ប៉ាឡេស្ទីន៖រដ្ឋាភិបាលឯកភាពជាតិត្រូវបានបង្កើតឡើង តែឧបសគ្គនៅមានច្រើនរវាងចលនាហាម៉ាស់ និងហ្វាតា
ចុះផ្សាយនៅថ្ងៃ៖
ស្តាប់ - ០៥:២៨
នៅដែនដីប៉ាឡេស្ទីន រដ្ឋាភិបាលឯកភាពជាតិមួយដឹកនំាដោយលោកនាយករដ្ឋមន្រ្តីរ៉ាមី ហំាដាឡា (Rami Hamdallah) បានធ្វើសច្ចាប្រណិធានចូលកាន់តំណែងជាផ្លូវការនៅថ្ងៃចន្ទ ទី២ មិថុនា ឆ្នំា ២០១៤។ រដ្ឋាភិបាលឯកភាពជាតិប៉ាឡេស្ទីនមួយនេះ គឺជាផ្លែផ្កាបានមកពីកិច្ចព្រមព្រៀងចុះហត្ថលេខារវាងចលនាហាម៉ាស់ និងចលនាហ្វាតា។ រហូតមកដល់បច្ចុប្បន្ន ចលនាប៉ាឡេស្ទីនទំាងពីរនេះបានគ្រប់គ្រងដែនដីប៉ាឡេស្ទីនពីរកន្លែងខុសគ្នា។ ចលនាហាម៉ាស់ Hamas) គ្រប់គ្រងនៅតំបន់ហ្កាហ្សា ចំណែកចលនាហ្វាតា (Fatah) គ្រប់គ្រងតំបន់ស៊ីយ៉កដានី។ លោកប្រធានរដ្ឋអំណាចប៉ាឡេស្ទីនម៉ាមូដ អាបាស់ (Mahmoud Abbas) បានស្នើលោកហំាដាឡាឲ្យប្រញិបប្រញាប់រៀបចំសមាសភាពរដ្ឋាភិបាលថ្មីមួយ។ តែយ៉ាងណាក៏ដោយ នៅមានឧបសគ្គជាច្រើនដែលគូបដិបក្ខទំាងពីរត្រូវបន្តដោះស្រាយ។
រហូតមកដល់សព្វថ្ងៃ និងបើទោះបីជាមានការខិតខំប្រឹងប្រែងរបស់លោកប្រធានរដ្ឋអំណាចប៉ាឡេស្ទីនម៉ាមូដ អាបាស់ក៏ដោយ ក៏ប៉ាឡេស្ទីននៅមិនទាន់ទទួលបានលក្ខន្តិកជារដ្ឋមួយពេញលក្ខណៈដូចរដ្ឋស្របច្បាប់ដទៃទៀតក្នុងលោកនៅឡើយទេ។ នេះក៏ដោយសារថា មកពីប៉ាឡេស្ទីន និងអ៊ីស្រាអែលនៅមិនទាន់អាចនិយាយចុះសម្រុងគ្នាក្នុងការស្វែងរកកិច្ចព្រមព្រៀងសន្តិភាពដែលអាចទទួលយកបានទំាងអស់គ្នា។ តែទន្ទឹមគ្នានេះ ការវិវាទផ្ទៃក្នុងក៏បានបន្តកើតមានជាហូរហែរវាងចលនាប៉ាឡេស្ទីនពីរ គឺចលនាហាម៉ាស់ដែលកំពុងគ្រប់គ្រងតំបន់ហ្កាហ្សា និងចលនាហ្វាតាដែលកំពុងគ្រប់គ្រងតំបន់ស៊ីយ៉កដានី។ គឺទើបតែនៅយប់ថ្ងៃទី២២ ឆ្លងចូលថ្ងៃទី២៣ មេសាកន្លងទៅថ្មីៗនេះទេ ដែលគូវិវាទទំាងពីរបានចុះហត្ថលេខាលើកិច្ចព្រមព្រៀងផ្សះផ្សារវាងគ្នា។ ពិធីចុះហត្ថលេខាកាលណោះត្រូវបានធ្វើឡើងនៅក្នុងដែនដីហ្កាហ្សារបស់ចលនាហាម៉ាស់ក្រោមអធិបតីភាពរបស់លោកប្រធានរដ្ឋអំណាចប៉ាឡេស្ទីនម៉ាមូដ អាប៉ាសដែលតំណាងឲ្យចលនាហ្វាត
គឺតាមរយៈកិច្ចព្រមព្រៀងផ្សះផ្សាគ្នានោះឯងដែលនំាឲ្យមានការប្រសូត្រចេញនូវរដ្ឋាភិបាលឯកភាពជាតិមួយនាពេលនេះ។ រដ្ឋាភិបាលឯកភាពជាតិដែលជាអ្នកគ្រប់គ្រងដែនដីប៉ាឡេស្ទីនទំាងមូលដោយគ្មានការធ្វើអប្បគមពីចលនាណាមួយទៀតឡើយ មានន័យថា ជារដ្ឋាភិបាលមួយដែលចូលរួមដោយគ្រប់ភាគីជម្លោះ។ តែអ្វីដែលគួរឲ្យកត់សម្គាល់នោះនៅត្រង់ថា រដ្ឋាភិបាលឯកភាពជាតិនេះគ្រាន់តែជារដ្ឋាភិបាលបណ្តោះអាសន្នប៉ុណ្ណោះ មានន័យថា ជារដ្ឋាភិបាលមួយដែលមានតួនាទីជាអ្នករៀបចំត្រួសត្រាយផ្លូវមួយដើម្បីរៀបចំការបោះឆ្នោតសកលមួយនាពេលខាងមុខ។ តំណែងរដ្ឋាភិបាលបណ្តោះអាសន្ននេះត្រូវបានប្រគល់ឲ្យលោក រ៉ាមី ហំាដាឡា។ មានអាយុ ៥៤ឆ្នំា លោករ៉ាមី ហំាដាឡាជាឥស្សរជននយោបាយឯករាជ្យម្នាក់ដែលមិនមែនចេញមកពីចលនាហាម៉ាស់ ឬមួយក៏ចលនាហ្វាតាទេ។
សហគមន៍អន្តរជាតិមិនសូវស្គាល់ ឬមិនដែលស្គាល់បុគ្គលិកលក្ខណៈរបស់លោករ៉ាមី ហំាដាឡាទាល់តែសោះ តែបើនិយាយនៅក្នុងចំណោមប្រជាជនប៉ាឡេស្ទីនវិញ មានភាគច្រើនបានស្គាល់លោករ៉ាមី ហំាដាឡាច្បាស់ណាស់។ ស្គាល់ច្បាស់ ព្រោះលោកជាគ្រូបង្រៀនភាសាដ៏ល្បីម្នាក់ និងក៏ជានាយកសាកលវិទ្យាល័យតំាងពីឆ្នំា ១៩៩៨ មកដែរ។ តាមពិតទៅ លោករ៉ាមី ហំាដាឡាត្រូវបានលោកម៉ាមូដ អាបាស់ជ្រើសតំាងជានាយករដ្ឋមន្រ្តីប៉ាឡេស្ទីនតំាងពីខែមិថុនា ឆ្នំា ២០១៣ មកម្ល៉េះ ពោលតំាងពីក្រោយការលាចុះពីមុខតំណែងរបស់លោកសាឡំា ហ្វាយយ៉ាដ (Salam Fayyad) ក្នុងថ្ងៃទី១៣ មេសា ឆ្នំា ២០១៣។ កាលណោះ ចលនាហាម៉ាស់មិនបានទទួលស្វាគមន៍លោករ៉ាមី ហំាដាឡាទេ ព្រមទំាងបានបរិហារជម្រើសរូបលោកហំាដាថា ជាជម្រើសមួយថ្មី ដោយផ្អែកលើបទពិសោធន៍ចាស់។
គឺទើបតែមានកិច្ចព្រមព្រៀងផ្សះផ្សារវាងចលនាហាម៉ាស់ និងចលនាហ្វាតាកាលពីខែមេសាកន្លងទៅទេ ដែលលោករ៉ាមី ហំាដាឡាបានក្លាយជានាយករដ្ឋមន្រ្តីម្តងទៀតដែលលើកនេះ មិនមែនជានាយករដ្ឋមន្រ្តីសម្រាប់ដែនដីគ្រប់គ្រងដោយចលនាហ្វាតារបស់លោកប្រធានរដ្ឋអំណាចប៉ាឡេស្ទីនម៉ាមូដ អាបាស់ទៀតទេ តែជាប្រមុខរដ្ឋាភិបាលរបស់ប្រជាជនប៉ាឡេស្ទីនទំាងមូលដោយគ្មានការបែងចែកបក្សពួក និងដែនដី។ តែអ្វីជាការកត់សម្គាល់នោះនៅត្រង់ថា រដ្ឋាភិបាលឯកភាពជាតិរបស់លោកហំាដាឡាគ្រាន់តែជារដ្ឋាភិបាលបណ្តោះអាសន្នប៉ុណ្ណោះ ព្រោះថាបើយោងតាមកិច្ចព្រមព្រៀងផ្សះផ្សា ការរៀបចំបោះឆ្នោតនឹងត្រូវធ្វើឡើងនៅប៉ុន្មានខែទៀតខាងមុខនេះ។
ទោះជាយ៉ាងនេះក្តី ចាប់ពីពេលនេះ ទៅដល់ថ្ងៃរៀបចំបោះឆ្នោត មានកិច្ចការ និងឧបសគ្គជាច្រើនដែលលោកហំាដាឡាត្រូវអនុវត្តន៍ និងដោះស្រាយឲ្យបាន។ គួររម្លឹកជូនថា ស្ថាប័នប៉ាឡេស្ទីនបានចាប់ផ្តើមរង្គោះរង្គើតំាងពីឆ្នំា ២០០៧ មកម្ល៉េះ ពោលតំាងពីចលនាអ៊ីស្លាមនិយមជ្រុលហាម៉ាស់បានបណ្តេញចលនាហ្វាតាចេញពីដែនដីហ្កាហ្សា។ គឺពេលនោះហើយដែលដែនដីប៉ាឡេស្ទីនបានពុះចែកជាពីរចំណែក នៅម្ខាង គឺតំបន់ហ្កាហ្សាគ្រប់គ្រងដោយពួកហាម៉ាស់ និងនៅម្ខាងទៀត គឺតំបន់ស៊ីយ៉កដានីគ្រប់គ្រងដោយពួកហ្វាតា។ ចលនាទំាងពីរនេះបានចំណាយពេលអស់ជាច្រើនឆ្នំាទំរំាតែប្រសូត្របាននូវរដ្ឋាភិបាលឯកភាពជាតិមួយនាពេលនេះ។
យ៉ាងណាក៏ដោយ នេះគ្រាន់តែជាជំហានដំបូងប៉ុណ្ណោះ ព្រោះនៅមានផ្លូវវែងឆ្ងាយដ៏លំបាក និងស្មុគស្មាញជាច្រើនទៀតដែលរដ្ឋាភិបាលបណ្តោះអាសន្នរបស់លោករ៉ាមី ហំាដាឡាត្រូវដើរ ដូចដែលមានចែងនៅក្នុងកិច្ចព្រមព្រៀងផ្សះផ្សា រួមមាន រៀបចំបោះឆ្នោតនៅ ៦ខែខាងមុខ រៀបចំរចនាសម្ព័ន្ធរបស់អង្គការរំដោះប៉ាឡេស្ទីន OLP ឡើងវិញដោយធ្វើយ៉ាងណា ច្របាច់ចលនាហាម៉ាស់ និងហ្វាតាឲ្យស្ថិតក្រោមដំបូលរបស់អង្គការ OLP តែមួយ ការរំដោះអ្នកទោសនយោបាយទំាងពីរចលនា (ហាម៉ាស់ និងហ្វាតា) ឲ្យមានសេរីភាពឡើងវិញ ឬមួយក៏ការកំណត់គោលនយោបាយក្នុងដំណើការស្វែងរកសន្តិភាពជាមួយប្រទេសអ៊ីស្រាអែល។
គឺការកំណត់គោលនយោបាយក្នុងដំណើរស្វែងរកសន្តិភាពជាមួយប្រទេសអ៊ីស្រាអែលនេះហើយដែលគ្រប់គ្នាបានមើលឃើញថា ជាឆ្អឹងទទឹង ក រវាងចលនាហ្វាតា និងចលនាហាម៉ាស់ ព្រោះថា ចលនាទំាងពីរនេះបានជ្រើសរើសវិធានការបញ្ច្រាសទិសគ្នាការជជែកជាមួយអ៊ីស្រាអែល។ ចលនាហ្វាតារបស់លោកអាបាស់បានជ្រើសយកផ្លូវចរចាសន្តិភាពដោយសន្តិវិធី តែចលនាហាម៉ាស់បានបន្តមិនទទួលស្គាល់វត្តមានប្រទេសអ៊ីស្រាអែល និងបន្តការតស៊ូប្រដាប់អាវុធដើម្បីរដ្ឋប៉ាឡេស្ទីនឯករាជ្យមួយ។ តែគេនៅមិនទាន់ទេថា តើរដ្ឋាភិបាលបណ្តោះអាសន្នរបស់លោករ៉ាមី ហំាដាឡាត្រូវនិយាយបញ្ចុះបញ្ចូលពួកហាម៉ាស់យ៉ាងម៉េចទេ។ អ្វីដែលដឹងនោះគឺថា ប្រជាជនប៉ាឡេស្ទីនត្រូវការរដ្ឋឯករាជ្យសន្តិភាពមួយ រស់ក្បែរអ៊ីស្រាអែល ដោយមិនខ្វល់ថា តើរដ្ឋប៉ាឡេស្ទីននោះនឹងត្រូវប្រសូត្រឡើង ក្រោមរូបភាពអ្វីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ