាជាតិប៉ាឡេស៊ីន។
ជាសរុប និងជាលើកទីមួយ ក្នុងរយៈពេល៧ឆ្នាំ បណ្តាជនប៉ាឡេស្ទីន បានស្គាល់និងបានឃើញរូបរាងរដ្ឋាភិបាលរួមតែមួយ គ្រប់គ្រងទាំងតំបន់ហ្កាហ្សា និងស៊ីហ្ស័កដានី ដែលនឹងមានពេញគ្រប់លក្ខណៈ ក្រោយការបោះឆ្នោតប្រធានាធិបតីនិងសភា។
សហរដ្ឋអាមេរិក បានគូសបញ្ជាក់រួចហើយថានឹងធ្វើការពិភាក្សាជាមួយរដ្ឋាភិបាលឯកភាពនេះ ប៉ុន្តែគ្មានផ្លូវឡើយសម្រាប់អ៊ីស្រាអែល ! នាយករដ្ឋមន្ត្រីអ៊ីស្រាអែលបានចោទប្រកាន់លោកមះមូដ អាបាស ថាបានជ្រើសរើសភេរវនិយម ជាជាងសន្តិភាព” ជាពាក្យចោទប្រកាន់ដែលគេធ្លាប់ឮញយដងហើយ ! មិនតែប៉ុណ្ណោះ រដ្ឋមន្ត្រី អ៊ីស្រាអែលជាច្រើន បានរិះគន់ យ៉ាងចាស់ដៃ ចំពោះភាពឆោតល្ងង់របស់អាមេរិកដែលព្រមធ្វើការជាមួយរដ្ឋាភិបាលថ្មីប៉ាឡេស្ទីន។
សម្រាប់អ៊ីស្រាអែល គ្មានទេការចរចាជាមួយរដ្ឋាភិបាលប៉ាឡេស្ទីន ដែលគាំទ្រដោយចលនាហាម៉ាស ព្រោះចលនានេះអង្គការភេរវនិយមដែលមានកម្មវត្ថុចង់បំផ្លាញរដ្ឋអ៊ីស្រាអែល។ ដូច្នេះហើយបាននៅរសៀលថ្ងៃចន្ទម្សិលមិញ ក្រុមប្រឹក្សាបានជួបប្រជុំគ្នារៀបចំ គម្រោងដាក់ទណ្ឌកម្មថ្មីលើអាជ្ញាធរប៉ាឡេស្ទីន ប៉ុន្តែមិនបានបញ្ជាក់អំពីប្រភេទទណ្ឌកម្មនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ