ប្រជាមតិក្រិកធ្វើឲ្យតំបន់អឺរ៉ូភ័យជ្រួលស្លន់ស្លោ
អឺរ៉ុបបានធ្លាក់ទៅក្នុងអស្ថិរភាពភ័យជ្រួលច្របល់កាលពីថ្ងៃអង្គារម្សិលមិញ ក្រោយពីមានការប្រកាសដោយលោកនាយករដ្ឋមន្ត្រីក្រិកថា នឹងរៀបចំឲ្យមានការបោះឆ្នោតធ្វើប្រជាមតិមួយស្តីពីការអនុម័តផែនការដើម្បីសង្គ្រោះប្រទេសក្រិកដែលសម្រេចបានកាលពីសប្តាហ៍មុននៅទីក្រុងព្រុចសែល។តើប្រជាមតិក្រិកនេះអាចជះចេញជាផលវិបាកធ្ងន់ធ្ងរយ៉ាងណាខ្លះដល់តំបន់អឺរ៉ូ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៨:១៨
លោកនាយករដ្ឋមន្ត្រីក្រិក Georgrs Papandréou ប្រកាសធ្វើប្រជាមតិនៅពេលនេះ មកពីលោកយល់ថា ការត្រួតពិនិត្យទៅលើវិស័យហិរញ្ញវត្ថុសាធារណៈរបស់ប្រទេសក្រិកដោយ មូលនិធិរូបិយវត្ថុអន្តរជាតិ FMI សហភាពអឺរ៉ុប និងធនាគារកណ្តាលអឺរ៉ុបធ្វើឲ្យប៉ះពាល់ដល់អធិបតេយ្យរបស់ប្រទេសក្រិក។ ហើយម្យ៉ាងទៀត បើគ្មានការត្រួតពិនិត្យទាំងនេះ ទីក្រុងអាថែនអាចនឹងអនុវត្តវិធានការត្បិតត្បៀតរបស់ខ្លួនបានធូរស្រួល។
ការប្រកាសដោយលោកនាយករដ្ឋមន្ត្រីក្រិក Georgrs Papandréou ថា នឹងរៀបចំឲ្យមានការបោះឆ្នោតធ្វើប្រជាមតិមួយស្តីពីការអនុម័តផែនការដើម្បីសង្គ្រោះប្រទេសក្រិកដែលសម្រេចបានកាលពីសប្តាហ៍មុន បានធ្វើឲ្យទីផ្សារហិរញ្ញវត្ថុនៅទូទាំងពិភពលោកហើយនិងជាពិសេសតំបន់អឺរ៉ូធ្លាក់ទៅក្នុងអស្ថិរភាពទាំងស្រុង។ ដូច្នេះហើយបានជាប្រទេសបារាំងតាមរយៈការថ្លែងគូសបញ្ជាក់របស់លោកប្រធានាធិបតីនីកូឡាសាកូហ្ស៊ីថា “ផែនការសង្គ្រោះប្រទេសក្រិកដែលសម្រេចជាឯកច្ឆ័ន្ទដោយប្រទេសសមាជិកទាំង១៧ប្រទេសនៃតំបន់អឺរ៉ូកាលពីថ្ងៃទី២៦តុលាកន្លងទៅគឺពិតជាច្រកចេញតែមួយគត់សម្រាប់ជួយដោះស្រាយវិបត្តិហិរញ្ញវត្ថុក្រិក"។
ដូច្នេះ ជាផ្លូវការ ការប្រកាសធ្វើប្រជាមតិរបស់លោកនាយករដ្ឋមន្ត្រីក្រិកពុំបានធ្វើឲ្យប៉ះពាល់ដល់កិច្ចព្រមព្រៀងនៃទីក្រុងព្រុចសែលឡើយ។ ក៏ប៉ុន្តែ អ្វីដែលប៉ះពាល់គឺអាចមានការអាក់ខានក្នុងការផ្តល់ប្រាក់កម្ចីប្រមាណ៨ពាន់លានអឺរ៉ូដោយមូលនិធីរូបិយវត្ថុអន្តរជាតិ FMI និងដោយប្រទេសអឺរ៉ុបមួយចំនួន។ ដោយហេតុថា គេនឹងផ្តល់ប្រាក់កម្ចី៨ពាន់លានអឺរ៉ូនេះឲ្យប្រទេសក្រិក លុះត្រាណាតែទីក្រុងអាថែនយល់ព្រមអនុវត្តវិធានការត្បិតត្បៀតហើយនិងយល់ព្រមឲ្យមូលនិធិរូបិយវត្ថុអន្តរជាតិ FMI សហភាពអឺរ៉ុប ហើយនិងធនាគារកណ្តាលអឺរ៉ុបធ្វើការត្រួតពិនិត្យទៅលើវិស័យហិរញ្ញវត្ថុសាធរណៈរបស់ខ្លួន។
គួរបញ្ជាក់ថា វិធានការផ្តល់ជំនួយឲ្យប្រទេសក្រិកទាំងអម្បាលមាណដែលក្នុងនោះមានចំនួនទឹកប្រាក់ប្រមាណ១០០ប្លាយពាន់លានអឺរ៉ូដែលមានគ្រោងនៅក្នុងកិច្ចព្រមព្រៀងអឺរ៉ុបនៃថ្ងៃទី២៦តុលាឆ្នាំ២០១១នោះ នឹងត្រូវព្យួរផ្អាកសិន ដោយគេត្រូវរង់ចាំមើលប្រជាមតិក្រិកដែលគ្រោងរៀបចំធ្វើនៅដើមឆ្នាំ២០១២ខាងមុខនេះ។ ក៏ប៉ុន្តែ រយៈពេលរង់ចាំបីខែជារយៈកាលមួយដ៏សែនយូរសម្រាប់ទីផ្សារហិរញ្ញវត្ថុនិងសម្រាប់តំបន់អឺរ៉ូ។
បើប្រសិនជាប្រជាជនក្រិកបោះឆ្នោតបដិសេធពុំព្រមទទួលយកកិច្ចព្រមព្រៀងនៃទីក្រុងព្រុចសែលកាលពីថ្ងៃទី២៦តុលាឆ្នាំ២០១១ទេ នោះធនាគារបារាំងនិងធនាគារអឺរ៉ុបសំខាន់ៗមួយចំនួនដែលបានផ្តល់ប្រាក់កម្ចីយ៉ាងច្រើនសន្ធឹកសន្ធាប់ឲ្យប្រទេសក្រិកច្បាស់ជាត្រូវបាត់បង់ក្តីសង្ឃឹមថានឹងអាចទារយកប្រាក់បំណុលរបស់ខ្លួនបានមកវិញ។ គួរបញ្ជាក់ថា ធនាគារបារាំងនិងធនាគារអឺរ៉ុបក៏បានផងដែរផ្តល់ប្រាក់កម្ចីជិត៣៥ពាន់លានអឺរ៉ូឲ្យទៅប្រទេសអ៊ីតាលី ហើយនិងប្រាក់កម្ចីដ៏ច្រើនទៀតឲ្យទៅប្រទេសអេស្ប៉ាញនិងប្រទេសព័រទុយហ្កាល់។ ហើយបើធនាគារអឺរ៉ុបទាំងនោះគ្មានលទ្ធភាពនឹងទារយកប្រាក់កម្ចីបានមកវិញទេ នោះពួកគេច្បាស់ជាជួបនឹងវិបត្តិហិរញ្ញវត្ថុដ៏សែនធ្ងន់ធ្ងរ។
គួរកត់សម្គាល់ថា គ្រាន់តែកាលពីម្សិលមិញ ទីផ្សារមូលបត្របានធ្លាក់ដួលដាំដូងយ៉ាងខ្លាំង ទីផ្សារភាគហ៊ុននៅទីក្រុងប៉ារីសបានស្រុតចុះអស់-៥,៣៨% ហើយតម្លៃភាគហ៊ុននៃធនាគារបារាំងក៏បានធ្លាក់ស្រុតចុះយ៉ាងសែនខ្លាំង៖ ធនាគារ Socièté Générale បានធ្លាក់បាត់បង់អស់-១៦,២% ធនាគារ BNP Paribas បានធ្លាក់បាត់បង់អស់-១២% ហើយនិង Crédit Agricole បានស្រុតចុះអស់-១២,៥%។
ជំនួបកំពូលអឺរ៉ូបដែលបានប្រព្រឹត្តទៅកាលពីថ្ងៃទី២៦តុលាឆ្នាំ២០១១គឺរៀបចំធ្វើឡើងដើម្បីជួយដោះស្រាយវិបត្តិហិរញ្ញវត្ថុរបស់ប្រទេសក្រិក ហើយនិងដើម្បីជួយបញ្ចៀសកុំឲ្យវិបត្តិហិរញ្ញវត្ថុនេះរីករាលដាលឆ្លងទៅប្រទេសអឺរ៉ុបដទៃទៀត។ ក៏ប៉ុន្តែ ការប្រកាសបោះឆ្នោតធ្វើប្រជាមតិដោយលោកនាយករដ្ឋមន្ត្រីក្រិកនេះ ច្បាស់ជាក្លាយទៅជាកត្តាដ៏សែនអវិជ្ជមានមកជួយជំរុញប្រទេសអឺរ៉ុបដែលមានស្ថានភាពហិរញ្ញវត្ថុទន់ខ្សោយដូចជាប្រទេសអ៊ីតាលី ឬប្រទេសអេស្ប៉ាញឲ្យធ្លាក់ទៅក្នុងជ្រោះវិបត្តិហិរញ្ញវត្ថុមួយដ៏គួរឲ្យបារម្ភ។ ដោយហេតុថា ប្រទេសអ៊ីតាលីជាមហាអំណាចសេដ្ឋកិច្ចទី៣នៅក្នុងតំបន់អឺរ៉ូ ហើយប្រទេសនេះមានជាប់ជំពាក់បំណុលគេវណ្ឌក រីឯអត្រានៃកំណើនសេដ្ឋកិច្ចទៀតសោតក៏មានយ៉ាងសែនតិចតួចបំផុតសឹងតែសូន្យទៅហើយ ធ្វើម្តេចប្រទេសអ៊ីតាលីមានលទ្ធភាពនឹងធ្វើការប្រឈមមុខទល់នឹងវិបត្តិហិរញ្ញវត្ថុដ៏ធ្ងន់ធ្ងរនេះកើត?
នៅក្នុងប្រជាមតិ បើប្រសិនជាប្រជាជនក្រិកបោះឆ្នោតប្រឆាំងពុំព្រមទទួលយកកិច្ចព្រមព្រៀងនៃទីក្រុងព្រុចសែលនៃថ្ងៃទី២៦តុលាឆ្នាំ២០១១ នោះបញ្ហាធនក្ស័យ ហើយនិងបញ្ហាដើរចេញពីតំបន់អឺរ៉ូដោយប្រទេសក្រិកពិតជានឹងត្រូវចោទលេចឡើងជាពុំខាន់។
បើប្រសិនជាប្រទេសក្រិកបដិសេធពុំព្រមអនុវត្តតាមកិច្ចព្រមព្រៀងនៃទីក្រុងព្រុចសែលទេ នោះប្រទេសនៃតំបន់អឺរ៉ូនឹងត្រូវរុញច្រានប្រទេសក្រិកឲ្យដើរចេញពីតំបន់អឺរ៉ូ។ ហើយទាំងនេះ ក៏ជាសារមួយដែលលោកប្រធានាធិបតីបារាំងសាកូហ្ស៊ីនិងលោកស្រីនាយករដ្ឋមន្ត្រីអាល្លឺម៉ង់នឹងថ្លែងប្រាប់លោកនាយករដ្ឋមន្ត្រីក្រិក Georgrs Papandréou នៅថ្ងៃនេះ។
គួរបញ្ជាក់ថា បើប្រទេសក្រិកដើរចេញពីតំបន់អឺរ៉ូមែន នោះទីក្រុងអាថែននឹងត្រូវវិលត្រឡប់ទៅយកប្រាក់ក្រិក drachme មកប្រើជំនួសប្រាក់អឺរ៉ូវិញ ហើយប្រាក់ក្រិក drachme ក៏នឹងប្រហែលត្រូវបញ្ចុះតម្លៃប្រមាណ៥០%។ នៅពេលនោះ ប្រទេសក្រិកក៏នឹងធ្លាក់ទៅក្នុងវិបត្តិសេដ្ឋកិច្ចនិងវិបត្តិហិរញ្ញវត្ថុមួយដ៏ធ្ងន់ធ្ងរ។ ណាមួយត្រូវធ្វើការប្រឈមមុខទល់នឹងបញ្ហាហិរញ្ញវត្ថុ ណាមួយត្រូវធ្វើការប្រឈមមុខទល់នឹងបញ្ហាទំនិញឡើងថ្លៃ។
បើប្រទេសក្រិកដោះស្រាយវិបត្តិហិរញ្ញវត្ថុនិងវិបត្តិសេដ្ឋកិច្ចពុំបាន ហើយស្ថានភាពនៅតែធ្ងន់ធ្ងរបែបនេះ សភាពធនក្ស័យនៃប្រទេសក្រិកច្បាស់ជាចៀសពុំរួចឡើយ។ ហើយម្យ៉ាងទៀត បើមូលនិធិរូបិយវត្ថុអន្តរជាតិនិងប្រទេសអឺរ៉ុបពុំព្រមផ្តល់ប្រាក់កម្ចី៨ពាន់លានអឺរ៉ូនៅពាក់កណ្តាលខែវិច្ឆិកាឆ្នាំ២០១១ទេ តើទីក្រុងអាថែនទៅរកប្រាក់ពីទីណាមកបើកប្រាក់បៀវត្សរ៍ជូនមន្ត្រីរដ្ឋការរបស់ខ្លួន?
ដូច្នេះ សភាពធនក្ស័យរបស់ប្រទេសក្រិកពិតជាពិបាកនឹងចៀសផុត។
នៅក្នុងស្ថានភាពបែបនេះគេពុំអាចដឹងថា តើប្រាក់អឺរ៉ូនឹងត្រូវក្លាយទៅជាយ៉ាងណានោះឡើយ។ ក៏ប៉ុន្តែ អ្វីដែលជាក់ច្បាស់គឺអ្នកទិញ-លក់កេងយកចំណេញច្បាស់ជានាំគ្នាធ្វើការវាយប្រហារទៅលើប្រាក់អឺរ៉ូ ដោយនាំគ្នាលក់ប្រាក់អឺរ៉ូចេញនៅពេលនេះ ធ្វើឲ្យប្រាក់អឺរ៉ូធ្លាក់ចុះថ្លៃខ្លាំង គ្រាន់តែកាលពីម្សិលមិញតម្លៃប្រាក់អឺរ៉ូបានបាត់បង់តម្លៃរបស់ខ្លួនដល់ទៅជាង២%ទៅហើយ ហើយពួកគេនឹងនាំគ្នាទិញយកប្រាក់អឺរ៉ូមកវិញនៅពេលដែលតម្លៃប្រាក់អឺរ៉ូធ្លាក់ដល់បាតបាដាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ