Netanyahuមិនទទួលស្គាល់ជំនួបរវាងរដ្ឋមន្ត្រីយុត្តិធម៌អ៊ីស្រាអែលនិងប្រធានរដ្ឋអំណាចប៉ាឡេស្ទីន
ប្រភពព័ត៌មានជិតដិតមួយនឹងនាយករដ្ឋមន្ត្រីអ៊ីស្រាអែល បេនយ៉ាមីន នេតាយ៉ាហ៊ូ បានប្រាប់អោយដឹងនៅថ្ងៃអាទិត្យនេះថា នាយករដ្ឋមន្ត្រីអ៊ីស្រាអែលបានបដិសេធមិនទទួលស្គាល់ការដែលលោកស្រី លីវនី ហ្ស៊ីបពី ជារដ្ឋមន្ត្រីយុត្តិធម៌អ៊ីស្រាអែល បានជួបជាមួយប្រធានរដ្ឋអំណាចប៉ាឡេស្ទីនលោក ម៉ាមូត អាបាស កាលពីថ្ងៃព្រហស្បតិ៍កន្លងទៅ នៅទីក្រុងឡុងដ៍នោះទេ។ យោងតាមប្រភពព័ត៌មាននេះ ជំនួបនេះគឺជាជំនួបកិច្ចការផ្ទាល់ខ្លួនរបស់លោកស្រីលីវនីប៉ុណ្ណោះ ពោលគឺលោកស្រី លីវនី មិនបានតំណាងអោយរដ្ឋាភិបាលអ៊ីស្រាអែល ក្នុងជំនួបជាមួយប្រធានរដ្ឋអំណាចប៉ាឡេស្ទីនទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
កាលពីថ្ងៃព្រហស្បតិ៍កន្លងទៅ លោកស្រីលីវនី ហ្ស៊ីបពី ជារដ្ឋមន្ត្រីក្រសួងយុត្តិធម៌អ៊ីស្រាអែល បានជួបលោកម៉ាមូត អាបាស ប្រធានរដ្ឋអំណាចប៉ាឡេស្ទីន នៅទីក្រុងឡុងដ៍។ លោកស្រីលីវនី និងលោកអាបាស បានធ្វើដំណើរទៅប្រទេសអង់គ្លេស ដើម្បីជួបប្រមុខការទូតអាមេរិកចន ឃែររី ដាច់ដោយឡែកពីគ្នា។ តែអ្នកទាំង២បានជួបគ្នា នៅទីក្រុងឡុងដ៍ ធ្វើអោយនាយករដ្ឋមន្ត្រីអ៊ីស្រាអែល និងអ្នកនយោបាយអ៊ីស្រាអែលច្រើនរូប រិះគន់ជំនួបនេះ។
យោងតាមប្រភពជិតដិតនឹងនាយករដ្ឋមន្ត្រីអ៊ីស្រាអែល លោកបេនយ៉ាមីន នេតាយ៉ាហ៊ូបានបដិសេធមិនទទួលស្គាល់ជំនួបនេះ ថាជាជំនួបតំណាងអ៊ីស្រាអែលជាមួយប៉ាឡេស្ទីននោះទេ។ ផ្ទុយទៅវិញ វាជាជំនួបកិច្ចការផ្ទាល់ខ្លួនរវាងរដ្ឋមន្ត្រីយុត្តិធម៌អ៊ីស្រាអែលនិងប្រធានរដ្ឋអំណាចប៉ាឡេស្ទីនប៉ុណ្ណោះ។ នាយករដ្ឋមន្ត្រីនេតាយ៉ាហ៊ូ បានរំលឹកលោកស្រីលីវនី ថា កិច្ចចរចាសន្តិភាពរវាងអ៊ីស្រាអែលនិងប៉ាឡេស្ទីនត្រូវបានព្យួរចោល ហើយគឺរដ្ឋាភិបាលអ៊ីស្រាអែលទាំងមូលដែលបានសម្រេចចិត្តបង្កកការចរចានេះ។
គួររំលឹកថា កាលពីចុងខែមេសាកន្លងទៅ អ៊ីស្រាអែលបានសម្រេចផ្អាកការពិភាក្សាស្វែងរកដំណោះស្រាយសន្តិភាពជាមួយប៉ាឡេស្ទីន ដោយសារតែអង្គការរំដោះប៉ាឡេស្ទីនបានសម្រេចចេញកិច្ចព្រមព្រៀងផ្សះផ្សាមួយជាមួយក្រុមហាម៉ាស។ ក្រុមហាម៉ាសជាសត្រូវរបស់អ៊ីស្រាអែល ក្រុមនេះមិនទទួលស្គាល់រដ្ឋហ្ស៊ីហ្វអ៊ីស្រាអែលទេ។ ក្នុងកិច្ចព្រមព្រៀងជាមួយក្រុមហាម៉ាស អង្គការរំដោះប៉ាឡេស្ទីននិងហាម៉ាសបានយល់ព្រមបង្កើតរដ្ឋាភិបាលបណ្តោះអាសន្នមួយ មានសមាសភាពសមាជិកជាអ្នកឯករាជ្យ។ សមាសភាពរដ្ឋាភិបាលនេះនឹងត្រូវគេបានដឹងឆាប់ៗ ក្នុងសប្តាហ៍នេះហើយ។
ថ្ងៃអាទិត្យនេះ នាយករដ្ឋមន្ត្រីអ៊ីស្រាអែល បានចំអករិះគន់ប៉ាឡេស្ទីនជាថ្មីថា អ្នកដែលមើលឃើញថា ការបង្កើតរដ្ឋអ៊ីស្រាអែលជាគ្រោះមហន្តរាយ អ្នកនោះមិនចាប់អារម្មណ៍ពីសន្តិភាពទេ។ អ៊ីស្រាអែលបានចោទប៉ាឡេស្ទីនថា បានធ្វើកិច្ចព្រមព្រៀងជាមួយក្រុមហាម៉ាសដើម្បីប្រឆាំងនឹងសន្តិភាព។ រីឯប៉ាឡេស្ទីនវិញចោទអ៊ីស្រាអែលថា បានបង្កើនការសាងសង់តំបន់អាណានិគមជនជាតិហ្ស៊ីហ្វ និងវាយប្រហារជនជាតិប៉ាឡេស្ទីន ដែលជាការបំផ្លិចបំផ្លាញការចរចាស្វែងរកសន្តិភាពរវាងអ៊ីស្រាអែលនិងប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ