វិបត្តិប្រាក់បំណុល៖ ក្រិកលុបចោលគម្រោងបោះឆ្នោតប្រជាមតិលើជំនួយរបស់អឺរ៉ុប
នៅថ្ងៃសុក្រ ៤ វិច្ឆិកា ២០១១នេះ រដ្ឋាភិបាលក្រិកបានប្រកាសជាផ្លូវការលុបចោលគម្រោងបោះឆ្នោតប្រជាមតិ លើផែនការជំនួយរបស់អឺរ៉ុប។ រដ្ឋាភិបាលក្រិកបានផ្លាស់ប្តូរជំហរនេះ ក្រោយពីមេដឹកនាំបារាំង និងអាល្លឺម៉ង់បានព្រមាន អំពីជោគវាសនារបស់ក្រិក ក្នុងតំបន់អឺរ៉ូ។ ម្យ៉ាងទៀត រដ្ឋាភិបាលរបស់លោក George Papandreou ក៏ប្រឈមមុខនឹងការដកសេចក្តីទុកចិត្តពីរដ្ឋសភាផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:២០
កាលពីល្ងាចថ្ងៃព្រហស្បតិ៍ លោក George Papandreou នាយករដ្ឋមន្រ្តីក្រិកបានថ្លែងនៅក្នុងរដ្ឋសភាថា លោកនឹងសុខចិត្តលុបចោលគម្រោងបោះឆ្នោតប្រជាមតិវិញ ប្រសិនបើគណបក្សប្រឆាំងសុខចិត្តបោះឆ្នោតគាំទ្រ ផែនការដោះស្រាយវិបត្តិប្រាក់បំណុល ដែលអនុម័តដោយប្រទេសក្នុងតំបន់ចាយលុយអឺរ៉ូ កាលពីថ្ងៃទី២៧ តុលា។ នៅថ្ងៃសុក្រនេះ ឧបនាយករដ្ឋមន្រ្តីក្រិកបានចេញសេចក្តីប្រកាសព័ត៌មានមួយបញ្ជាក់ជាផ្លូវការថា គម្រោងបោះឆ្នោតប្រជាមតិត្រូវបានលុបចោលវិញហើយ។
គួររំឭកថា គម្រោងបោះឆ្នោតប្រជាមតិនេះ ត្រូវបាននាយករដ្ឋមន្រ្តីក្រិកប្រកាសឲ្យដឹង កាលពីថ្ងៃចន្ទ។ ការប្រកាសដ៏គួរឲ្យភ្ញាក់ផ្អើលនេះបានបណ្តាលឲ្យទីផ្សារមូលបត្រច្រួលច្របល់ស្ទើរតែគ្រប់កន្លែង។
នៅថ្ងៃពុធ ប្រមុខដឹកនាំបារាំង និងអាល្លឺម៉ង់បានព្រមានក្រិកថា លទ្ធផលនៃការបោះឆ្នោតប្រជាមតិនេះនឹងកំណត់ជោគវាសនារបស់ក្រិក នៅក្នុងតំបន់ចាយលុយអឺរ៉ូ។ ប្រសិនបើក្រិកបដិសេធមិនទទួលយកផែនការដែលបានព្រមព្រៀងគ្នា កាលពីថ្ងៃទី២៧ តុលានេះទេ ក្រិកមិនអាចបន្តស្ថិតនៅជាសមាជិកតំបន់អឺរ៉ូទៀតបានទេ។ អឺរ៉ុប និងមូលនិធិរូបិយវត្ថុអន្តរជាតិ (IMF) បានសម្រេចផងដែរថានឹងផ្អាករាល់ការផ្តល់ឥណទានទាំងអស់ទៅឲ្យក្រិក រហូតដល់ក្រិកអនុម័តផែនការថ្ងៃ២៦តុលា។ ទឹកប្រាក់ចំនួន ៨ពាន់លានអឺរ៉ូ ដែលគេគ្រោងនឹងផ្តល់ទៅឲ្យក្រិក នៅក្នុងខែវិច្ឆិកានេះក៏នឹងត្រូវផ្អាកវិញដែរ។
នៅក្នុងប្រទេសក្រិកវិញ គម្រោងរៀបចំបោះឆ្នោតប្រជាមតិ ក៏ប្រឈមមុខនឹងការប្រឆាំងយ៉ាងខ្លាំងក្លាដែរ។ សូម្បីតែសមាជិករដ្ឋាភិបាល និងសមាជិកសភាមកពីគណបក្សកាន់អំណាច ក៏ប្រឆាំងនឹងការបោះឆ្នោតប្រជាមតិនេះដែរ។ ដោយខ្វះសំឡេងគាំទ្រក្នុងរដ្ឋសភា លោក George Papandreou ត្រូវប្រឈមមុខនឹងការបោះឆ្នោតដកសេចក្តីទុកចិត្ត ដែលគេនឹងរៀបចំធ្វើ នៅយប់ថ្ងៃសុក្រនេះ។
ដើម្បីបញ្ចៀសវិបត្តិនយោបាយនេះ លោក Papandreou បានប្រកាសថា លោកសុខចិត្តបង្កើតរដ្ឋាភិបាលរួបរួមជាតិមួយ ជាមួយគណបក្សប្រឆាំង ហើយបន្ទាប់មកនឹងរៀបចំការបោះឆ្នោតសភាមុនកាលកំណត់។ ក៏ប៉ុន្តែ មុននឹងរៀបចំបោះឆ្នោតជ្រើសរើសសមាជិកសភាថ្មី សភាចាស់ត្រូវតែអនុម័តទទួលយកផែនការប្រាក់បំណុលរបស់អឺរ៉ុបជាមុនសិន។
នៅក្នុងសេចក្តីប្រកាសព័ត៌មាន នៅព្រឹកថ្ងៃសុក្រនេះ ឧបនាយករដ្ឋមន្រ្តីក្រិកក៏បានឲ្យដឹងផងដែរថា នៅក្នុងការបោះឆ្នោតយប់នេះ រដ្ឋាភិបាលនឹងទទួលបានការគាំទ្រពីរដ្ឋសភា ដើម្បីបង្កើតរដ្ឋាភិបាលរួបរួមជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ